ខេត្តបាត់ដំបង ៖ លោកវ៉ាន់ កុល និងអ្នកស្រីហ៊ុង សុខា ដែលជាឪពុក ម្ដាយធំរបស់នាងគន្ធា ដែលរងទារុណកម្មដ៏ឃោរឃៅក្រោមស្នាដៃភរិយាលោកឧកញ៉ាម្នាក់ដូចទាសករដាច់ថ្លៃនៅរាជធានីភ្នំពេញនោះ បានផ្ដល់បទសម្ភាសន៍ជាច្រើនម៉ោងជាមួយកោះសន្តិភាពកាលពីរសៀលថ្ងៃទី១៩ មីនា ២០១៣ ថា គ្រួសារលោកសូមសំណូមពរដល់ស្ថាប័នពាក់ព័ន្ធ និងតុលាការមេត្តាជួយពន្លឿនចាត់វិធានការលើសំណុំរឿងក្មួយស្រីគាត់ជាមួយគ្រួសារលោកឧកញ៉ានោះ ឲ្យបានឆាប់ ខណៈមានមនុស្សមួយចំនួន ដែលលោកសង្ស័យថា ជាដៃជើងរបស់គ្រួសារលោកឧកញ៉ានេះ បានព្យាយាមទូរស័ព្ទមកលួងលោមផង គំរាមផង ដល់គ្រួសារលោកមួយថ្ងៃៗស្ទើររាប់ភ្លេច ដើម្បីបង្ខំឲ្យលោកដកពាក្យបណ្ដឹងប្រឆាំងនឹងគ្រួសារឧកញ៉ានោះជាថ្នូរ និងការយល់ព្រមបង់សំណង។
លោកវ៉ាន់ កុល អាយុ៦២ឆ្នាំ និងអ្នកស្រី ហ៊ុង សុខា អាយុ៥១ឆ្នាំជាភរិយា និងជាឪពុកម្ដាយធំរបស់នាងសង់ គន្ធា អាយុ១៧ឆ្នាំ ដែលរងការធ្វើទារុណកម្មទាំងផ្លូវកាយទាំងផ្លូវចិត្ត ជាមួយនឹងនាងផល្លី អាយុ១៧ឆ្នាំដែរ ពីសំណាក់លោកជំទាវឈ្មោះ លី ពៅ ភរិយាលោកឧកញ៉ា វ៉េង លីតិចឡា។ លោកវ៉ាន់ កុល និងភរិយាបានរៀបរាប់អំពីសកម្មភាពនានា ក្រោយពីក្មួយស្រីគាត់រត់ចេញពីភូមិគ្រឹះរបស់លោកឧកញ៉ា វ៉េង លីតិចឡា និងភរិយាឈ្មោះលី ពៅ និងបន្ទាប់ពីសមត្ថកិច្ចចាត់ការលើករណីនេះ។ លោកថា មួយរយៈនេះមានស្រ្តី២នាក់ ដែលលោកសង្ស័យថា ជាដៃជើងរបស់គ្រួសារលោកឧកញ៉ា វ៉េង លីតិចឡា តែងទូរស័ព្ទមកលួងលោម សុំឲ្យលោកដកពាក្យបណ្ដឹងជាថ្នូរនិងការបង់សំណង ប៉ុន្តែជាមួយនឹងការលួងលោមពួកគេក៏តែងគំរាមតាមទូរស័ព្ទដែរ អំពីគ្រួសារលោកឧកញ៉ានោះនឹងប្ដឹងបកវិញបើមិនព្រមដកបណ្ដឹង ជាពិសេសប៉ុន្មានថ្ងៃចុងក្រោយនេះតែម្ដង ៕
ចែករំលែកព័តមាននេះ