ប្រទេសអេហ្ស៊ីប ៖ ការផ្ទុះឆេះមួយកើតមានកាលពីយប់ថ្ងៃទី១២ កក្កដា នៅឯទីតាំងស្តុកប្រេងឥន្ធនៈមួយ ស្ថិតនៅខាងក្រៅព្រលានយន្តហោះទីក្រុងគែរអេហ្ស៊ីប តែពុំបណ្ដាលឲ្យមានការប៉ះពាល់ដល់ចរាចរណ៍អាកាសឡើយ។ នេះជាការអះអាងរបស់រដ្ឋមន្ត្រីអាកាសចរណ៍ស៊ីវិលអេហ្ស៊ីប។
បើតាមទីភ្នាក់ងារព័ត៌មានផ្លូវការអេហ្ស៊ីប MENA ដែលដកស្រង់ប្រភពព័ត៌មានសន្តិសុខមួយនិយាយថា មនុស្ស១២នាក់រងរបួស ត្រូវបានបញ្ជូនទៅមន្ទីរពេទ្យក្រោយការផ្ទុះ។
ចំណែកអ្នកនាំពាក្យយោធា និយាយថា ការផ្ទុះកើតមានក្នុងឃ្លាំងផលិតផលគីមីមួយ មកពីធាតុអាកាសក្ដៅខ្លាំងពេក។ បើតាមទូរទស្សន៍រដ្ឋរាយការណ៍ថា ពួកអ្នកពន្លត់ភ្លើងអាចពន្លត់ភ្លើងបាន។
ប្រភពព័ត៌មានសន្តិសុខជាច្រើននិយាយថា ឃ្លាំងដែលកើតមានការផ្ទុះឆេះជារបស់កងទ័ព។ ហើយអាងស្តុកប្រេង២រងការប៉ះពាល់ ក្រៅបរិវេណព្រលានយន្តហោះ។ចំណែករដ្ឋមន្ត្រីអាកាសចរណ៍ស៊ីវិលបញ្ជាក់ថា ចរាចរណ៍អាកាសពុំរាំងស្ទះ ដោយការផ្ទុះឆេះនោះ ដែលគេស្ដាប់ឮក្នុងតំបន់ទាំងមូលឡើយ៕
ចែករំលែកព័តមាននេះ