រាជធានីភ្នំពេញ ៖ លោកស្រី Belenda ប្រធានគម្រោងទឹកស្អាតនិងអនាម័យរបស់អង្គការ Unicef បានឲ្យដឹងថា នៅក្នុងប្រទេសកម្ពុជា មានសាលារៀនជាង១ម៉ឺនខ្នង និងមានសិស្សជាង៣លាននាក់ ក្នុងនោះ៤៤%នៃសាលារៀនទាំងនោះមិនមានបណ្តាញទឹកនោះទេ ហើយ៣១% មិនទាន់មានបង្គន់អនាម័យប្រើប្រាស់នៅឡើយ។
លោកស្រីបានមានប្រសាសន៍ដូច្នេះក្នុងសិក្ខាសាលាស្តីពីការផ្សព្វផ្សាយបទពិសោធន៍ គម្រោងសុខភាព និងអនាម័យសាលា ដែលបានរៀបចំធ្វើនៅថ្ងៃទី២០ មីនា ២០១៣ នៅសណ្ឋាគារឡឺរូយ៉ាល់។
លោកស្រី Belenda បានបញ្ជាក់ថា បើទោះបីជាសាលារៀនជាច្រើនមានបង្គន់និងបណ្តាញទឹកប្រើប្រាស់ក៏ដោយ ក៏បង្គន់ទាំងនោះមានភាពកខ្វក់ ឬមិនដំណើរការ។ បន្ថែមលើនេះទៀត ទឹកសម្អុយដែលចេញពីសាលារៀនត្រូវបានបង្ហូរចេញទៅក្រៅដែលអាចបំពុលបរិស្ថាន ហើយសម្ភារប្រើប្រាស់មិនមានអនាម័យអាចធ្វើឲ្យកុមារឆ្លងមេរោគបាន។ កត្តាទាំងនេះអាចបណ្តាលឲ្យប៉ះពាល់ដល់សុខភាពកុមារ និងការមករៀនមិនទៀងទាត់ដែលអាចជះឥទ្ធិពលអវិជ្ជមានលើការសិក្សារបស់ពួកគេ៕
ចែករំលែកព័តមាននេះ