ខេត្តកំពង់ធំ ៖ រថយន្តសាំយ៉ុងមួយគ្រឿងបានធ្វើសកម្មភាពដឹកជញ្ជូនសត្វព្រៃខុសច្បាប់ ត្រូវបានលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បញ្ជាឲ្យកម្លាំងកងរាជអាវុធហត្ថស្រុកបារាយណ៍សហការជាមួយផ្នែករដ្ឋបាលព្រៃឈើកំពង់ថ្ម ឃាត់បានកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១០ ខែកក្កដា ឆ្នាំ ២០១៨ ។
សមត្ថកិច្ចបានឲ្យដឹងថា រថយន្តដឹកសត្វព្រៃស្មើសច្បាប់ខាងលើត្រូវបានបង្ក្រាបបាននៅចំណុចភូមិកំពង់ថ្ម ឃុំកំពង់ថ្ម ស្រុកសន្ទុក ខេត្តកំពង់ធំ ក្នុងនោះសមត្ថកិច្ចឃាត់បានរថយន្តម៉ាកសាំយ៉ុងពណ៌ស ពាក់ស្លាកលេខ ភ្នំពេញ 2N- 4820 រួមទាំងម្ចាស់រថយន្តឈ្មោះ តេង តៃ មានទីលំនៅភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ។
ក្នុងនោះសមត្ថកិច្ចរឹបអូសបាននូវវត្ថុតាងសត្វព្រៃមានរួមមាន សត្វសំពោចព្រៃពីរបេចំនួន៩ក្បាល ស្មើរនឹង២៣គីឡូ, សត្វតុកែមួយបេស្មើរនឹង៥គីឡូ និងឈើធ្នង់២ដុំប្រគល់ជូនផ្នែករដ្ឋបាលព្រៃឈើកំពង់ថ្មយកទៅរក្សាទុកនៅកន្លែងមានសុវត្តិភាពដើម្បីប្រលែងចូលព្រៃវិញឲ្យរស់នៅបែបធម្មជាតិវិញ ។
លោក មុំ ផល នាយផ្នែករដ្ឋបាលព្រៃឈើកំពង់ថ្មប្រាប់ថា បើតាមច្បាប់ម្ចាស់ត្រូវទទួលការផាកពិន័យតែលោករងចាំបទបញ្ជាពីលោកនាយខណ្ឌ និងលោកព្រះរាជអាជ្ញាសិន លោកបញ្ជាឲ្យធ្វើយ៉ាងណានោះលោកនឹងអនុវត្តតាមនីតិវិធី ៕
ចែករំលែកព័តមាននេះ