រាជធានីភ្នំពេញ ៖ បុរសចំណាស់ម្នាក់ជាមនុស្សវិកលចរិតទៅលួចបើកទ្វារផ្ទះប្រជាពលរដ្ឋខាងក្រោយ រួចងូតទឹកសើមខោអាវជោគកក្លាក់ ហើយចូលសង្ងំក្នុងផ្ទះធ្វើមិនដឹង ខណៈដែលម្ចាស់មិននៅ ក្រោយពីប្រទះឃើញនឹកស្មានតែចោរចូលប៉ុនប៉ងលួចទ្រព្យសម្បត្តិ ក៏ប្តឹងប៉ូលិស ទៅអន្តរាគមន៍ចាប់ឃាត់ទើបដឹងថា ជាមនុស្សវិកលចរិត ។ ហេតុការណ៍ខាងលើកើតឡើងកាលពីវេលាម៉ោង៧និង៤០នាទីយប់ថ្ងៃទី១២ ខែកក្កដា ឆ្នាំ២០១៨ ស្ថិតនៅផ្ទះល្វែង ក្នុងបុរីធូលន ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិសែនជ័យ ។
បុរសខាងលើសូម្បីតែឈ្មោះ អាយុ ខ្លួនឯងក៏មិនស្គាល់មិនដឹងផងនោះ មានអាយុជាង៤០ឆ្នាំ គ្រាន់តែប្រាប់ថា ស្នាក់នៅវត្តអង្គតាមិញ ។
តាមស្ត្រីជាម្ចាស់ផ្ទះបានឲ្យដឹងថា មុនកើតហេតុគាត់ចាក់សោទ្វារខាងមុខ ចំណែកទ្វារក្រោយ គ្រាន់តែដាក់គន្លឹះ ហើយចាកចេញទៅបង្រៀនបាត់ លុះនៅវេលាម៉ោងខាងលើញាតិក្បែរខាងទូរស័ព្ទប្រាប់ថា មានចោរចូលផ្ទះទើបប្រញាប់ប្រញាល់មក ហើយប្រទះឃើញបុរសខាងលើ អង្គុយកៀនទូធ្វើមិនដឹង ដោយមិនស្គាល់ នឹកស្មានតែចោរចូលលួចទ្រព្យសម្បត្តិ ខ្ទប់ទ្វារចងជាប់រត់ទៅប្តឹងប៉ូលិសឲ្យជួយអន្តរាគមន៍ ចាប់ឃាត់នាំចេញមកក្រៅត្រូវបានពលរដ្ឋមួយចំនួនដែលគេស្គាល់ថា ជាមនុស្សវិកលចរិតទេ ។
ទោះជាយ៉ាងណាក្តីនាំយកទៅសាកសួរនៅប៉ុស្តិ៍ទើបដឹងជាក់ថា ជាមនុស្សមានសតិមិនប្រក្រតី រួមជាមួយពលរដ្ឋច្រើននាក់ដែលគេធ្លាប់ស្គាល់បុរសខាងលើជាមនុស្សវិកលចរិតទើបសមត្ថកិច្ចអនុញ្ញាតឲ្យវិលត្រឡប់ទៅវិញ ខណៈដែលម្ចាស់ផ្ទះខាងលើក៏មិនបាត់បង់អ្វីដែរ ហើយក៏មិនប្តឹងផ្តល់ដោយឃើញសភាពជាក់ស្តែងមែន ៕
ចែករំលែកព័តមាននេះ