តាមប្រភពព័ត៌មាន Soccer Laduma បានឲ្យដឹងថា កីឡាករបារាំងអាយុ២៣ឆ្នាំ Clement Lenglet ទើបតែចុះកុងត្រាជាមួយនឹងក្លិបអ្នកមានបុណ្យ Barcelona ហើយបង្ហើបពីមូលហេតុដែលរូបគេជ្រើសយកក្លិបនេះ តែមិនយក Man Utd បើទោះបីជាគេមកទាក់ទងក៏ដោយ ។
កីឡាករដែលចេញពីក្លិបបាល់ទាត់ Nancy បានប្រាប់ឲ្យដឹងថា គេជ្រើសរើសយកក្លិប Barcelona ក៏ដោយសារតែក្លិបនេះជាក្លិបធំជាងគេក្នុងលោក ។ Lenglet បានប្រាប់ ESPN ថា «ខ្ញុំជ្រើសរើសយក Barcelona ព្រោះតែខ្ញុំគិតថា វាជាក្លិបធំជាងគេក្នុងលោក ហើយការប្រកួតធ្វើឡើងនៅអេស្ប៉ាញដែលជាលីគធំបំផុត ។ ខ្ញុំចង់ឈ្នះពាន ហើយខ្ញុំគិតថា ខ្ញុំកំពុងតែនៅក្នុងក្លិបល្អជាងគេហើយពេលនេះ» ។
គេបានបន្តថា «ពិតណាស់! ខ្ញុំក៏មកទីនេះដើម្បីប្រកួតដែរ ព្រោះថាកីឡាករដែលមិនបានប្រកួតគឺមិនដែលសប្បាយចិត្តទេ ។ ខ្ញុំមកនេះដើម្បីរៀនក្នុងការឈ្នះពាន ។ ពេលដែលខ្ញុំអាចទៅលេងនៅលើតារាងជាមួយនឹង Messi នៅពេលខាងមុខ កម្លាំងចិត្តរបស់ខ្ញុំគឺពេញភ្លាមតែម្តង» ។
គួរបញ្ជាក់ផងដែរថា Clement Lenglet នាពេលនេះលេងក្នុងនាមជាខ្សែការពារកណ្តាលរបស់ Barcelona ។ រូបគេពីមុន គឺជាកីឡាកររបស់ក្លិប Nancy ដែលឡើងទាត់បាន៨៥ដង តាំងពីចូលលេងដំបូងនៅឆ្នាំ២០១៣ ។ នៅមុនពេលចូលមកក្លិប Barca រូបគេក៏ត្រូវបាន Man Utd មកចែចង់ផងដែរ តែគេមិនព្រមទៅ ៕
ចែករំលែកព័តមាននេះ