ខេត្តបាត់ដំបង៖ ដោយសារភ្លៀងធ្លាក់ជោកជាំជាបន្តបន្ទាប់ នៅប៉ែកខាងលើនៃដងស្ទឹងសង្កែ នាប៉ុន្មានថ្ងៃកន្លងទៅនេះ ជាពិសេសនៅតំបន់ព្រំដែនខ្មែរ-ថៃ នៅតំបន់ស្រុកសំឡូត បានធ្វើឱ្យទឹកស្ទឹងសង្កែឡើងកម្ពស់ជាង១២ម៉ែត្រហើយបើគិតត្រឹមម៉ោង៩ព្រឹកថ្ងៃទី១២ កក្កដា នេះ ដែលមន្ត្រីជំនាញអាចចាត់ទុកថា…
ខេត្តបាត់ដំបង៖ ដោយសារភ្លៀងធ្លាក់ជោកជាំជាបន្តបន្ទាប់ នៅប៉ែកខាងលើនៃដងស្ទឹងសង្កែ នាប៉ុន្មានថ្ងៃកន្លងទៅនេះ ជាពិសេសនៅតំបន់ព្រំដែនខ្មែរ-ថៃ នៅតំបន់ស្រុកសំឡូត បានធ្វើឱ្យទឹកស្ទឹងសង្កែឡើងកម្ពស់ជាង១២ម៉ែត្រហើយបើគិតត្រឹមម៉ោង៩ព្រឹកថ្ងៃទី១២ កក្កដា នេះ ដែលមន្ត្រីជំនាញអាចចាត់ទុកថា នេះជាសញ្ញាអាសន្នមួយ ដែលពលរដ្ឋរស់នៅតាមដងស្ទឹងសង្កែ គួរតែមានការប្រុងប្រយ័ត្ន ។
មន្ត្រីជំនាញធនធាន និងឧតុនិយមខេត្ត ដែលបានចុះតាមដានកម្ពស់ទឹកស្ទឹងសង្កែជាប្រចាំបាននិយាយថា នៅព្រឹកថ្ងៃទី១២ កក្កដា នេះ ទឹកស្ទឹងសង្កែបានឡើងកម្ពស់ដល់ទៅជាង១២ម៉ែត្រហើយ។ នេះជាការផ្ដល់សញ្ញាអាសន្នជាបឋមមួយដល់ប្រជាពលរដ្ឋដែលរស់នៅតាមដងស្ទឹងសង្កែ ឱ្យមានការប្រុងប្រយ័ត្ន ។ ជាពិសេសប្រជាពលរដ្ឋ ដែលរស់នៅប៉ែកខាងក្រោមៗនៃដងស្ទឹងសង្កែ(ស្រុកឯកភ្នំ)។
មន្ត្រីរូបនេះបានប្រាប់ថា ទឹកស្ទឹងសង្កែនឹងឡើងកាន់តែខ្លាំងជាងនេះទៀត ប្រសិនបើប៉ែកខាងលើ នៃដងស្ទឹងនេះនៅតែបន្តមានភ្លៀងធ្លាក់។ ជាពិសេសនៅតំបន់ស្រុករតនមណ្ឌល ស្រុកបាណន់ ឬនៅតំបន់ព្រំដែនខ្មែរ,ថៃ នៅស្រុកសំឡូត៘
កាលពីថ្ងៃទី១១ កក្កដា ក្រសួងធនធាន និងឧតុនិយម បានឲ្យដឹងតាមរយះៈបណ្ដាញសង្គមរបស់ខ្លួន ពាក់ព័ន្ធនឹងកម្ពស់ទឹកស្ទឹងសង្កែនេះដែរថា បរិមាណទឹកភ្លៀង ដែលបានធ្លាក់ជាបន្តបន្ទាប់នៅតំបន់ព្រំដែនកម្ពុជា,ថៃ ក្នុងភូមិសាស្ត្រស្រុកសំឡូត ខេត្តបាត់ដំបង បានធ្វើឲ្យទឹកនៅក្នុងអាងពហុបំណង ដែលស្ថិតនៅស្រុករតនមណ្ឌល កើនឡើងយ៉ាងគំហុកនៅថ្ងៃទី១១ កក្កដា នេះ ។ ដោយសារតែកម្ពស់ទឹកនៅអាងពហុបំណងឡើងកាន់តែខ្លាំង មន្ទីរធនធានទឹកនិងឧតុនិយមខេត្ត បានសហការជាមួយក្រុមហ៊ុនសាងសង់របស់ចិន ធ្វើការបើកទ្វារទឹកទាំង៧ប្រឡោះ ដើម្បីរំដោះទឹកមួយផ្នែកតាមដងស្ទឹងសង្កែ ទៅកាន់ប្រព័ន្ធធារាសាស្ត្រ
«កង្ហត» នៅក្នុងស្រុកបាណន់ សម្រាប់ផ្គត់ផ្គង់បន្តដល់ការបង្កបង្កើនផលរបស់កសិករ និងមួយផ្នែកទៀតទម្លាក់តាមដងស្ទឹងសង្កែ សម្រាប់ផ្គត់ផ្គង់ដល់ការប្រើប្រាសរបស់ប្រជាពលរដ្ឋនៅផ្នែកាងក្រោម។
ជាមួយនឹងជំនន់ទឹកភ្លៀងតាមដងស្ទឹងសង្កែនេះដែរ បើតាមប្រភពព័ត៌មានពីស្រុកសំឡូតបានឲ្យដឹងដែរថា អាកាសធាតុនៅស្រុកសំឡូត នាព្រឹកថ្ងៃទី១២កក្កដានេះ នៅតែបន្តអ័ព្វអ៊ួរនៅឡើយ តែមិនទាន់មានតំណក់ទឹកភ្លៀងទេ ។
ចែករំលែកព័តមាននេះ