ខេត្តកំពង់ឆ្នាំង ៖ ស្ត្រី២នាក់បានស្លាប់ និងបុរសម្នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយរថយន្តបានកើតឡើងកាលវេលាម៉ោង៧និង៤០នាទីយប់ ថ្ងៃទី១៤ ខែកក្កដា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រ ៨៨-៨៩ ចំណុចខាងមុខយានដ្ឋានជួសជុលរថយន្ត ស្ថិតក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង ។
តាមប្រភពព័ត៌មានបានឱ្យដឹងថា ជនរងគ្រោះទាំង៣នាក់រួមមាន ៖ ១-ឈ្មោះម៉ៅ គឹមហៀង ភេទស្រី អាយុ២១ឆ្នាំ មានទីលំនៅ ភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង បានស្លាប់នៅនឹងកន្លែងកើតហេតុ ២-ឈ្មោះ មឿន ស្រីនាង ភេទស្រី អាយុ១៧ឆ្នាំ មានទីលំនៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង បានស្លាប់នៅនឹងកន្លែងកើតហេតុ និង៣-ឈ្មោះ ថៃ សុភី ភេទប្រុស អាយុ២៨ ឆ្នាំ មានទីលំនៅភូមិសំរោងសង្កាត់ផ្សារឆ្នាំង បានរងរបួសធ្ងន់។ សមត្ថកិច្ចមិនទាន់សន្និដ្ឋានថា ជនរងគ្រោះទាំង៣នាក់ តើនរណាជាអ្នកបើកបរម៉ូតូនោះទេ។
សមត្ថកិច្ចនគរបាលបានអោយដឹងថាៈ មុនពេលកើតហេតុ ជនរងគ្រោះទាំង៣នាក់បានជិះម៉ូតូមួយគ្រឿង ធុនសេ១២៥ ពាក់ស្លាកលេខ កំពង់ឆ្នាំង ១D-២៧៦១ ធ្វើដំណើរក្នុងទិសដៅពីជើងទៅត្បូងតាមបណ្តោយផ្លូវជាតិ លុះមកដល់ចំណុចកើតហេតុបានបើកវ៉ាជែងរថយន្តដឹកទំនិញមួយគ្រឿង ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ ៣D-៧០៨០ បើកបរដោយបុរសម្នាក់មិនស្គាល់អត្តសញ្ញាណ ។ ពេលម៉ូតូមួយគ្រឿងដែលជិះគ្នា៣នាក់នោះបើកវ៉ាជែងរថយន្តដឹកទំនិញមិនផុត ក៍ទៅប៉ះនឹងរថយន្តមួយគ្រឿងទៀតមិនស្គាល់ម៉ាកបើកបរក្នុងទិសដៅបញ្ច្រាសទិសគ្នា ក៍បានដួលបោកចូលរថយន្តដឹកទំនិញដែលកំពុងវ៉ាជែងក្នុងទិសដៅស្របគ្នា បណ្តាលអោយជនរងគ្រោះជាស្ត្រី២នាក់បានស្លាប់នឹងនៅកន្លែងកើតហេតុ និងបុរសម្នាក់រងរបួសធ្ងន់ ចំណែកអ្នកបើកបររថយន្តដឹកទំនិញបានរត់គេចខ្លួនបាត់ស្រមោល ។
ក្រោយពេលកើតហេតុ សមត្ថកិច្ចនគរបាលក្រុងកំពង់ឆ្នាំងបាននាំយករថយន្ត និងម៉ូតូទៅរក្សាទុកនៅអធិការដ្ឋាននគរបាលក្រុងកំពង់ឆ្នាំង ដើម្បីរង់ចាំការដោះស្រាយតាមនិតិវិធី ៕
ចែករំលែកព័តមាននេះ