ខេត្តកណ្តាល ៖ បុរសម្នាក់ខណៈស្រវឹងស្រា ហើយខឹងឪពុកមាទះកំផ្លៀង ហើយទាញកាំបិតបុ័ងតោដេញកាប់មិនបាន ក៏ដុតផ្ទះខ្លួនឯងឆេះហ្មត់ រួមទាំងសម្ភារនៅក្នុងផ្ទះ ។ រឿងរ៉ាវហួសចិត្តនេះ បានកើតឡើងកាលពីវេលាម៉ោង៣និង៤៥នាទីរសៀលថ្ងៃទី៨ ខែកក្កដា នៅភូមិថ្កុល ឃំុត្រើយស្លា ស្រុកស្អាង ។
មន្ត្រីនគរបាលស្រុកស្អាងបានឱ្យដឹងថា ជនដែលដុតផ្ទះខ្លួនឯងនេះ ផល ទិត្យ អាយុ២២ឆ្នាំ ជាកសិករ បានត្រូវនគរបាលឃាត់ខ្លួនក្រោយកើតហេតុ សព្វថ្ងៃរស់នៅជាមួយម្ដាយឈ្មោះ កុក ស្រុឺ អាយុ៥៧ឆ្នាំ ។ ផ្ទះដែលត្រូវដុតឆេះហ្មត់នេះ ធ្វើពីឈើប្រក់សង្ក័សី មានទំហំ៥ម៉ែត្រគុណ៦ម៉ែត្រ រួមទាំងចានឆ្នាំង និងសម្លៀកបំពាក់មួយចំនួនទៀត ។
មន្ត្រីនគរបាលបានឱ្យដឹងថា នៅថ្ងៃទី៨ ខែកក្កដា វេលាម៉ោងប្រហែល៨ព្រឹក ឈ្មោះ ផល ទិត្យ បានទៅចូលរួមពិធីបង្កក់កូនគេនៅផ្ទះរបស់ឈ្មោះ ខាន់ ភេទប្រុស អាយុ២៩ឆ្នាំ នៅភូមិជាមួយគ្នា ។ រហូតដល់វេលាម៉ោង១១ព្រឹកថ្ងៃដដែល ត្រឡប់មកផ្ទះវិញក្នុងសភាពស្រវឹងផង ជននេះបានសុំលុយម្តាយទិញភេសជ្ជៈហូប ។
ពេលទិញរួច ឈ្មោះ ផល ទិត្យ ត្រឡប់មកវិញបានទាស់សម្តីជាមួយជីដូនឈ្មោះ សូត្រស៊ីម ហើយបានរើសដុំដីគប់ទៅលើជីដូន ។ ខណៈឃើញដូចនោះ បុរសឈ្មោះ ប៉ោ លីធី ជាឪពុកមា បានទៅឃាត់តែមិនព្រមស្តាប់ ក៏ទះកំផ្លៀងមួយដៃធ្វើឱ្យឈ្មោះ ផល ទិត្យ ខឹងក៏បានកាន់កាំបិតប៉័ងតោចំនួន២រកកាប់ឪពុកមា តែដោយឪពុកមា គេចបាត់រកមិនឃើញ ក៏ទៅដុតផ្ទះខ្លួនឯងឆេះអស់ទាំងស្រុងតែម្ដង ។
ក្រោយពីទទួលបានព័ត៌មានខាងលើ នគរបាលប៉ុស្តិ៍បានចុះទៅដល់ ហើយឃាត់ខ្លួនជននេះ រួមទាំងវត្ថុតាង បញ្ជូនទៅអធិការដ្ឋាននគរបាលស្រុក ដើម្បីអនុវត្តនីតិវិធី ៕
ចែករំលែកព័តមាននេះ