ខេត្តបាត់ដំបង ៖ សមត្ថកិច្ចបានរាយការណ៍ថា គ្រាន់តែរយៈពេលកន្លះម៉ោងសោះ ក្រុមចោរបានបណ្ដាក់គ្នាបន្លំកាច់សោ.កលួចយកម៉ូតូអស់ចំនួន២គ្រឿងទាំងព្រលឹមអុល រួចជិះគេចខ្លួនដោយសុវត្ថិភាព នៅព្រឹកថ្ងៃទី១៣ កក្កដា នេះ ដែលម្ចាស់មានការធ្វេសប្រហែសទុកម៉ុតូចោល នៅក្នុងផ្សារស្រុកមោងប្ញស្សី ។
សមត្ថកិច្ចបានឱ្យដឹងថា ករណីទី១ បានកើតឡើងនៅម៉ោងប្រមាណ០៦ និង៥០នាទីព្រឹកថ្ងៃ១៣ កក្កដា នៅត្រង់ចំណុចផ្សារតាលាស់ ស្ថិតក្នុងភូមិចុងប្រឡាយ ឃំុតាលាស់ ស្រុកមោងឫស្សី ដែលបង្កឡើងដោយជនមិនស្គាល់អត្តសញ្ញាណម្នាក់ បានធ្វើសកម្មភាពលួចយកម៉ូតូ០១គ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ បាត់ដំបង 1AA-4344 ម្ចាស់ឈ្មោះជា នឹប ភេទស្រី អាយុ៥៣ឆ្នាំ រស់នៅភូមិស្ទឹងថ្មី ឃំុតាលាស់ ។ ប្រភពដដែលបន្តថា ម្ចាស់ម៉ូតូបានជិះទៅផ្សារឈប់ទុកចោលមិនផ្ញើគេទេ រួចដើចូលរកទិញម្ហូបក្នុងផ្សារ លុះចេញមករកម៉ូតូវិញ ស្រាប់តែបាត់ម៉ូតូបង្កឲ្យមានការភ្ញាក់ផ្អើលពេញផ្សារតែម្ដង ។
រីឯករណីទី២ ខណៈសមត្ថកិច្ចមិនទាន់ទទូលបានព័ត៌មានករណីទី១ផង ស្រាប់តែនៅចំណុចផ្សារកូនខ្លុង ស្ថិតក្នុងភូមិព្រៃដំរី ឃុំព្រៃតូច ស្រុកមោងប្ញស្សីដដែល ក៏មានការភ្ញាក់ផ្អើលឆោឡោឡើងទៀតថា មានជនមិនស្គាល់មុខ បានបន្លំកាច់សោ.កលួចយកម៉ូតូ០១គ្រឿងដែរ រួចជិះគេចខ្លួនបានដោយសុវត្ថិភាព ។ បើតាមសេចក្ដីរាយការណ៍បានឱ្យដឹងថា ករណីទី២ នេះបានកើតឡើង នៅម៉ោងប្រមាណ០៧ និង២០នាទីព្រឹកថ្ងៃដដែល គឺមុននិងក្រោយគ្នាតែកន្លះម៉ោងប៉ុណ្ណោះ ។ ម៉ូតូដែលត្រូវចោលួចលើកទី២នេះ ម៉ាកហុងដាឌ្រីម សេ១២៥ពណ៌ខ្មៅ សេរី២០១៦ ពាក់ស្លាកលេខ បាត់ដំបង 7686 របស់ឈ្មោះជឿន សុផល ភេទស្រី អាយុ៤០ឆ្នាំ រស់នៅ ភូមិព្រៃដំរី ឃំុព្រៃតូច ។ ម៉ូតូនេះ បានបាត់នៅពេលម្ចាស់ទុកនៅខាងផ្សារមិនបានផ្ញើគេ រួចដើរចូលផ្សារទិញម្ហូប លុះចេញពីផ្សារវិញក៏បាត់ម៉ូតូ ហើយផ្អើលឆោឡោតែម្ដង ។
ជុំវិញករណីបាត់ម៉ូតូចំនួន២លើកផ្ទូនៗត្រឹមរយៈពេលកន្លះម៉ោងនេះ សមត្ថកិច្ចបានសន្និដ្ឋានជាបឋមថា ជនប្រព្រឹត្ត អាចជាក្រុមតែមួយ ហើយក្រុមនេះអាចមានខ្សែបណ្ដោយដឹកតាមមធ្យោបាយអ្វីមួយយកទៅទម្លាក់តាមទីប្រជុំជន (ផ្សារ) ដើម្បីប្រព្រឹត្តបទល្មើសតែម្ដង ។
មានការកត់សម្គាល់ដែរថា ក្នុងមួយរយៈពេលចុងក្រោយនេះ ក្រុមចោរសកម្មខាងកាច់សោ.កលួចម៉ូតូ ហាក់បាននិងកំពុងធ្វើសកម្មភាពខ្លាំង នៅតាមបណ្ដាស្រុកមួយចំនួន ខណ:នៅក្នុងក្រុងបាត់ដំបង ហាក់មានភាពស្ងប់ស្ងាត់បន្តិច ។ សកម្មភាពកាន់តែគគ្លើនរបស់ក្រុមជនទុច្ចរិតនេះ កំពុងធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំង អំពីសន្តិសុខនៅតាមមូលដ្ឋាន ខណ:សមត្ថកិច្ចហាក់មិនទាន់អាចគ្រប់គ្រង និង បង្ក្រាបបាននូវមុខសញ្ញាជនដៃដល់ទាំងនេះ ។
ដូច្នេះវិធីសាស្ត្រដ៏ល្អបំផុត គឺមានតែប្រជាពលរដ្ឋ ឬម្ចាស់ទ្រព្យសម្បត្តិខ្លួនឯងទេ ដែលត្រូវប្រុងប្រយ័ត្ន កុំឱ្យធ្វេសប្រហែស ចៀសវាងការបាត់បង់ដោយយថាហេតុ ។
ចែករំលែកព័តមាននេះ