សោកនាដកម្មទៀតហើយ…តែមួយប៉ប្រិចភ្នែកឃាតកលាក់មុខឆក់យកជីវិតមនុស្ស២នាក់
- កំពត
ខេត្តកំពត ៖ ប្រភពព័ត៌មានបឋមបានរាយការឲ្យដឹងថា មានសោកនាដកម្មយ៉ាងអាណោចអាធម៌ដោយករណីគ្រោះថ្នាក់ចរាចរណ៍នៅស្រុកជុំគីរីកើតឡើងមួយករណីទៀតហើយដែលបង្កឡើងរវាងរថយន្ត និងម៉ូតូប៉ះគ្នាបណ្តាលឲ្យអ្នកបើកបរម៉ូតូ និងអ្នកជិះរួមដំណើរម្នាក់បានស្លាប់ទាំងពីរនាក់កន្លែងកើតហេតុ រីឯរថយន្តក៏ត្រូវក្រឡាប់ផ្ងារជើងទាំងបួនឡើងលើផងដែរ ។ ហេតុការនេះកើតឡើងកាលពីវេលាម៉ោង៧និង១៥នាទីព្រឹក ថ្ងៃទី១៤…
លោកវរសេនីយទោ ពុធ សឺង នាយការិយាល័យចរាចរផ្លូវគោកនៃស្នងការដ្ឋានបានឲ្យដឹងថា ករណីគ្រោះថ្នាក់ចរាចរណ៍ខាងលើបង្កឡើងដោយរថយន្ត និងម៉ូតូក្នុងទិសដៅស្របគ្នាពីត្បូងទៅជើង លុះចំណុចកើតហេតុម៉ូតូដែលរត់ពីមុខរថយន្តបានបត់ឆ្លងផ្លូវទៅខាងឆ្វេងដៃ(បត់ឆ្លងថ្នល់ទៅទិសខាងលិច)បណ្តាលឲ្យរថយន្តបុកពេញទំហឹងតែម្តង ។
ប្រធានចរាចរខេត្តឲ្យដឹងទៀតថា បើយោងតាមប្រភពព័ត៌មានបានឲ្យដឹងរថយន្តបង្កម៉ាកហាយឡែនឌ័រ ពណ៌ស ពាក់ផ្លាកលេខភ្នំពេញ 2AC-3388 អ្នកបើកបរមានឈ្មោះ អៀម ចាន់សុភា ភេទស្រី អាយុ៣៨ឆ្នាំ មានទីលំនៅភូមិក្រាំង សង្កាត់ក្រាំងអំពិល ក្រុងកំពត ខេត្តកំពត ។ ម៉ូតូរងគ្រោះម៉ាកសេ១២៥ ពណ៌ខ្មៅ ពាក់ផ្លាកលេខ កំពង់ស្ពឺ 1L-8850 បើកបរដោយឈ្មោះ ណុប ទូច ភេទប្រុស អាយុ២៦ឆ្នាំ រស់នៅភូមិដំណាក់ឈើក្រំ ឃុំស្នាយអញ្ជិត ស្រុកជុំគីរី(ស្លាប់) និងអ្នករួមដំណើរឈ្មោះ សេង រីម ភេទស្រី អាយុ៦៥ឆ្នាំ មានទីលំនៅភូមិ-ឃុំជាមួយគ្នាខាងលើ(ស្លាប់នៅកន្លែងកើតហេតុ) ។
សពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី ។ ចំណែកយានយន្តទាំងពីរគ្រឿងសមត្ថកិច្ចបាននាំទៅរក្សាទុកនៅអធិកាដ្ឋាននគរបាលស្រុកជុំគីរីរង់ចាំដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ