រាជធានីភ្នំពេញ ៖ ក្មេងប្រុសម្នាក់បើកបរម៉ូតូមួយគ្រឿងឆ្លងផ្លូវត្រូវរថយន្តមិនស្គាល់ម៉ាកបើកបរក្នុងល្បឿនលឿនដូចហោះបុកម៉ូតូពេញទំហឹងបណ្តាលអោយអ្នកបើកបរម៉ូតូដួលបោកក្បាលស្លាប់ភ្លាមៗនៅកន្លែងកើតហេតុ ។ ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី១៥ ខែកក្កដា ឆ្នាំ២០១៨ តាមបណ្តោយផ្លូវ៥១កែងផ្លូវ១៨៤ នៅចំណុចក្រោយវិទ្យាល័យព្រះស៊ីសុវត្ថិ ស្ថិតនៅក្នុងសង្កាត់ផ្សារថ្មី៣ ខណ្ឌដូនពេញ ។
ជនរងគ្រោះដែលស្លាប់ឈ្មោះ ទ្រី សុខផេង ភេទប្រុស អាយុ១៤ឆ្នាំ ជាសិស្ស ស្នាក់នៅផ្ទះបុរីកីឡាអាគាទី៧ មានទីកន្លែងកំណើតនៅចំណុចកើតហេតុខាងលើ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញក្មេងប្រុសម្នាក់បើកបរម៉ូតូមួយគ្រឿងម៉ាកហុង ដាBig ពណ៌ក្រហម ពាក់ស្លាកលេខ ភ្នំពេញ ១GX-៣៥៧៦ ធ្វើដំណើរតាមបណ្តោយផ្លូវ១៨៤ ក្នុងទិសដៅពីលិចទៅកើត ពេលមកដល់ចំណុចកើតហេតុ ក្មេងប្រុសខាងលើបានបើកបរម៉ូតូឆ្លងផ្លូវបំបែកជាបួនទៅត្រង់ ក៏ស្រាប់តែមានរថយន្តមួយគ្រឿងមិនចាំម៉ាក មិនចាំស្លាកលេខ បើកបរតាមបណ្តោយផ្លូវ៥១ ក្នុងទិសដៅពីជើងទៅត្បូងក្នុងល្បឿនយ៉ាងលឿនដូចហោះក៏បានបុកម៉ូតូចំពីមុខចំហៀងខាងឆ្វេងពេញទំហឹង បណ្តាលអោយអ្នកបើកបរម៉ូតូដួលបោកក្បាលហូរឈាមស្លាប់ភ្លាមៗនៅនឹងកន្លែងកើតហេតុ ចំណែកម៉ូតូវិញអូសជាង១០ម៉ែត្របណ្តាលឱ្យរងការខូចខាតខ្ទេចក្បាលម៉ូតូ ហើយរថយន្តបង្កបានបើកគេចខ្លួនបាត់ស្រមោល ។ នៅកន្លែងកើតហេតុមានកាមេរ៉ាសុវត្ថិភាពរបស់សាលារាជធានី ប្រជាពលរដ្ឋសុំអោយសមត្ថកិច្ចជួយឆែកកាមេរ៉ាសុវត្ថិភាពដើម្បីស្វែងរកអ្នកបើកបររថយន្តបង្កមកដោះស្រាយ ។
ក្រោយពេលកើតហេតុ សពក្មេងប្រុសជនរងគ្រោះត្រូវបានឪពុកម្តាយសាច់ញាតិបងប្អូនដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ