រាជធានីភ្នំពេញ ៖ កំណើនសេដ្ឋកិច្ចជាតិរឹងមាំជាច្រើនឆ្នាំកន្លងទៅនេះ បានបែងចែកផ្លែផ្កាដល់ប្រជាពលរដ្ឋក្នុងការរកទទួលទាន បង្កើតប្រាក់ចំណូល និងមានជីវភាពធូរធារគួរឲ្យកត់សម្គាល់ ។ កត្តាទាំងនេះ បានធ្វើឲ្យតម្រូវការប្រើប្រាស់ផលិតផល និងសម្ភារនានា មានការកើនឡើងខ្ពស់ផងដែរ ។ ជាក់ស្ដែង បើមើលពីវិស័យយានយន្ដ គិតត្រឹមដំណាច់ខែមិថុនាឆ្នាំនេះ ចំនួនយានយន្តគ្រប់ប្រភេទនៅក្នុងរាជធានីភ្នំពេញ បានកើនឡើងដល់ជាង២លាន១សែន៩ម៉ឺនគ្រឿង ដែលជាចំនួនមួយដ៏ច្រើន ។ នេះបើតាមរបាយការណ៍របស់មន្ទីរសាធារណការ និងដឹកជញ្ជូនរាជធានីភ្នំពេញ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានមានប្រសាសន៍ថា កំណើនយានយន្តនៅក្នុងរាជធានីភ្នំពេញក្នុងរយៈពេលខ្លីកន្លងមកនេះ វាបានបង្ហាញពីកំណើនសេដ្ឋកិច្ចប្រទេសកម្ពុជា និងកំណើនប្រាក់ចំណូលរបស់ប្រជាពលរដ្ឋ ដែលធ្វើឲ្យប្រជាពលរដ្ឋមានលទ្ធភាពទិញយានយន្តប្រើប្រាស់ផ្ទាល់ខ្លួន ។ ជាក់ស្ដែង ក្នុង១គ្រួសារ អាចមានម៉ូតូម្នាក់១គ្រឿងបាត់ទៅហើយ ។
លោកប្រធានមន្ទីរបានថ្លែងបញ្ជាក់កាលពីព្រឹកថ្ងៃទី១១ កក្កដា ថា ៖« បច្ចុប្បន្ននេះ ចំនួនរថយន្តគ្រប់ប្រភេទ ដែលបានចុះបញ្ជីនៅមន្ទីរសាធារណការ និងដឹកជញ្ជូនរាជធានីភ្នំពេញ មានចំនួនជាង៤៨ម៉ឺនគ្រឿង, ម៉ូតូចំនួន១លាន៧០ម៉ឺនគ្រឿង និងរ៉ឺម៉កកង់បី មានចំនួន១ម៉ឺន១ពាន់គ្រឿង » ។
លោកបន្តថា ក្នុងរយៈពេល១មួយឆ្នាំកន្លងមកនេះ កំណើនរថយន្តដែលបានចុះបញ្ជីប្រើប្រាស់នៅក្នុងរាជធានីភ្នំពេញ បានកើនឡើងទ្វេដង ។ ជាក់ស្ដែង កាលពីចុងឆ្នាំ២០១៦ ចំនួនរថយន្តដែលចុះបញ្ជី មានតែជាង៤០ម៉ឺនគ្រឿងប៉ុណ្ណោះ ខណៈម៉ូតូមាន១លាន៤សែនគ្រឿង ។ លោកថា ៖« យានយន្តទាំងអស់ គឺបានចុះបញ្ជីរួចរាល់អស់ហើយ លើកលែងតែរ៉ឺម៉កកង់បីប្រមាណតែជាង១០%ទៀត ដែលមិនទាន់បានមកចុះបញ្ជី » ។
នាយកគ្រប់គ្រងក្រុមហ៊ុននាំចូល និងចែកចាយរថយន្តម៉ាក Chevrolet នៅកម្ពុជា បានឲ្យដឹងថា ការលក់រថយន្តនៅតែមានកំណើនជាបន្តបន្ទាប់ បើទោះបីជាឆ្នាំនេះ រាជរដ្ឋាភិបាលដំឡើងពន្ធ និងជាឆ្នាំបោះឆ្នោតក៏ដោយ ។
លោក ប៉ែន ពិសិដ្ឋ នាយកគ្រប់គ្រងរូបនេះបាននិយាយថា ៖« អ្នកទិញរថយន្តនៅតែទិញ ស្របពេលប្រាក់ចំណូលរបស់ពួកគាត់បានកើនឡើង ក៏ប៉ុន្តែកត្តាដំឡើងពន្ធ បានធ្វើឲ្យរថយន្តឡើងថ្លៃ ហើយក៏ជាកត្តាមួយធ្វើឲ្យអតិថិជនស្រងាកចិត្តបន្តិចដែរ »។ លោកបន្ដថា ៖ «បើសិនជាពន្ធមិនឡើងថ្លៃទេ កំណើនលក់រថយន្តថ្មី នឹងកាន់តែច្រើនថែមទៀត »។
ចំណែកក្រុមហ៊ុនផលិតម៉ូតូហុងដា ក៏បានបង្ហាញតួលេខផងដែរថា ក្នុង១ឆ្នាំ ក្រុមហ៊ុនរបស់ខ្លួនបានដំឡើងម៉ូតូប្រមាណ៣០ម៉ឺនគ្រឿង ក្នុងនោះ មួយថ្ងៃ ក្រុមហ៊ុននេះអាចដំឡើងបានរហូតដល់១.២០០គ្រឿង ដើម្បីផ្គត់ផ្គង់លើទីផ្សារដែលកំពុងមានតម្រូវការខ្ពស់ ។
យោងតាមរបាយការណ៍របស់ក្រសួងសាធារណការ និងដឹកជញ្ជូន បានបង្ហាញថា ចំនួនយានយន្តនៅទូទាំងប្រទេសកម្ពុជា បានកើនឡើងគួរឱ្យកត់សម្គាល់ក្នុងប៉ុន្មានឆ្នាំចុងក្រោយនេះ គឺបន្ទាប់ពីកំណើនសេដ្ឋកិច្ចរបស់ប្រទេសបានរីកលូតលាស់ប្រមាណ៧%ក្នុង១ឆ្នាំ ដែលបច្ចុប្បន្ន រថយន្តនៅក្នុងប្រទេសកម្ពុជា មានចំនួនជិត១លានគ្រឿង និងម៉ូតូប្រមាណជាង៦លានគ្រឿង ៕
ចែករំលែកព័តមាននេះ