រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងសហភាពអឺរ៉ុប(EU)មិនអាចមកបង្ខំឲ្យកម្ពុជាបង់ចោលឯករាជ្យរបស់ខ្លួនទាំងមិនដឹងស្ថានការជាក់ស្តែងនៅកម្ពុជា ។
ការអះអាងរបស់មន្ត្រីជាន់ខ្ពស់គណបក្សកាន់អំណាចនេះ បន្ទាប់ពីសហភាពអឺរ៉ុបព្រមានថា នឹងដកកម្ពុជាចេញពីគម្រោងអនុគ្រោះពន្ធប្រសិនបើបើកវិធានការចុងក្រោយរបស់ពួកគេត្រូវបរាជ័យ ។ លោក សុខ ឥសាន អ្នកនាំពាក្យប្រជាជនកម្ពុជាបានឲ្យដឹងនៅថ្ងៃទី១៣ កក្កដា សហភាពអឺរ៉ុប ត្រូវដឹងសភាពការណ៍ជាក់ស្ដែងកម្ពុជាមិនត្រូវបង្ខំឲ្យកម្ពុជាបោះបង់ចោលនូវឯករាជ្យរបស់ខ្លួន ដើម្បីទទួលបាននូវអនុគ្រោះពន្ធនោះទេ ។ជាមួយគ្នានោះដែរលោកបានថា សហភាពអឺរ៉ុបព្រមានដកកម្ពុជាចេញពីគម្រោងអនុគ្រោះពន្ធ បញ្ហាទាំងនេះជារឿងរបស់ពួកគាត់ ដូច្នេះកម្ពុជាគ្មានសិទ្ធិអំណាចមករារាំងពួកគាត់ឡើយ ។
លោកបញ្ជាក់ថា ក៏ប៉ុន្ដែគាត់ត្រូវតែផ្សារភ្ជាប់នឹងសភាពការណ៍ពិតជាក់ស្ដែងនៅកម្ពុជាមិនគ្រាន់តែមាននិន្នាការនយោបាយកាន់ជើងអតីតបក្សប្រឆាំង ហើយមកបង្ខំឲ្យកម្ពុជាបោះបង់ចោលឯករាជ្យ និងអធិបតេយ្យភាពរបស់ខ្លួន ដើម្បីបានទទួលនូវការអនុគ្រោះពន្ធនោះទេ មិនសាកសមទេ ។
អ្នកនាំពាក្យគណបក្សកាន់អំណាចក៏បានគូសបញ្ជាក់បន្ថែមថា ប្រសិនបើសិទ្ធិមនុស្សនៅកម្ពុជា មានការធ្លាក់ចុះពិតមែន ដូច្នេះប្រជាពលរដ្ឋខ្មែរទូទាំងប្រទេសរស់មិនបានឡើយដូចទៅក្នុងរបបសាធារណរដ្ឋខ្មែរ របស់លោក លន់ ណន់ ក៏ដូចជា របបកម្ពុជាប្រជាធិបតេយ្យ ។ លោកក៏បានលើកឡើងថា ការវាយតម្លៃរបស់សហភាពអឺរ៉ុបមកកម្ពុជាបានផ្ទុយពីការពិត ដោយសារតែកម្ពុជាមានការគោរពសិទ្ធិមនុស្សលើកកម្ពស់លទ្ធិប្រជាធិតេយ្យសេរីពហុបក្សនេះហើយបានជាកម្ពុជាដំណើរការដោយរលូន ក្រោមការដឹកនាំរបស់សម្ដេចតេជោ ហ៊ុន សែន ។
សូមជម្រាបការលើកឡើងរបស់អ្នកនាំពាក្យបក្សកាន់អំណាចនេះ បន្ទាបប់ពីគណៈកម្មការអឺរ៉ុប បានសេចក្តីប្រកាសព័ត៌មានចេញពីទីក្រុងប្រ៊ុយសែល កាលពីថ្ងៃទី១២ ខែកក្កដា ឆ្នាំ២០១៨ បានឲ្យដឹងថា សហភាពអឺរ៉ុបទទួលបន្ទុកផ្នែកពាណិជ្ជកម្មធ្វើការព្រមានដកកម្ពុជាចេញពីគម្រោងអនុគ្រោះពន្ធដោយអះអាងថា គឺជាវិធានការចុងក្រោយ ប្រសិនបើរាល់កិច្ចខិតខំប្រឹងប្រែងរបស់ពួកគេ ដើម្បីស្តារឡើងវិញនូវបញ្ហាសិទ្ធិមនុស្ស សិទ្ធិការងារ និងនយោបាយនៅកម្ពុជាត្រូវបរាជ័យ ។
ស្នងការពាណិជ្ជកម្មនៃ EU លោកស្រី Cecillia Malmstrom បានលើកឡើងក្នុងថ្លែងថា សហភាពអឺរ៉ុបមានមោទនភាពផ្ដល់ឲ្យប្រទេសដែលងាយរងគ្រោះបំផុតខាងសេដ្ឋកិច្ចនៅជុំវិញពិភពលោកជាមួយនឹងការទទួលបានដោយសេរីនូវការនាំចូលទំនិញចូលទៅកាន់ទីផ្សារ ។ គំនិតផ្តួចផ្ដើមនៃអ្វីៗទាំងអស់លើកលែងតែអាវុធ (Everything But Arms) មានឥទ្ធិពលជាសំខាន់ទៅលើការអភិវឌ្ឍ និងការលុបបំបាត់ភាពក្រីក្រនៅកម្ពុជា ។ ស្នងការពាណិជ្ជកម្មបញ្ជាក់ថា «ការដកប្រទេសកម្ពុជាចេញពីគ្រោងការណ៍ពាណិជ្ជកម្ម គឺជាវិធានការនៃជម្រើសចុងក្រោយ ប្រសិនជាកិច្ចខិតខំប្រឹងផ្សេងទៀតទាំងអស់របស់យើងបានបរាជ័យ ដើម្បីដោះស្រាយការព្រួយបារម្ភទាំងនេះ» ៕
ចែករំលែកព័តមាននេះ