ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា មន្ត្រីនគរបាលម្នាក់ត្រូវបានគេប្រទះឃើញដេកស្លាប់ក្រោមគុម្ពឫស្សីបង្កឱ្យមានការភ្ញាក់ផ្អើលឆោឡោយ៉ាងខ្លាំង ហេតុការណ៍នេះបានកើតឡើងកាលពីវម៉ោង៣និង១៥នាទីរសៀល ថ្ងៃទី១០ កក្កដា នៅក្រោមម្លប់គុម្ពឬស្សីក្បែរចំការស្វាយចន្ទី ស្ថិតក្នុងភូមិត្រពាំងចំបក់ ឃុំត្រពាំងឬស្សី ស្រុកកំពង់ស្វាយ។
តាមសមត្ថកិច្ចបានឲ្យដឹងថា បន្ទាប់ពីប្រជាពលរដ្ឋរាយការណ៍មកថា ពួកគាត់ប្រទះឃើញសាកសពបុរសម្នាក់ដេកស្លាប់ក្នុងស្ថានភាពហើមស្អុយដង្កូវស៊ីអស់ជាច្រើនកន្លែង ។ ហើយសពជនរងគ្រោះឈ្មោះ យឹម ដារ៉ា ហៅវិន ភេទប្រុស អាយុ៤៨ឆ្នាំ រស់នៅភូមិបញ្ញាជី ឃុំត្បូងក្រពើ ស្រុកសន្ទុក ខេត្តកំពង់ធំ ជាមន្ត្រីនគរបាលនៃការិយាល័យប្រឆាំងការជួញដូរមនុស្សខេត្តកំពង់ធំ ។
បើតាមការឲ្យដឹងពីបងស្រីបង្កើតរបស់ជនរងគ្រោះបានបញ្ជាក់ថា ប្អូនប្រុសរបស់គាត់នេះ ជាមនុស្សញៀនស្រា ហើយកន្លងមកផឹកស្រាច្រើនរហូតដល់មានជំងឺប៉ះពាល់ដល់សរសៃប្រសាទទៀតផង ថែមទាំងត្រូវសាច់ញាត់នាំយកទៅឲ្យដេកពេទ្យអស់ជាច្រើនថ្ងៃមក ។ លុះថ្ងៃទី៤ កក្កដា បងប្អូនក៏បានទៅយកចេញពីពេទ្យខេត្ត ទៅព្យាបាលនៅផ្ទះគ្រូខ្មែរនៅភូមិ-ឃុំកើតហេតុខាងលើ រហូតដល់ល្ងាចថ្ងៃដដែល ជនរងគ្រោះក៏រត់ចេញពីផ្ទះគ្រូបាត់ ពួកគាត់នាំគ្នាដើរតាមរកដែរ តែរកមិនឃើញ ស្រាប់ដល់ថ្ងៃរសៀលថ្ងៃទី១០ កក្កដា ទើបមានគេប្រទះឃើញដេកស្លាប់មិនដឹងតាំពីពេលណា រហូតដល់ធុំក្លិនស្អុយទៅហើយ។
ក្រោយពេលកើតហេតុ កម្លាំងនគរបាលស្រុក-ខេត្តបានចុះពិនិត្យមិនឃើញមានស្លាកស្នាមអ្វីឡើយ ទើបសន្និដ្ឋានថា ជនរងគ្រោះស្លាប់ដោយហត់ហេវ គ្មានបាយទឹក បន្ទាប់ពីពិនិត្យរួច នគរបាលបានប្រគល់សពជនរងគ្រោះឱ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ