ខេត្តកំពង់ស្ពឺ ៖ មន្ត្រីនគរបាលខេត្តកំពង់ស្ពឺ ត្រូវបានវាយប្រហារមិនសំចៃមាត់ក្នុងបណ្តាញសង្គម ក្រោយពេលម្ចាស់រថយន្តហាយឡែនឌ័រ ដែលឆេះដោយសារភ្លើងបារីជនជាតិចិន បានទទួលមរណភាពនៅក្នុងមន្ទីរពេទ្យព្រះកុសុមៈ ដោយសារការឆេះខ្លួនធ្ងន់ធ្ងរស្មានមិនដល់ ។ រលកនៃការរិះគន់តាមបណ្តាញសង្គមនោះបានចោទថា សមត្ថកិច្ចគិតតែពីធ្វើកំណត់ហេតុសាកសួរជនរងគ្រោះ មិនយកចិត្តទុកដាក់បញ្ជូនទៅកាន់មន្ទីរពេទ្យទេ ទើបបណ្តាលឱ្យជនរងគ្រោះស្លាប់ ។
នៅក្នុងសេចក្តីបំភ្លឺរបស់ស្នងការដ្ឋាននគរបាលខេត្តកំពង់ស្ពឺ ចុះថ្ងៃទី១១ កក្កដា បានសរសេរថា «ចំពោះករណីអគ្គិភ័យឆេះ រថយន្តមួយគ្រឿងម៉ាកហាឡែនឌ័រ ពណ៌ទឹកប្រាក់ ស្លាកលេខភ្នំពេញ 2AR-6124 នៅចំណុចស្ថានីយប្រេងឥន្ធនៈយីហោតេលា ម្ចាស់ឈ្មោះ សៀក ម៉ៅ មានទីតាំងតាមបណ្តោយផ្លូវជាតិលេខ៤១ ស្ថិតនៅភូមិចំបក់ក្អែ ឃុំទឹកល្អក់ ស្រុកគងពិសី ខេត្តកំពង់ស្ពឺ ក្រោយទទួលបានព័ត៌មានសមត្ថកិច្ចនគរ បាលប៉ុស្តិ៍ អធិការដ្ឋាននគរបាលស្រុកគងពិសី បានសហការអន្តរាគមន៍ជួយពន្លត់ និងជួយសង្គ្រោះជនរងគ្រោះ ក្នុងនោះមានជនជាតិខ្មែរ-ចិនចំនួន២នាក់ មានឈ្មោះ តាំង គឹមហេង ភេទប្រុស ជាតៃកុងឡាន និងឈ្មោះ លីន ប៊ីនប៊ីន ភេទប្រុស ជនជាតិចិន អ្នករួមដំណើរ ។ រយៈពេលប្រមាណ២០នាទីក្រោយហេតុ ការណ៍ សមត្ថកិច្ចគ្រប់គ្រងស្ថានការណ៍បានទាំងស្រុង ។
ក្នុងពេលនោះ សមត្ថកិច្ចបានទំនាក់ទំនងទៅរថយន្តសង្គ្រោះរបស់មន្ទីរពេទ្យបង្អែកស្រុកគងពិសី និងរថយន្តសង្គ្រោះឯកជន ដើម្បីដឹកជនរងគ្រោះទៅកាន់មន្ទីរពេទ្យ ក្នុងរយៈពេលរង់ចាំរថយន្តសង្គ្រោះមកដល់ សមត្ថកិច្ចរួមជាមួយប្រជាពលរដ្ឋបានជួយសង្គ្រោះបឋមប្រើស្បៃ និងភួយសើម ហើយយកជនរងគ្រោះអង្គុយក្នុងបន្ទប់ម៉ាស៊ីនត្រជាក់ម៉ាតស្ថានីយប្រេង ។ ពេលនោះ សមត្ថកិច្ចឆ្លៀតសាកសួរបឋម អំពីក្រុមគ្រួសារសាច់ញាតិ ដើម្បីធ្វើការទំនាក់ទំនងជូនដំណឹងអំពីគ្រោះថ្នាក់របស់ជនរងគ្រោះ ។ ថ្មីៗនេះ តាមរយៈបណ្តាញសង្គមក៏ដូចជាសារព័ត៌មានមួយចំនួនបានចុះផ្សាយចោទប្រកាន់ ដោយខ្វះប្រភពព័ត៌មានពិតថា សមត្ថកិច្ចធ្វើកំណត់ហេតុជនរងគ្រោះ និងពន្យារពេលការបញ្ជូនជនរងគ្រោះទៅកាន់មន្ទីរពេទ្យ ទើបបណ្តាលឱ្យជនរងគ្រោះទទួលមរណភាព ។
ក្នុងនាមស្នងការដ្ឋាននគរបាលខេត្តកំពង់ស្ពឺ សូមចូលរួមសោកស្តាយជាមួយក្រុមគ្រួសារសាច់ញាតិជនរងគ្រោះ និងសូមធ្វើការបដិសេធ និងមិនទទួលចំណុចរិះគន់ទាំងឡាយណាដែលខ្វះព័ត៌មានពិត ។ ចំណែកក្រុមគ្រួសារជនរងគ្រោះបានសម្តែងការអរគុណចំពោះសមត្ថកិច្ចនគរបាលខេត្តកំពង់ស្ពឺ ដែលបានខិតខំជួយខ្នះខ្នែង បញ្ជូនជនរងគ្រោះទៅកាន់មន្ទីរពេទ្យនៅរាជធានីភ្នំពេញ និងបានជួយសម្របសម្រួលនីតិវិធីមួយចំនួនទៀត ។ ជាថ្មីម្តងទៀត ស្នងការនគរបាលខេត្តកំពង់ស្ពឺ សូមធ្វើការអំពាវនាវដល់បណ្តាញសារព័ត៌មាន និងអ្នកលេងបណ្តាញសង្គម Facebook មេត្តាកុំចុះផ្សាយនូវព័ត៌មាន ដែលមិនពិត និងខ្វះប្រភពព័ត៌មាន នាំឱ្យមានការយល់ច្រឡំ ប៉ះពាល់កិត្តិយសស្ថាប័នសមត្ថកិច្ច ដែលកំពុងបំពេញភារកិច្ចជូនប្រជាពលរដ្ឋនិងសង្គមជាតិ ។
សូមរំលឹកថា រថយន្តហាយឡែនឌ័រមួយគ្រឿង បានឆាបឆេះយ៉ាងសន្ធោសន្ធៅសល់តែគ្រោងដែក នៅក្នុងស្ថានីយចាក់ប្រេងមួយកន្លែងនិងបណ្តាលឱ្យរងរបួសមនុស្ស២នាក់ ខណៈពេលកំពុងចាក់ហ្កាស ហើយត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យបង្អែកខេត្តភ្លាមៗដោយសារតែការឆេះខ្លួន ។ ក្នុងហេតុការណ៍នេះ ត្រូវបានសមត្ថកិច្ចធ្វើអន្តរាគមន៍ដោយប្រើប្រាស់រថយន្តបាញ់ទឹកអស់១គ្រឿង ទើបគ្រប់គ្រងសភាពការណ៍បាន និងមិនប៉ះពាល់ដល់ស្ថានីយប្រេងឡើយ ។
ហេតុការណ៍នេះ កើតឡើងកាលពីវេលាម៉ោង៨និង៣០នាទីព្រឹកថ្ងៃទី៩ ខែកក្កដា នៅតាមផ្លូវលេខ៤១ ចន្លោះគីឡូម៉ែត្រលេខ១៧និងលេខ១៨ ក្នុងភូមិចំបក់ក្អែ ឃុំទឹកល្អក់ ស្រុកគងពិសី ហើយការឆេះនេះដោយ សារតែភ្លើងបារី ដែលជនជាតិចិននោះជក់ ។ ម្ចាស់រថយន្តឈ្មោះ តាំង គឹមហេង អាយុ៣៧ឆ្នាំ រស់នៅក្នុងរាជធានីភ្នំពេញ ជាអ្នករត់តាក់សុី ។ តាមការសាកសួររបស់សមត្ថកិច្ច ត្រូវបានម្ចាស់រថយន្តប្រាប់ថា មុនពេលកើតហេតុមានជនជាតិចិនជួលរថយន្តគាត់ជិះមកពីបូកគោខេត្តកំពត ឆ្ពោះទៅរាជធានីភ្នំពេញ ។ ពេលមកដល់ចំណុចខាងលើ ដោយសាររថយន្តអស់ហ្គាស់ គាត់ក៏ចូលទៅចាក់ហ្គាស់បន្ថែម លុះចាក់រួច ហើយ គាត់ក៏ចូលអង្គុយក្នុងរថយន្តដាក់ខ្សែក្រវាត់ ហើយយកលុយឱ្យថ្លៃហ្គាស់ ។
ម្ចាស់រថយន្តបន្តថា ពេលនោះជនជាតិចិនម្នាក់នោះបានជក់បារី ហើយពេលកេះដែកកេះក៏បណ្តាលឱ្យភ្លើងឆាបឆេះយ៉ាងសន្ធោសន្ធៅតែម្តង និងបានម្ចាស់ស្ថានីយជួយបាញ់ទឹកនិងទាញចេញពីក្នុងរថយន្តទាន់ កុំអីប្រហែលជាត្រូវស្លាប់ក្នុងភ្លើងបាត់ទៅហើយ ។ក្នុងហេតុការណ៍នេះបណ្តាលឱ្យឆេះរថយន្តហាយឡែនឌ័រ១គ្រឿង សល់តែគ្រោងដែក និងរបួសមនុស្សធ្ងន់ម្ចាស់រថយន្តនិងរបួសស្រាលជនជាតិចិន ក្នុងនោះជនជាតិចិនម្នាក់ ។ បុរសជាម្ចាស់រថយន្ត ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ហើយបន្តបញ្ជូនទៅមន្ទីរពេទ្យព្រះកុសុមៈ ។ ចំណែកគ្រោងរថយន្តត្រូវបានយកទៅរក្សាទុកនៅអធិការដ្ឋាននគរបាលស្រុក រង់ចាំបន្តនីតិវិធី ។
មហាជនបានរិះគន់ចំពោះជនជាតិចិន ដែលជក់បារីឥតសណ្តាប់ធ្នាប់ បង្កឱ្យមានគ្រោះថ្នាក់ធ្ងន់ធ្ងរបែប
នេះ ៕
ចែករំលែកព័តមាននេះ