ខេតកំពង់ស្ពឺ ៖ ក្មេងប្រុស២នាក់ដែលកើតក្នុងគ្រួសារក្រីក្របំផុតមួយកំពុងជួបការលំបាកយ៉ាងខ្លាំង ព្រោះតែឪពុកបោះបង់ក្រុមគ្រួសារទុកឱ្យពួកគេ៤នាក់បងប្អូន រស់នៅជាមួយម្តាយ និងជីដូនចាស់ជរាបម្រើលើកលាមក និងទឹកនោមប្រចាំថ្ងៃ ព្រោះតែពិការភាព បានគ្រប់គ្រងលើរាងកាយរបស់ពួកគេតាំងពីតូចមកម៉្លេះ ។
ក្រុមគ្រួសារនេះស្ថិតនៅភូមិព្រៃធំ ឃុំរស្មីសាមគ្គី ស្រុកឱរ៉ាល់ ។ ហើយកុមារដ៏អភ័ព្ទទាំង២នាក់បងប្អូនដែលកូនបងមាន ១-ឈ្មោះ ឃៀម ខាវ អាយុ២១ឆ្នាំ ពិការតាំងពីកំណើត និង២-ឈ្មោះ ឃៀម ប៉ូណា អាយុ១៣ ឆ្នាំក៏ពិការដែរ ។
តាមការរៀបរាប់ពីស្ត្រីម្នាក់ឈ្មោះ ម៉ាន អាយុ៣៦ឆ្នាំបានឱ្យដឹងថា រាល់ថ្ងៃនេះគាត់រស់នៅដោយលំបាកជាខ្លាំង ព្រោះត្រូវរ៉ាប់រងលើកូនៗទាំង២ដែលពិការ ដោយដើរតួជាឱពុកផង ជាម្តាយផង ។ ក្នុងការមើលថែកូនៗពិការក្រៅពីគាត់ជាម្តាយ នៅមានម្តាយចាស់ជរារបស់គាត់ផងដែរ ដែលនៅបម្រើកូនៗរបស់គាត់ ។
ស្ត្រីជាម្តាយបានបន្តថា គាត់បានរៀបការជាមួយបុរសម្នាក់បង្កើតកូនបាន៤នាក់ប្រុស២ស្រី២នាក់ក្រោយមកប្តីរបស់គាត់ក៏ចាកចេញពីគ្រួសារបាត់ដំណឹងឈឹងតាំងពីកូនស្រីចាប់កំណើត ។
ស្ត្រីជាដែលបន្តថា កូនប្រុសរបស់គាត់កើតមកដំបូងមានកាយសម្បទាធម្មតាដូចក្មេងដ៏ទៃដែរ តែក្រោយមកនៅពេលមានអាយុ២ទៅ៣ឆ្នាំក៏មានអាការៈទន់ដៃជើងដើរមិនរួច ពេលនោះគាត់បានយកកូនទៅពេទ្យ ដើម្បីព្យាបាលដែរ តែត្រូវគ្រូពេទ្យប្រាប់ថា អស់លទ្ធភាពហើយ ព្យាបាលមិនជាទេ ហើយក៏ដេកនៅលើកន្ទេលរហូតមក ។
ស្ត្រីជាម្តាយដកដង្ហើមធំបន្ធូរភាពតានតឹងក្នុងចិត្តបន្តិច ក៏បន្តថា មិនដឹងជាយ៉ាងម៉េចនោះទេ ក្រោយមកកូនប្រុសបន្ទាប់នៅពេលអាយុ៤ទៅ៥ឆ្នាំ ក៏មានអាការៈដូចគ្នាដែរ បើទោះជាគាត់នាំទៅព្យាបាលយ៉ាងណាក៏មិនជាដែរ ។ ដោយឡែកកូនស្រី២នាក់ដែលជាកូនទី៣ អាយុ៥ឆ្នាំ និងកូនពៅដែលទើបអាយុ២ឆ្នាំមានកាយសម្បទាធម្មតា មិនដឹងថា ពួកគេអាចមានជោគវាសនាដូចបងៗឬយ៉ាងណាទេ ។
បើនិយាយពីប្តីរបស់គាត់វិញតាំងពីកូនស្រីពៅចាប់កំណើតមកក៏ទៅបាត់ដំណឹងសូន្យឈឹងតែម្តង ដោយទុកភារៈនេះឱ្យគាត់ដើរតួជាម្តាយផងជាឪពុកផង ។ រាល់ថ្ងៃកូនប្រុសច្បងដែលពិការ សូម្បីតែហូបបាយខ្លួនឯងមិនកើតផងកុំថា ឡើយដល់ទៅបន្ទោរបង់ដោយខ្លួនឯង ។ ចំណែកកូនប្អូនអាចញ៉ាំបាយដោយខ្លួនឯងបាន។ រាល់ថ្ងៃនៅពេលដែលគាត់ជាម្តាយទៅស៊ីឈ្នួលច្រូតស្មៅយកប្រាក់កម្រៃមកផ្គត់ផ្គង់គ្រួសារ កូនពិការទាំង២ត្រូវបានម្តាយរបស់គាត់ មើលថែបញ្ចុកបាយនិងលាងលាមកទឹកម៉ូត្រឱ្យពួកគេ ។
បើតាមស្ត្រីចំណាស់ជាជីដូនឈ្មោះ ម៉ុន អាយុ៧០ឆ្នាំ ក៏បានរៀបរាប់ដែរថា គាត់មានកូន២នាក់ គឺម្តាយចៅទាំង៤នេះ និងកូនប្រុសម្នាក់ទៀតដែលត្រូវជាប្អូន តែកូនប្រុសនេះបានស្លាប់បាត់ទៅច្រើនឆ្នាំមកហើយ ។ កូនប្រុសរបស់គាត់ក៏មានអាការមិនខុសពីចៅរបស់គាត់ដែរដោយគាត់រំលឹកថា កាលកូនប្រុសគាត់កើតមកដំបូងមានកាយសម្បទាធម្មតា តែក្រោយមកអាយុបាន៤ទៅ៥ឆ្នាំក៏ធ្លាក់ខ្លួនពិការដេកនៅលើកន្ទេលអស់រយៈពេលច្រើនឆ្នាំក៏ស្លាប់ទៅ ។
ចំណែកកូនស្រី ម្តាយពួកចៅៗនេះមិនមានកើតអ្វីឡើយ រឿងនេះដូចគ្នាតែម្តង គឺកូនប្រុសៗសុទ្ធតែពិការ ចំណែកស្រីៗមិនពិការទេ ។ គាត់គិតថាចៅៗគាត់មានជំងឺតពូជហើយ បានជាធ្លាក់ខ្លួនពិការបែបនេះ ។
អ្នកភូមិមួយរូបបានឱ្យដឹងដែរថា កុំថាឡើយលុយកាក់សម្រាប់ចាយវាយ សូម្បីតែម្ហូបអាហារក៏អ្នកភូមិឱ្យខ្លះដែរ នៅពេលដែលស្ត្រីជាម្តាយរកលុយទិញអង្ករនិងម្ហូបមិនបាន។
តាមអ្វីដែលកុមារអភ័ព្ទទាំង២បង្ហាញឱ្យដឹងពួកគេចង់បានរទេះថ្មីម្នាក់១គ្រឿង និងគ្រឿងឧបភោគបរិភោគសម្រាប់ទ្រទ្រង់ជីវភាពប្រចាំថ្ងៃ ។ អ្វីដែលអ្នកភូមិឱ្យដឹងគឺថា គ្រួសារនេះពិតជាកម្សត់ណាស់ ។ ជាងនេះទៅទៀតក្នុងនាមអ្នកភូមិជាមួយគ្នាក៏សូមធ្វើការអំពាវនាវដល់សប្បុរសជនទាំងក្នុងប្រទេសនិងក្រៅប្រទេស សូមមេត្តាជួយគាត់ ផង៕
ចែករំលែកព័តមាននេះ