ចំណុចគួរឱ្យភ្ញាក់ផ្អើលទាំង៦កើតឡើងនៅ World Cup 2018 នៅរុស្ស៊ីដែលគ្រប់គ្នាមិនបានដឹង
ការប្រកួតពាន់រង្វាន់ពិភពលោក World Cup ២០១៨ នៅប្រទេសរុស្ស៊ី នាពេលនេះបានឈានដល់វគ្គពាក់កណ្តាលផ្តាច់ព្រ័ត្រ ( Semi-Final ) ហើយ…
ការប្រកួតពាន់រង្វាន់ពិភពលោក World Cup ២០១៨ នៅប្រទេសរុស្ស៊ី នាពេលនេះបានឈានដល់វគ្គពាក់កណ្តាលផ្តាច់ព្រ័ត្រ ( Semi-Final ) ហើយ…
ការប្រកួតពាន់រង្វាន់ពិភពលោក World Cup ២០១៨ នៅប្រទេសរុស្ស៊ី នាពេលនេះបានឈានដល់វគ្គពាក់កណ្តាលផ្តាច់ព្រ័ត្រ ( Semi-Final ) ហើយ ពេលនេះក៏បានរកឃើញក្រុមខ្លាំងមួយក្រុមរួចហើយដែរដែលត្រូវឡើងទៅកាន់វគ្គផ្តាច់ព្រ័ត្រ គឺក្រុមជម្រើសជាតិបារាំង ដោយនៅរង់ចាំមួយក្រុមទៀតរវាង អង់គ្លេសប៉ះនឹងក្រូអាស៊ី នៅយប់រំលងអធ្រាត្រនេះ នឹងអាចរកឃើញ២ក្រុមដែលត្រូវប្រកួតវគ្គផ្តាច់ព្រ័ត្រនៅរុស្ស៊ី ។ ពេលនេះដែរសូមបង្វែរចំណាប់អារម្មណ៍មិត្តអ្នកអានមកដឹងពីចំណុចដែលបានកើតឡើងគួរឱ្យភ្ញាក់ផ្អើលក្នុងព្រឹត្តិការណ៍នេះនាពេលកន្លងមកនេះ ៖
ចំណុចគួរឲ្យភ្ញាក់ផ្អើលទី១
ក្រុមបាល់ទាត់ជម្រើសរុស្ស៊ីដែលក្នុងតារាងចំណាត់ថ្នាក់របស់ FIFA ស្ថិតនៅលេខរៀងទី៧០នោះអាចយកឈ្នះក្រុមជម្រើសជាតិអារ៉ាប៊ីសាអ៊ូឌីតដែលស្ថិតនៅលេខរៀងទី៦៧ ដោយលទ្ធផល ៥-០ និងបន្តយកឈ្នះក្រុមជម្រើសជាតិអេហ្ស៊ីបដែលស្ថិតនៅលេខរៀងទី៤៥ដោយលទ្ធផល៣-១ក្នុងការប្រកួតវគ្គជម្រុះ៣២ក្រុមនៅក្នុងពូលA ។
សរុបក្នុងការប្រកួតពីរលើកនេះ ក្រុមជម្រើសជាតិរុស្ស៊ី រកបានដល់ទៅ៨គ្រាប់និងរបូតវិញតែ១គ្រាប់បំបែកកំណត់ត្រារបស់ក្រុមជម្រើសជាតិអុីតាលីដែលរកបាន៨គ្រាប់ដូចគ្នាតែរបូតវិញដល់ទៅ២គ្រាប់នៅពេលធ្វើជាម្ចាស់ផ្ទះWorld Cup ក្នុងឆ្នាំ១៩៣៤។ តាមរយៈលទ្ធផលដ៏ល្អនេះបានអនុញ្ញាតឲ្យក្រុមជម្រើសជាតិរុស្ស៊ីឡើងទៅវគ្គ១៦ក្រុមជាមួយក្រុមជម្រើសជាតិអ៊ុយរូហ្គាយនិងបន្តឡើងដល់វគ្គ៨ក្រុមក្រោយទម្លាក់ក្រុមអេស្ប៉ាញដោយបាល់ប៉េណាល់ទី ។
សម្រាប់រុស្ស៊ី នេះជាលើកទី១ហើយដែលបានឡើងមកដល់វគ្គនេះក្រោយពីអាក់ខានអស់រយៈពេល៣២ឆ្នាំ។ ម្ល៉ោះហើយបានជាសារព័ត៌មានលោកខាងលិចមួយចំនួនដែលជាទូទៅតែងចុះផ្សាយថា ក្រុមជម្រើសជាតិរុស្ស៊ីមិនខ្មេះទេនោះ បែរជានាំគ្នាលេបសំដីរបស់ខ្លួនជំនួសវិញដោយពាក្យសរសើរ និងសូមទោសរុស្ស៊ីឡើងញាប់មាត់ ។
ចំណុចគួរឲ្យភ្ញាក់ផ្អើលទី២
ក្រុមជម្រើសជាតិអាល្លឺម៉ង់ ដែលជាម្ចាស់ជើងឯក World Cup 2014 នៅប្រេស៊ីល ស្ថិតនៅចំណាត់ថ្នាក់លេខ១ក្នុងតារាងរបស់ FIFA ស្រាប់តែលេងចាញ់ក្រុមជម្រើសជាតិមុិកស៊ិក ដែលស្ថិតនៅចំណាត់ថ្នាក់លេខ១៥ដោយលទ្ធផល ០-១ ។ ដោយសារជ័យជម្នះនេះ ធ្វើឱ្យសង្កាត់កណ្តាលក្រុងម៉ូស្គូ ត្រូវពួកអ្នកគាំទ្រមុិកស៊ិករាប់ពាន់នាក់ច្រៀងផង រាំឡកលោតកញ្ឆេងផងសឹងរញ្ជួយដីអស់ពេញមួយយប់ ។
ចំណុចគួរឲ្យភ្ញាក់ផ្អើលទី៣
ក្រុមជម្រើសជាតិអាហ្សង់ទីន ដែលស្ថិតនៅចំណាត់ថ្នាក់លេខ៥ក្នុងតារាងរបស់ FIFA ទទួលបានលទ្ធផលស្មើ ១-១ជាមួយក្រុមជម្រើសជាតិអុីស្លង់ដែលស្ថិតនៅចំណាត់ថ្នាក់លេខ២២ ។
សម្រាប់អាហ្សង់ទីន គឺជាលើកទី១បើគិតពីឆ្នាំ១៩៩០មកដែលខ្លួនមិនបានទទួលជ័យជម្នះពេលទាត់ក្នុងពូលរបស់ខ្លួន ។ ចំណែកអុីស្លង់ ដែលមានប្រជាជនតែ៣សែននាក់នោះ ការរកបានគ្រាប់បាល់ស្មើនឹងអាហ្សង់ទីន គឺប្រៀបបានជ័យជម្នះបាត់ទៅហើយ ។
ចំណុចគួរឲ្យភ្ញាក់ផ្អើលទី៤
ក្រុមជម្រើសជាតិប្រេស៊ីលដែលស្ថិតនៅចំណាត់ថ្នាក់លេខ២ក្នុងតារាងរបស់ FIFA ក៏ទទួលបានលទ្ធផលស្មើ ១-១ ជាមួយក្រុមជម្រើសជាតិស្វ៊ីស ដែលស្ថិតនៅចំណាត់ថ្នាក់លេខ៦ ។ សម្រាប់ប្រេស៊ីល នេះជាលើកទី១ បើគិតក្នុងរយៈពេល៤០ឆ្នាំចុងក្រោយដែលមិនទទួលបានជ័យជម្នះពេលទាត់ក្នុងពូលរបស់ខ្លួន។
ចំណុចគួរឲ្យភ្ញាក់ផ្អើលទី៥
ក្រុមជម្រើសជាតិជប៉ុន ដែលស្ថិតនៅចំណាត់ថ្នាក់លេខ៦១ក្នុងតារាងរបស់ FIFA បានយកឈ្នះក្រុមជម្រើសជាតិកូឡុំប៊ីដែលស្ថិតនៅចំណាត់ថ្នាក់លេខ១៦ ដោយលទ្ធផល ២-១ ។ នេះគឺជាលើកទី១ដែលក្រុមជម្រើសជាតិមកពីអាស៊ីនេះ បានទទួលជ័យជម្នះលើក្រុមជម្រើសជាតិមកពីអាមេរិកឡាទីន ។
ជ័យជម្នះនេះ ប្រហែលបានមកដោយសារវត្តមានលើកទឹកចិត្ត នៃព្រះអង្គម្ចាស់ក្សត្រីជប៉ុន Hisako Takamado ដែលរយៈពេល២០ឆ្នាំមកហើយតែងបង្ហាញវត្តមានលើកទឹកចិត្តក្រុមបាល់ទាត់ជប៉ុនក្នុងការប្រកួត World Cup ។ ហើយនេះក៏ជាលើកទី១ផងដែរដែលមានតំណាង រាជវង្សានុង្សនៃអធិរាជជប៉ុន យាងមកទស្សនាប្រទេសរុស្ស៊ី បើគិតក្នុងរយៈពេល១០០ ឆ្នាំចុងក្រោយ ។
ចំណុចគួរឲ្យភ្ញាក់ផ្អើលទី៦
អ្នកគាំទ្រជនជាតិជប៉ុន ក្រោយពីចប់ការប្រកួតមួយលើកៗរបស់ក្រុមជម្រើសជាតិខ្លួនតែងនាំគ្នាដើរប្រមូលសំរាមដែលរាយប៉ាយនៅតាមកន្លែងអង្គុយរបស់ទស្សនិកជនដាក់ថង់ប្លាស្ទីក ដែលតាមការអធិប្បាយរបស់ប្រព័ន្ធផ្សព្វផ្សាយអង់គ្លេស BBC គឺជាទម្លាប់មានជាប់ជាហូរហែយូរមកហើយរបស់ជនជាតិជប៉ុនក្នុងការចូលរួមសម្អាតបរិស្ថាន ។ ពួកអ្នកគាំទ្រជនជាតិសេណេហ្គាល់ ដែលក្រុមជម្រើសជាតិគេបានយកឈ្នះក្រុមជម្រើសជាតិប៉ូឡូញក៏បានដើរប្រមូលសំរាមបែបនេះដែរក្រោយពីចប់ការប្រកួត ៕
ចែករំលែកព័តមាននេះ