រាជធានីភ្នំពេញ ៖ បុរសជាវិស្វករម្នាក់ចេញពីធ្វើការបានជិះម៉ូតូត្រលប់ទៅផ្ទះវិញត្រូវរថយន្តមិនស្គាល់ម៉ាកមួយគ្រឿងបុកពីក្រោយពេញទំហឹងបណ្តាលឱ្យប៉ើងទាំងមនុស្សនិងម៉ូតូជាង៥០ម៉ែត្រ បណ្តាលឱ្យជនរងគ្រោះជាអ្នកបើកបរម៉ូតូស្លាប់យ៉ាងអាណោចអាធ័ម ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១០ ខែកក្កដា នៅតាមបណ្តោយផ្លូវវេងស្រេង កែងនិងផ្លូវ៣០ម៉ែត្រ ជិតនឹងក្លឹបកំសាន្តមួយកន្លែង…
រាជធានីភ្នំពេញ ៖ បុរសជាវិស្វករម្នាក់ចេញពីធ្វើការបានជិះម៉ូតូត្រលប់ទៅផ្ទះវិញត្រូវរថយន្តមិនស្គាល់ម៉ាកមួយគ្រឿងបុកពីក្រោយពេញទំហឹងបណ្តាលឱ្យប៉ើងទាំងមនុស្សនិងម៉ូតូជាង៥០ម៉ែត្រ បណ្តាលឱ្យជនរងគ្រោះជាអ្នកបើកបរម៉ូតូស្លាប់យ៉ាងអាណោចអាធ័ម ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១០ ខែកក្កដា នៅតាមបណ្តោយផ្លូវវេងស្រេង កែងនិងផ្លូវ៣០ម៉ែត្រ ជិតនឹងក្លឹបកំសាន្តមួយកន្លែង ស្ថិតក្នុងភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ។
ជនរងគ្រោះដែលស្លាប់ឈ្មោះថា ម៉ុន សិលា ភេទប្រុស អាយុ២៥ឆ្នាំ មុខរបរវិស្វករ ស្នាក់នៅសង្កាត់ស្ទឹងមានជ័យ១ ខណ្ឌមានជ័យ មានស្រុកកំណើតនៅផ្ទះ៦៨០ ភូមិព្រែកធំ១ សង្កាត់ក្បាលកោះ ខណ្ឌច្បារអំពៅ ។ ចំណែកម៉ូតូមួយគ្រឿងរបស់ជនរងគ្រោះម៉ាក PCX ពណ៌ស ពាក់ស្លាកលេខ ភ្នំពេញ ១GW-៦៣២៧ ។
ប្រភពព័ត៌មានពីកន្លែងកើតហេតុបានប្រាប់អោយដឹងថា មុនកើតហេតុ គេឃើញបុរសរងគ្រោះខាងលើជិះម៉ូតូមួយគ្រឿងធ្វើដំណើរតាមផ្លូវ៣០ម៉ែត្រ ក្នុងទិសពីជើងទៅត្បូងមកដល់កន្លែងភ្លើងស្តុបមានពណ៌ក្រហមក៏ឈប់ លុះភ្លើងស្តុបពណ៌ខៀវបានបើកបរម៉ូតូឆ្លងផ្លូវ ឍហើយបត់ឆ្វេងចូលផ្លូវវេងស្រេងក្នុងទិសដៅពីលិចទៅកើត ក្នុងល្បឿនយឺតធម្មតា ស្របគ្នាជាមួយរថយន្តកុងទីន័រមួយគ្រឿងទៀត ពេលនោះស្រាប់តែមានរថយន្តមួយគ្រឿងដែលប្រជាពលរដ្ឋអះអាងថា ម៉ាកកាមរីបាឡែន ពណ៌ទឹកប្រាក់ មិនចាំស្លាកលេខ បានបើកបោះពួយលឿនដូចហោះ ធ្វើដំណើរស្របទិសគ្នាមកបុកចំពីក្រោយម៉ូតូជនរងគ្រោះពេញទំហឹង បណ្តាលឲ្យម៉ូតូ និងជនរងគ្រោះប៉ើងខ្ទាតជាង៥០ម៉ែត្រ បណ្តាលឱ្យអ្នកបើកបរម៉ូតូស្លាប់ភ្លាមៗគួរឱ្យអាណោចអាធ័ម ។ ភ្លាមៗនោះដែរ រថយន្តបង្កបានបន្ថែមល្បឿនបើករត់គេចខ្លួនបាត់ស្រមោលដោយសុវត្ថិភាព ហើយគេក៏ឃើញមានប្រជាពលរដ្ឋនិងសមត្ថកិច្ចព្យាយាមជិះតាម និងរករថយន្តបង្កដែរ តែតាមរកមិនឃើញ។
ក្រោយកើតហេតុ សមត្ថកិច្ចបានទាក់ទងទៅសាច់ញាតិដើម្បីមកទទួលសព ហើយក៏ឃើញវត្តមានប្រពន្ធជនរងគ្រោះបានមកដល់ស្រែកយំសោកបោកខ្លួនដង្ហោយហៅប្តីឱ្យដឹងខ្លួន មើលទៅគួរឱ្យសង្វេគយ៉ាងខ្លាំង ។
ក្រោយកើតហេតុ សពត្រូវបានសាច់ញាតិដឹកយកទៅធ្វើបុណ្យនៅស្រុកកំណើតតាមប្រពៃណី ហើយម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅនគរចរាចរណ៍ជើងគោករាជធានី រង់ចាំសាច់ញាតិយកឯកសារមកបញ្ជាក់ដើម្បីយកម៉ូតូត្រឡប់ទៅវិញ ។
ក្នុងករណីគ្រោះថ្នាក់ចរាចរណ៍ខាងលើ ប្រជាពលរដ្ឋសង្ឃឹម នឹងជឿជាក់ថា សមត្ថកិច្ចជំនាញ នឹងមានវិធានការស្រាវជ្រាវតាមរករថយន្តបង្ក និងជនបង្កមកទទួលខុសត្រូវ និងដាក់ទោសទៅតាមច្បាប់ឱ្យសមនឹង
ទង្វើដែលខ្លួនបានប្រព្រឹត្ត ៕
ចែករំលែកព័តមាននេះ