រាជធានីភ្នំពេញ ៖ ជនជាតិម៉ាឡេស៊ី៤នាក់ត្រូវបានជនសង្ស័យ២នាក់ធ្វើសកម្មភាពឆក់កាបូបស្ពាយ តែមិនបានសម្រេចហើយរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី១១ ខែកក្កដា ឆ្នាំ២០១៨ តាមបណ្តោយផ្លូវ៥១ នៅចំណុចមុខផ្ទះសំណាក់មួយកន្លែង ស្ថិតនៅក្នុងសង្កាត់ផ្សារថ្មី២ ខណ្ឌដូនពេញ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញជនជាតិម៉ាឡេស៊ី៤នាក់កំពុងតែដើរតាមបណ្តោយផ្លូវ៥១ ក្នុងទិសដៅពីត្បូងទៅជើង ពេលដើរមកដល់ចំណុចកើតហេតុខាងលើនេះ ក៏ស្រាប់តែលេចមុខជនសង្ស័យ២នាក់មិនស្គាល់អត្តសញ្ញាណជិះម៉ូតូមិនស្គាល់ម៉ាកបានជិះទៅជិតជនជាតិម៉ាឡេស៊ីទាំង៤នាក់នោះ ហើយធ្វើសកម្មភាពឆក់កាបូបពីស្ត្រីជនជាតិម៉ាឡេស៊ី ប៉ុន្តែសំណាងល្អឆក់មិនបានសម្រេច ដោយសារតែជនរងគ្រោះបានទាញប្រតាយប្រតប់មកវិញ រួចស្រែកថាចោរៗ ទើបជនសង្ស័យទាំង២នាក់នោះបើកម៉ូតូរត់ចូលក្នុងផ្លូវឌឿងហែមបាត់ទៅស្រមោល។
ក្រោយពេលកើតហេតុ ជនរងគ្រោះនឹកឃើញថាមិនមានបាត់បង់ទ្រព្យសម្បត្តិ ហើយមិនបានដាក់ពាក្យបណ្តឹងនោះទេ ក៏ឡើងជិះម៉ូតូកង់បីទៅសណ្ឋាគារបាត់ទៅ ៕
ចែករំលែកព័តមាននេះ