ខេត្តកំពង់ឆ្នាំង ៖ ដោយសារកត្តាធម្មជាតិមានភ្លៀងធ្លាក់ពីដើមរដូវ និងទឹកភ្លៀងមានចំនួនច្រើនផងនោះការបង្កបង្កើនផលស្រូវវស្សាឆ្នាំនេះធ្វើបានលឿន និងកើនឡើងជាង១៣ម៉ឺនហិកតា បើប្រៀបធៀបរយៈពេលដូចគ្នាក្នុងឆ្នាំ២០១៧កន្លងទៅ ។ នេះបើតាមលោក ងិន ហ៊ុន…
ខេត្តកំពង់ឆ្នាំង ៖ ដោយសារកត្តាធម្មជាតិមានភ្លៀងធ្លាក់ពីដើមរដូវ និងទឹកភ្លៀងមានចំនួនច្រើនផងនោះការបង្កបង្កើនផលស្រូវវស្សាឆ្នាំនេះធ្វើបានលឿន និងកើនឡើងជាង១៣ម៉ឺនហិកតា បើប្រៀបធៀបរយៈពេលដូចគ្នាក្នុងឆ្នាំ២០១៧កន្លងទៅ ។ នេះបើតាមលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានមានប្រសាសន៍កាលពីព្រឹកថ្ងៃទី១០ ខែកក្កដា ឆ្នាំ២០១៨ នេះ ។
លោកប្រធានមន្ទីរបានបន្តថា បច្ចុប្បន្ននេះការបង្កបង្កើនផលស្រូវវស្សាបានប្រមាណជាង១១ម៉ឺនហិកតាលើផែនការជាង១២ម៉ឺនហិកតា គឺស្មើនឹង ៩០% នៃផែនការ ដែលតួលេខនេះល្អប្រសើរបំផុតលើបណ្តាឆ្នាំមុនៗ ។ សម្រាប់ដំណាំរួមផ្សំមកដល់ពេលគឺដាំបានជាង៤ពាន់ហិកតាលើផែនការជាង៨ពាន់ហិកតា គឺស្មើនឹងប្រមាណ ៥០% នៃផែនការ ។ ដោយឡែកការចិញ្ចឹមសត្វ គិតត្រឹមពេលនេះខេត្តកំពង់ឆ្នាំង មានកសិដ្ឋានប្រមាណ១៣៨កសិដ្ឋានក្នុងនោះមានចិញ្ចឹមមាន់, ទា, ជ្រូក និងចិញ្ជឹមគោ ក្របី ជាដើម ។
ហើយបើគិតបរិមាណសម្រាប់សត្វស្លាបមានប្រមាណជាង២លានក្បាល, ជ្រូកមានប្រមាណ៣០ម៉ឺនក្បាល និងគោ ក្របីមានប្រមាណជាង២០ម៉ឺនក្បាល ។ ជាមួយគ្នានេះនៅក្នុងឆ្នាំ២០១៨នេះយើងបានបញ្ជូនកសិករគំរូលើផ្នែកចិញ្ចឹមគោទៅប្រឡងប្រណាំងថ្នាក់ជាតិបានជាប់ចំណាត់ថ្នាក់លេខ១ផងដែរ ។
បើទោះបីដំណាំស្រូវយើងបានបង្កបង្កើនផលបានច្រើន និងលឿនជាងឆ្នាំកន្លងទៅយ៉ាងនេះក្តី ក្នុងនាមលោកជាប្រធានមន្ទីរ ជំនាញ សូមអំពាវនាវឲ្យប្រជាកសិករទូទាំងខេត្តត្រូវថែររក្សារការពារ និងថែទាំដំណាំស្រូវរបស់ខ្លួនជាប្រចាំដោយ ដាក់ជី និងទប់ទឹកទុកក្នុងស្រែមិនឲ្យហូរចេញរហូតដល់ពេលច្រូតកាត់ទទួលផល ។ ជាមួយគ្នានេះត្រូវតាមដានសភាពការណ៍លើដំណាំស្រូវរបស់យើងបើសិនជាមានសត្វចង្រៃ ឬជំងឺរាតត្បាតផ្សេងៗទៅរាយការណ៍ជាបន្ទាន់មកភ្នាក់ងារកសិកម្មភូមិ ស្រុក ដើម្បីរាយការណ៍បន្តមកមន្ទីរកសិកម្មខេត្តនឹងចុះជួយអន្តរាគមន៍អោយទាន់ពេលវេលា ៕
ចែករំលែកព័តមាននេះ