ខេត្តកំពង់ឆ្នាំង ៖ មន្ត្រីជំនាញខេត្តបានឲ្យដឹងថា នៅឆ្នាំនេះ ការបង្កបង្កើនផលស្រូវវស្សារបស់បងប្អូនកសិករ បានចាប់ផ្ដើមលឿនជាងឆ្នាំមុន និងពង្រីកផ្ទៃដីដាំដុះកើនឡើង ដោយសារភ្លៀងធ្លាក់ពីដើមរដូវ និងទឹកគ្រប់គ្រាន់ ។ ទន្ទឹមនឹងកំណើននៃការដាំដុះនេះ មន្ត្រីជំនាញក៏បានអំពាវនាវដល់បងប្អូនត្រូវថែទាំជាប្រចាំ ដើម្បីទទួលបានទិន្នផលខ្ពស់ ។
ក្នុងកិច្ចសម្ភាសន៍ជាមួយកោះសន្ដិភាព កាលពីថ្ងៃទី១០ កក្កដា កន្លងទៅ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា បច្ចុប្បន្ន ការបង្កបង្កើនផលស្រូវវស្សាបានប្រមាណជាង១១ម៉ឺនហិកតា លើផែនការជាង១២ម៉ឺនហិកតា គឺស្មើនឹង៩០%នៃផែនការ ដែលតួលេខនេះ គឺល្អប្រសើរបំផុតលើសបណ្តាឆ្នាំមុនៗ ។ ដោយឡែក សម្រាប់ដំណាំរួមផ្សំវិញ មកដល់ពេលនេះ គឺដាំដុះបានជាង៤ពាន់ហិកតា លើផែនការជាង៨ពាន់ហិកតា គឺស្មើនឹងប្រមាណ៥០%នៃផែនការ ។ លោកបន្ដថា ៖« បើទោះបីជាដំណាំស្រូវបង្កបង្កើនផលបានច្រើន និងលឿនជាងឆ្នាំកន្លងទៅក្តី ប៉ុន្តែខ្ញុំសូមអំពាវនាវឲ្យប្រជាកសិករទូទាំងខេត្ត ត្រូវការពារ និងថែទាំដំណាំស្រូវរបស់ខ្លួនជាប្រចាំ ដោយដាក់ជី និងទប់ទឹកទុកក្នុងស្រែមិនឲ្យហូរចេញ រហូតដល់ពេលច្រូតកាត់ទទួលផល ។ ជាមួយគ្នានេះ ត្រូវតាមដានសភាពការណ៍ដំណាំស្រូវរបស់ខ្លួន បើសិនជាមានសត្វចង្រៃ ឬជំងឺរាតត្បាតផ្សេងៗ សូមរាយការណ៍ជាបន្ទាន់ទៅកាន់ភ្នាក់ងារកសិកម្មភូមិ-ស្រុក ដើម្បីរាយការណ៍បន្តមកមន្ទីរកសិកម្មខេត្ត នឹងចុះជួយអន្តរាគមន៍ឲ្យបានទាន់ពេលវេលា » ។ លោកប្រធានមន្ទីរកសិកម្មបញ្ជាក់ថា សម្រាប់តុល្យភាពស្បៀងកាលពីឆ្នាំ២០១៧ ខេត្តកំពង់ឆ្នាំងនៅសល់ស្រូវនាំចេញជាង៣០ម៉ឺនតោន ហើយរំពឹងថា នៅឆ្នាំ២០១៨នេះ នឹងអាចសល់ស្រូវនាំចេញប្រមាណជាង៣៥ម៉ឺនតោនផងដែរ ។
ដោយឡែក ការចិញ្ចឹមសត្វវិញ គិតមកត្រឹមពេលនេះ ខេត្តកំពង់ឆ្នាំងមានកសិដ្ឋានចិញ្ចឹមសត្វប្រមាណ១៣៨កសិដ្ឋាន ក្នុងនោះមានការចិញ្ចឹមមាន់, ទា, ជ្រូក និងគោ ក្របី ជាដើម ។ លោកមានប្រសាសន៍ថា ៖« បើគិតពីបរិមាណសត្វស្លាប(មាន់ ទា)មានប្រមាណជាង២លានក្បាល, ជ្រូកប្រមាណ៣០ម៉ឺនក្បាល និងគោ-ក្របីប្រមាណជាង២០ម៉ឺនក្បាល ។ ជាមួយគ្នានេះ នៅក្នុងឆ្នាំ២០១៨ យើងបានបញ្ជូនកសិករគំរូផ្នែកចិញ្ចឹមគោ ទៅប្រឡងប្រណាំងថ្នាក់ជាតិ បានជាប់ចំណាត់ថ្នាក់លេខ១ផងដែរ។ ចំណែកបទល្មើសព្រៃឈើ និងវិស័យជលផលវិញ គឺមិនសូវសម្បូរប៉ុន្មានទេ ដោយសារខែនេះជារដូវបិទការនេសាទ » ៕
ចែករំលែកព័តមាននេះ