តាមប្រភពពី Bangkok Post បានឱ្យដឹងថា ហូលីវូដបានមកដល់ប្រទេសថៃ ដើម្បីធ្វើការសិក្សាលើការផលិតភាពយន្ត ស្តីពីការជាប់ក្នុងរូងភ្នំរបស់ក្មេងៗទាំង១៣នាក់ រយៈពេល១៨ថ្ងៃ តាំងពីនៅទីងងឹតរហូតដល់ឃើញពន្លឺថ្ងៃ ។
ស្ថាបនិកមួយរបស់ក្រុមហ៊ុនភាពយន្តអន្តរជាតិ Pure Fix Entertainment លោក Michael Scott បានមកដល់ប្រទេសថៃ ដើម្បីគិតគូរដល់ការផលិតភាពយន្ត ។ លោកជឿជាក់ថា ដំណើរតាំងពីជាប់នៅក្នុងរូងភ្នំ ដល់ពេលចេញទៅកាន់មន្ទីរពេទ្យរបស់ក្មេងៗ១២នាក់ និងគ្រូបង្វឹក គឺគ្រប់គ្រាន់ល្អហើយ សម្រាប់ការផលិតរឿង ។
លោកនិយាយតាមទូរស័ព្ទទៅកាន់សារព័ត៌មាន នៅទីក្រុងញូវយ៉កពីប្រទេសថៃ កាលពីថ្ងៃពុធថា «ពួកយើងឃើញថា វានឹងអាចក្លាយទៅជាភាពយន្តបង្ហាញការតស៊ូដ៏អស្ចារ្យ» ។ លោក Scott មានអារម្មណ៍ថាទាក់ចិត្តជាមួយនឹងហេតុការណ៍នេះយ៉ាងខ្លាំង។
ដោយសារតែលោកមានប្រពន្ធជាជនជាតិថៃ លោកបានស្នាក់នៅប្រទេសថៃមួយរយៈ ចំពេលដែលមានហេតុការណ៍នេះកើតឡើង ។ លោកមិនគិតចង់បង្កើតភាពយន្តនេះ ឱ្យទៅជាបែបអបិយជំនឿឡើយ។ ផ្ទុយទៅវិញ លោកចង់ឱ្យវាក្លាយទៅជាប្រភេទរឿងលើកទឹកចិត្តដល់មនុស្សឲ្យមានការតស៊ូ ។
លោក Scott និងមិត្តរួមការងាររបស់លោក ឈ្មោះ Adam Smith កំពុងតែធ្វើដំណើរជុំវិញតំបន់រូងភ្នំនោះ ដើម្បីគិតគូរពីការរើសតួ ។ គេនៅមិនទាន់បានធ្វើការស្នើសុំទៅកាន់ម្តាយឪពុករបស់ក្មេងៗនៅឡើយទេ ដោយសារតែពេលនេះ ពួកគាត់កំពុងនៅមន្ទីរពេទ្យ ។
ចែករំលែកព័តមាននេះ