ទីក្រុងហាណូយ ៖ អាជីវកម្មកាន់តែច្រើននៅក្នុងប្រទេសវៀតណាម បាននាំចេញសាច់បក្សីទៅកាន់ទីផ្សារបរទេស ។
Mavin Group ជាក្រុមហ៊ុនរួមរវាងប្រទេសអូស្ត្រាលីនិងវៀតណាម បានបង្កើតអាជីវកម្មនេះដំបូងគេនៅប្រទេសវៀតណាម។ Mavin Group បាននាំចេញសាច់ជ្រូកកកទៅកាន់ទីផ្សារបរទេសកាលពីខែឧសភា ហើយការនាំចេញដំបូងគេ គឺទៅកាន់ប្រទេសមីយ៉ាន់ម៉ា ។
Mavin Group និង Sojitz Viet Nam ដែលជាក្រុមហ៊ុនវិនិយោគដោយប្រទេសជប៉ុន បានប្រកាសកាលពីខែមុនថា ពួកគេចង់នាំចេញសាច់ជ្រូកកកប្រមាណ២៦តោនទៅកាន់ប្រទេសមីយ៉ាន់ម៉ា ជារៀងរាល់ខែ ។
ជាមួយគ្នានេះ ក្រុមហ៊ុន Koyu & Unitek Co Ltd ស្ថិតនៅខេត្ត Dong Nai បាននិយាយថា ពួកគេបាននាំចេញសាច់បក្សី និងផលិតផលពីសាច់បក្សីទៅកាន់ប្រទេសជប៉ុន ប្រមាណជិត១០០តោនជារៀងរាល់ខែ ។
តម្រូវការផលិតផលសាច់មាន់អាំង និងស្ងោរក្នុងប្រទេសជប៉ុនក៏កើនឡើងផងដែរ ដូច្នេះ ក្រុមហ៊ុននេះបានបង្កើតខ្សែសង្វាក់ផលិតកម្មចំនួន២ទៀត ដោយហៅភ្នាក់ងារជប៉ុនមកត្រួតពិនិត្យ និងចេញប័ណ្ណអនុញ្ញាតឲ្យនាំចេញទៅកាន់ជប៉ុន ចាប់ពីខែមិថុនាទៅ ។
ក្រុមហ៊ុនកែច្នៃផលិតផលពីសាច់បក្សីផ្សេងទៀត ក៏បានរៀបចំនាំចេញផលិតផលនាពេលឆាប់ៗនេះដែរ ក្នុងនោះ C.P. Vietnam Corporation កំពុងសាងសង់រោងចក្រដ៏ទំនើបក្នុងខេត្ត Binh Phuoc ដើម្បីនាំចេញផលិតផលពីសាច់បក្សីទៅកាន់ប្រទេសជប៉ុន។
តម្រូវការសាច់ជ្រូក និងសាច់មាន់ក្នុងទីផ្សារជាច្រើនដូចជា ប្រទេសកូរ៉េខាងត្បូង, ជប៉ុន និងសហភាពអឺរ៉ុប គឺពិតជាខ្ពស់ណាស់ ប៉ុន្តែមកដល់ពេលនេះ មានតែក្រុមហ៊ុនដែលវិនិយោគដោយជនបរទេសនៅវៀតណាមប៉ុណ្ណោះ ដែលអាចនាំចេញផលិតផលទាំងនេះបាន ៕
ចែករំលែកព័តមាននេះ