តាមប្រភពពី Bangkok Post បានឱ្យដឹងថា ក្រសួងសុខភាពសាធារណៈថៃបានប្រកាស កាលពីថ្ងៃពុធថា ក្មេងៗទាំង១២នាក់និងគ្រូបង្វឹកម្នាក់ ដែលទើបតែយកចេញពីរូងភ្នំ Tham Luang កំពុងស្ថិតនៅក្នុងសភាពល្អប្រសើរ ជាមួយនឹងការព្យាបាលសម្រាប់បញ្ហាសួត ។
លោកវេជ្ជបណ្ឌិត Thongchai Lertwilairatanapong ដែលជាមកពីក្រសួងបានមានប្រសាសន៍ថា ក្មេងៗ៤នាក់ (អាយុ១៤-១៦ឆ្នាំ) ដែលយកចេញមកមុនគេ មកកាន់មន្ទីរពេទ្យកាលពីថ្ងៃអាទិត្យ អាចទទួលទានអាហារបានជាធម្មតា ហើយគ្មានអាការៈក្តៅខ្លួនទេ ។ អ្នកដែលមានការបង្ករោគទៅលើសួត ពេលនេះបានធូរស្បើយច្រើនហើយ ដោយពួកគេអាចដើរទៅមន្ទីរពេទ្យដោយខ្លួនឯង ។
ក្មេងៗ៤នាក់ទៀត (អាយ១២-១៤ឆ្នាំ) ដែលយកទៅមន្ទីរពេទ្យនៅថ្ងៃចន្ទ ក៏មានអាការៈធូរស្បើយច្រើនដែរ ហើយគ្មាននរណាម្នាក់ មានការបង្ករោគទៅលើសួតនោះទេ ។ គ្រាប់ឈាមសរបស់ពួកគេឡើងខ្ពស់
(បង្ហាញថា មានការឆ្លើយតបទៅនឹងមេរោគ) ដែលតម្រូវឲ្យប្រើថ្នាំទប់ការពារ។ ពួកគេត្រូវញ៉ាំអាហារទន់ៗពេលព្រឹក និងអាហារធម្មតាពេលល្ងាច ។
គ្រួសាររបស់ក្មេងទាំង២ក្រុម ត្រូវបានអនុញ្ញាតឲ្យចូលទៅលេងសួរសុខទុក្ខ ប៉ុន្តែតម្រូវឲ្យពាក់សម្លៀកបំពាក់ការពារ និងនៅឆ្ងាយពីក្មេងៗចម្ងាយយ៉ាងហោច២ម៉ែត្រ ដើម្បីការពារការចម្លងមេរោគ ។
សម្រាប់ក្មេងៗក្រុមទីបីវិញ (អាយុ១១-២៥ឆ្នាំ) ដែលយកមកមន្ទីរពេទ្យនៅថ្ងៃអង្គារ មិនមានសភាពត្រជាក់ខ្លួនប្រាណខុសធម្មតានោះទេ ។ សញ្ញាជីវិតដូចជាសម្ពាធឈាម គឺសុទ្ធតែធម្មតា។
មានតែម្នាក់ក្នុងចំណោមនោះប៉ុណ្ណោះ ដែលមានការបង្ករោគលើសួតតិចតួច។ ពួកគេទាំងអស់ បានទទួលនូវការព្យួរសេរ៉ូម ចាក់វ៉ាក់សាំង ប្រើថ្នាំផ្សះ និងវីតាមីន។ ការធ្វើតេស្តទៅលើគំហើញ (ភ្នែក) សារធាតុចិញ្ចឹម និងផ្លូវចិត្ត នឹងត្រូវធ្វើឡើង នាពេលបន្ទាប់ ។
ចែករំលែកព័តមាននេះ