អ៊ីរ៉ង់ជាប្រទេសដែលមានទោសប្រហារជីវិតដោយព្យួរកច្រើនបំផុតនៅលើពិភពលោកនៅក្នុង មួយឆ្នាំៗ ប៉ុន្តែការប្រហារជីវិតជាក្រុមបានកើតមាន យូរៗម្ដង និងកំពុងទទួលការរិះគន់ពីអង្គការសិទ្ធិមនុស្ស ។
ជាក់ស្តែងសារព័ត៌មានបរទេសកាលពីពេល ថ្មីៗកន្លងមកផ្សាយថាអ្នកទោសជនជាតិអ៊ីរ៉ង់ចំនួន៨នាក់ជាសមាជិករបស់ក្រុមIS ក្នុងនិកាយ«ស៊ូនី»ត្រូវអាជ្ញាធរអ៊ីរ៉ង់ប្រហារជីវិតពីបទបង្កភេរវកម្មលើការវាយប្រហារលើអគាររដ្ឋសភាអ៊ីរ៉ង់ និងចេតិយ«Ayatollah Ruhollah Khomeini» នៅក្រុងតេហេរ៉ង់ កាលពីថ្ងៃទី៧ មិថុនា២០១៧បង្កឲ្យមានអ្នកស្លាប់ចំនួន១៧នាក់ និងរបួសជាច្រើននាក់ ក្នុងនោះមានជនល្មើសចំនួន៥នាក់ ។
ក្រោយពីកើតហេតុក្រុមIS បានចេញមុខទទួលខុសត្រូវលើការវាយប្រហារនេះ គឺជាលើកដំបូងដល់ពេលបច្ចុប្បន្នដែលក្រុមនេះបានវាយប្រហារលើអ៊ីរ៉ង់ជាប្រទេសដែលមានពលរដ្ឋភាគច្រើនជាជននិកាយ«សុីអាហ៍» ។ ការប្រហារជីវិតនៅអ៊ីរ៉ង់គឺជាការព្យួរក ប៉ុន្តែអាជ្ញាធរមិនបានបញ្ជាក់ពីពេលវេលា និងទីតាំងប្រហារជីវិតអ្នកទោសទាំង៨នាក់នេះទេ ។
ចំណែកលោកGholam-Hossein Esmaili នាយកផ្នែកយុត្តិធម៌នៅក្រុងតេហេរ៉ង់បានបង្ហើបឲ្យដឹងថា ការប្រហារជីវិតលើកនេះបានកើតឡើងកាលពីជាច្រើនថ្ងៃមុន ប៉ុន្តែអាជ្ញាធរទើបប្រកាសកាលពីថ្ងៃទី៧ មិថុនាកន្លងមកក្នុងហេតុផលសន្តិសុខជាតិ។ មានមនុស្សត្រូវចាប់ខ្លួនពីបទជាប់សង្ស័យនឹងហេតុការណ៍នេះជាច្រើននាក់ ប៉ុន្តែកំពុងស្ថិតក្នុងការពិចារណារបស់តុលាការ ៕
ចែករំលែកព័តមាននេះ