រដ្ឋមន្ត្រីក្រសួងវប្បធម៌ និងវិចិត្រសិល្បៈ ប្រទេសបូលីវី បានបង្ហាញពីគម្រោងសាងសង់សារមន្ទីរខាងក្រោមទឹកនៅក្នុងបឹង «Titicaca» ជាបឹងដ៏ស័ក្ដិសិទ្ធិ ក្រោយពីប្រទះឃើញវត្ថុដ៏មានតម្លៃជាច្រើនប្រភេទលិចនៅក្នុងបឹង ។
មានការរំពឹងទុកថា វាជាមជ្ឈមណ្ឌលទេសចរណ៍ និងប្រភពនៃការស្រាវជ្រាវផ្នែកផែនដីវិទ្យា រួមទាំងជីវសាស្ត្រមួយកន្លែងនៅលើពិភពលោកដែលមនុស្សគ្រប់រូបចង់ទៅដើរកម្សាន្ត ។
បឹង «Titicaca» គ្របដណ្ដប់លើផ្ទៃដីចំនួន៨.៥០០គីឡូម៉ែត្រការ៉េលាតសន្ធឹងនៅតាមបណ្ដោយព្រំដែនរវាងប្រទេសបូលីវី និងប្រទេសប៉េរូ ។ ជាប្រភពទឹកសាបដែលខ្ពស់បំផុតនៅលើពិភពលោកក្នុងរយៈកម្ពស់ជាង៣.៨០០ម៉ែត្រពីកម្រិតនីវ៉ូទឹកសមុទ្រ ។
ហើយមានរឿងតំណាលថា ជាបឹងទាក់ទងនឹងកូនប្រុសរបស់ «សុរិយទេព» ឈ្មោះ «ម៉ាន់កូ កាផាក» និងគូស្នេហ៍ គឺនាង «ម៉ាម៉ាអុកយ៉ូ» ជាទេពធីតាទឹក និងមានភាពស្ដុកស្ដម្ភ ។
លោកម៉ាន់កូ ជាអ្នកសាងសង់ក្រុងគូស្កូ នៃប្រទេសប៉េរូជាក្រុងសំខាន់ប្រវត្តិសាស្ត្រនៃអារ្យធម៌ «អ៊ីនខា» នៅក្នុងសតវត្សទី១៣-១៦ និងជាប្រភពនៃកំណើតវប្បធម៌នៅក្នុងស្រុកជាច្រើនកន្លែងមុនពេលអេស្ប៉ាញចូលកាន់កាប់ ។
សារមន្ទីរនេះនឹងចំណាយប្រាក់សាងសង់ប្រហែល១០លានដុល្លារ រួមតាំងប្រាក់ប្រហែល២លានដុល្លារពី «Enabel» ជាអង្គការអភិវឌ្ឍប្រទេសបែលហ្ស៊ិក ឬ (Belgian development agency-Enabel) និងអង្គការសិក្សាស្រាវជ្រាវវិទ្យាសាស្ត្រ និងវប្បធម៌នៃអង្គការសហប្រជាជាតិ (UNESCO) ។ សារមន្ទីរនេះនឹងសាងសង់នៅក្បែរទីក្រុងសាន ប៉េដ្រូដឺ ទីគីណា ឆ្ងាយពីក្រុងឡាប៉ាស់ ប្រហែល១០០គីឡូម៉ែត្រ ៕
ចែករំលែកព័តមាននេះ