សហរដ្ឋអាមេរិក និងអង់គ្លេស ៖ មនុស្សជាច្រើនរយនាក់កាលពីយប់ថ្ងៃទី១២ កក្កដា ២០១៨ បាននាំគ្នាធ្វើបាតុកម្មនៅទីក្រុងឡុងដ៏ ប្រឆាំងទស្សនកិច្ចរបស់ប្រធានាធិបតីអាមេរិកលោកដូណាល់ ត្រាំ នៅអង់គ្លេស។…
សហរដ្ឋអាមេរិក និងអង់គ្លេស ៖ មនុស្សជាច្រើនរយនាក់កាលពីយប់ថ្ងៃទី១២ កក្កដា ២០១៨ បាននាំគ្នាធ្វើបាតុកម្មនៅទីក្រុងឡុងដ៏ ប្រឆាំងទស្សនកិច្ចរបស់ប្រធានាធិបតីអាមេរិកលោកដូណាល់ ត្រាំ នៅអង់គ្លេស។
ពួកបាតុករប្រមូលផ្ដុំគ្នានៅមុខរបងសំណាញ់ដែកនៃ WINFIELD HOUSE ជានិវេសនដ្ឋានឯកអគ្គរដ្ឋទូតអាមេរិក ស្ថិតនៅក្នុង REGENT’S PARK ជាកន្លែងលោកត្រាំ សម្រាកយប់ដំបូងក្នុងទីក្រុងឡុងដ៍ រួមជាមួយភរិយា លោកស្រីមីឡានីញ៉ា។ ពួកបាតុករបានស្រែកពាក្យថា លោកត្រាំពុំត្រូវបានស្វាគមន៍ទេ។ រយៈពេលជិត១ម៉ោងកន្លះ ពួកបាតុករបាននាំគ្នាស្រែកខ្លាំងៗបរិហារនយោបាយអន្តោប្រវេសន៍ បរិយាកាស ឬគ្រឿងសព្វាវុធរបស់លោកត្រាំ។
ពួកគេនាំគ្នាវាយឆ្នាំង ផ្លុំកញ្ចែរ ព្រមទាំងស្រែកតាមមេក្រូ ហើយនៅលើប៉ង់កាតនានាពួកបាតុករសរសេរថា ជាមួយលោកត្រាំ តើជាទំនាក់ទំនងពិសេសមួយឬ? យើងនិយាយយ៉ាងខ្លីថា ទេ។ ចូរឈប់កុហកទៀតទៅ។ លោកត្រាំជាមនុស្សគ្រោះថ្នាក់បំផុតសម្រាប់ភពផែនដី។
មានបាតុកម្មប្រឆាំងលោកត្រាំធំប្រមូលផ្ដុំមនុស្សច្រើនសិបពាន់នាក់នាថ្ងៃទី១៣កក្កដានៅទីលាន TRAFALGAR SQUARE នៃរាជធានីអង់គ្លេស។
នាយករដ្ឋមន្ត្រីអង់គ្លេសលោកស្រី THERESA MAY នាថ្ងៃទី១២កក្កដា នាឱកាសនៃទស្សនកិច្ចរបស់លោកត្រាំ បានរៀបចំសម្រាប់ការចុះហត្ថលេខាលើកិច្ចព្រមព្រៀងពាណិជ្ជកម្មមួយជាមួយអាមេរិក ក្រោយអង់គ្លេសចាកចេញពីសហភាពអឺរ៉ុប។ លោកស្រីប៉ុនប៉ងឆ្លៀតឱកាសនៃទស្សកិច្ចដំបូងនោះរបស់លោកត្រាំនៅប្រទេសលោកស្រីដើម្បីពង្រឹងទំនាក់ទំនង ពិសេសខាងពាណិជ្ជកម្មរវាងអង់គ្លេសនិងសហរដ្ឋអាមេរិក៕
ចែករំលែកព័តមាននេះ