រាជធានីភ្នំពេញ ៖ ក្នុងចំណោមឈុតដែលបានកែច្នៃទាំងអស់ គេចាប់អារម្មណ៍ថា មួយឈុតរបស់តារាសម្ដែង កញ្ញា អូន ពេជ្រ លេចធ្លោមិនធម្មតានោះទេ ដោយសារតែឈុតរបស់នាង…
រាជធានីភ្នំពេញ ៖ ក្នុងចំណោមឈុតដែលបានកែច្នៃទាំងអស់ គេចាប់អារម្មណ៍ថា មួយឈុតរបស់តារាសម្ដែង កញ្ញា អូន ពេជ្រ លេចធ្លោមិនធម្មតានោះទេ ដោយសារតែឈុតរបស់នាង គឺមានឈ្មោះ នាគ.សប្រចាំនៅខេត្តកំពត ជាតំណាងឱ្យខេត្តភាគនិរតីនោះ។ យ៉ាងណាមិញ នាងនៅតែមិនមានវាសនាក្នុងការគ្រងពាននៅក្នុងកម្មវិធីប្រកួតឈុតបុរាណប្រចាំ «គ្រួសារតារាកម្ពុជា» កាលពីថ្ងៃទី៩ ខែកក្កដា នោះឡើយ។
បើតាមគណៈកម្មការវាយតម្លៃផ្ដល់ពិន្ទុ អ្នកគ្រូ គង់ ណារី និងលោក សុះ ម៉ាច បានអះអាងថា មួយឈុតពណ៌សរបស់តារាសម្ដែងកញ្ញា អូន ពេជ្រ ពិតជាស្រស់ស្អាត និងប្លែកភ្នែក ហើយអ្នកគ្រូរឹតតែមានការចាប់អារម្មណ៍ខ្លាំងឡើងនៅពេលមួយឈុតរបស់នាង ត្រូវបានកំណត់ឈ្មោះថា «ឈុតនាគ.សខេត្តកំពត»។
អ្នកគ្រូ គង់ ណារី បន្តថា មួយឈុតរបស់នាងពោរពេញដោយគំនិតច្នៃប្រឌិតខ្ពស់ ដោយគ្រាន់តែអង្កាំ និងការប៉ាក់ឌិនផ្សេងៗ គឺមិនងាយនឹងធ្វើបាននោះទេ។ យ៉ាងណាមិញ អ្នកគ្រូថា មិនអាចឱ្យឈុតនោះជាប់ពានណាមួយបានទេ ដោយសារតែទម្រង់លើសក់របស់ឈុតនេះ ត្រូវបានកែច្នៃតាមរបៀបសម័យទុំទាវ ដែលបាត់រចនាបទដើម និងមើលទៅមិនមែនទម្រង់ខ្មែរ ហាក់ដូចជាឈុតក្លាយរបស់ជនជាតិចចាម និងជនជាតិឥណ្ឌាទៅវិញ ។
ហើយអ្វីដែលគួរឱ្យស្ដាយគឺឈុតនេះ មិនត្រូវបានមើលយល់ថា ជាឈុតតំណាងឱ្យនាគ.សតែម្ដង បើមិនមានការប្រាប់ឱ្យដឹងពីឈ្មោះ ដោយសារតែខ្វះរចនាបទដែលធ្វើឱ្យអ្នកគ្រូយល់ថា ជាគឺជារឿងសោកស្ដាយដែលមិនបានកាន់ពាន។
អ្នកគ្រូមានប្រសាសន៍ថា «បើតាមតែក្បូរក្បាច់ ឈុតហ្នឹងគួរតែបានលើកពាន តែបណ្ដាលមកពីមើលអត់យល់ថា ឈុតនាគ ឬជាឈុតចាម ពេលមិនប្រាប់ឱ្យដឹងពីឈ្មោះ ទើបឱ្យកាន់ពានមិនកើត»។
រីឯកញ្ញា អូន ពេជ្រ និយាយថា មួយឈុតនេះ អ្នកឌីហ្សាមានបំណងចង់ដាក់ក្បាលនាគ.ស ដើម្បីឱ្យច្បាស់ថា ជាស្ដេចនាគ.សរបស់ខេត្តកំពតដែរ ប៉ុន្តែបណ្ដាលមកពីអ្នកច្នៃចង់ក្លាយឈុតក្នុងសម័យចេនឡាផង ទើបបែរជាដាក់រំយោលអង្កាំ.សជាជំនួសវិញ។
កញ្ញាបន្តទៀតថា មួយឈុតរបស់នាងចំណាយធ្វើឱ្យច្រើនខែ ហើយបើនិយាយពីការចំណាយលុយក៏អស់ច្រើនដែរ ខណៈដែលនាងរំពឹងថា នឹងបានលើកពានណាមួយ ព្រោះតែភាពអស្ចារ្យ ប៉ុន្តែក៏ត្រូវខកខានវិញ ព្រោះតែការខ្វះចន្លោះដូចអ្វីដែលគណៈកម្មការលើកឡើង៕
ចែករំលែកព័តមាននេះ