ប្រទេសថៃ ៖ កុមារមួយចំនួនក្នុងចំណោមកុមារ១២នាក់ដែលជាប់ក្នុងរូងភ្នំថាំលួង ពេលនាំចេញមួយចំនួនបានដេកលក់លើប្រង់កា ក្នុងប្រតិបត្តិការសង្គ្រោះពួកគេចេញយ៉ាងលំបាក តែទទួលបានជោគជ័យនាំឲ្យមានក្ដីរីករាយខ្លាំងបំផុតក្នុងប្រទេស។
វីដេអូមួយបានផ្សាយដោយអាជ្ញាធរ បង្ហាញថា ពួកគេហាក់មានសុខភាពល្អនៅមន្ទីរពេទ្យដែលបញ្ជូនពួកគេទៅក្រោយនាំចេញពីរូងភ្នំ។ អាជ្ញាធរថៃរយៈពេលយ៉ាងយូរបង្ហាញតិចតួចបំផុត ពីការប្រព្រឹត្តទៅនៃប្រតិបត្តិការនាំកុមារ១២នាក់ និងគ្រូបង្វឹកបាល់ទាត់ពួកគេចេញពីរូងភ្នំ។
ហើយនាថ្ងៃទី១១ កក្កដា កងម៉ារីនថៃ បានចេញផ្សាយវីដេអូថ្មីមួយពីការជួយសង្គ្រោះ។រូបភាពវីដេអូនេះ បង្ហាញកុមារៗខ្លះហាក់ដេកលក់ ហើយមួយចំនួនឃើញកម្រើកដៃ ពេលនាំចេញពីរូងដាក់លើប្រង់កា។ តាមផ្លូវនាំពួកគេចេញមានក្រុមគ្រូពេទ្យតាមត្រួតពិនិត្យជីពចរជាប់។
ប្រមុខរបបយោធាថៃលោកប្រាយុទ្ធ ចាន់អូចា នាថ្ងៃទី១០ កក្កដា បានអះអាងថា ពួកអ្នកជួយសង្គ្រោះបានផ្ដល់ថ្នាំសម្រួលអារម្មណ៍ស្រាលដល់កុមារទាំងនេះ ចៀសវាងកុំឲ្យពួកគេតក់ស្លុត ប៉ុន្តែពុំផ្ដល់ថ្នាំដេកលក់ឡើយ។ ហើយមានព័ត៌មាននានានិយាយហេតុអីពួកគេអាចនាំចេញពីរូងបានឆាប់បែបនេះ ខណៈពួកអ្នកជួយសង្គ្រោះគិតថា អាចប្រើពេលច្រើនថ្ងៃដល់ច្រើនសប្ដាហ៍នោះ។ គួរឲ្យស្ដាយអ្នកមុជទឹកមានបទពិសោធន៍ម្នាក់បានត្រូវស្លាប់។
ការជួយសង្គ្រោះអស្ចារ្យមួយធ្វើបានទាន់ពេលវេលា។ ថ្ងៃទី១០ កក្កដា ពេលពួកអ្នកជួយសង្គ្រោះចុងក្រោយចេញផុតពីរូង ហើយគេឈប់បូមទឹកក្នុងរូងភ្នំមានទឹកឡើងវិញភ្លាមៗលិចរូង លែងអាចដើរកាត់បានកន្លែងខ្លះដូចមុនទៀត។ អ្នកមុជទឹកប្រមាណជា២០នាក់ដែលស្ថិតក្នុងរូង អាចចេញផុតទាន់ពេលមុនទឹកលិចជាថ្មី។
ហើយគ្រូបាល់ទាត់ និងកុមារ៣នាក់ជាជនគ្មានប្រទេស
លោក EKKAPOL CHANTAWONG គ្រូបង្វឹកបាល់ទាត់ជាមនុស្សពេញវ័យម្នាក់គត់ នៅជាមួយកុមារទាំង១២នាក់ជាប់ក្នុងរូងភ្នំក្លាយជាមនុស្សល្បី ទទួលងារជាវីរបុរសជាតិ។
តាមពិតទៅរូបគេ និងកុមារ៣នាក់ដែលជាប់ក្នុងរូងភ្នំជាមនុស្សគ្មានប្រទេស។ ហើយកុមារ៣នាក់ និងបុរសនេះពុំមែនជាជនជាតិថៃ តែជាអ្នកគ្មានប្រទេស និងជាករណីពិសេសមួយនៅថៃ។
យោងតាមស្នងការជាន់ខ្ពស់ អ.ស.ប ខាងជនភៀសខ្លួនថា គេរាប់ឃើញជនគ្មានប្រទេស៤០០០០០នាក់នៅថៃ។ ប្រភពខ្លះទៀតថា មានច្រើនជាងនេះ ជិតដល់៣,៥លាននាក់ឯណោះ គឺប្រមាណជា៥% នៃប្រជាជនថៃ។ ពួកជនគ្មានប្រទេសទាំងនេះភាគច្រើន ស្ថិតនៅភាគខាងជើងថៃជាប់ព្រំដែនមីយ៉ាន់ម៉ា។ មានហេតុផលច្រើនពន្យល់ពីអវត្តមាននៃសញ្ជាតិរបស់ពួកគេ ដូចជាកើតពីឪពុកម្ដាយគ្មានប្រទេស ឬកើតក្នុងបណ្ដាភូមិនៅមីយ៉ាន់ម៉ា និងពុំមែនក្នុងមន្ទីរពេទ្យ៕
ចែករំលែកព័តមាននេះ