រាជធានីភ្នំពេញ ៖ ស្ត្រីម្នាក់ដែលទើបតែសម្រាលកូនខ្ចីបាន២ខែ បានដឹកដៃកូនស្រីតូចទើបមានអាយុ៤ឆ្នាំម្នាក់ទៀត មកអង្គុយសម្រក់ទឹកភ្នែកគួរឱ្យខ្លោចចិត្តបំផុតនៅក្នុងប៉ុស្តិ៍នគរបាលទន្លេបាសាក់ ក្រោយពេលប្តីរបស់នាង់បានធ្វើសកម្មភាពលួចខ្សែភ្លើងនៅក្នុងការដ្ឋានសំណង់មួយកន្លែងនៅកោះពេជ្រ ។ ហេតុការណ៍នេះបានកើតឡើង កាលពីវេលាម៉ោង១២និង៣០នាទីថ្ងៃត្រង់ថ្ងៃទី១០ ខែកក្កដា នៅប៉ុស្តិ៍នគរបាលទន្លេបាសាក់ ផ្លូវព្រះសុធារស ក្នុងសង្កាត់ទន្លេបាសាក់ ខណ្ឌចំការមន ។
ប្រភពព័ត៌មានពីមន្ត្រីនគរបាលបានឱ្យដឹងថា បុរសជាប្តីស្ត្រីកូនខ្ចីរូបនេះ ត្រូវបានកម្លាំងសន្តិសុខកោះពេជ្រចាប់យកមកប្រគល់ឱ្យនគរបាល គឺឈ្មោះ ម៉ន សារ៉ាន អាយុ២៥ឆ្នាំ ជាកម្មករសំណង់ ស្នាក់នៅក្នុងការដ្ឋានសំណង់មួយនៅកោះពេជ្រ និងមានស្រុកកំណើតនៅភូមិថ្មី ឃុំតាអុង ស្រុកចំការលើ ខេត្តកំពង់ចាម ។
តាមព័ត៌មានឲ្យដឹងថា កាលពីវេលាម៉ោង៥និង៣០នាទីព្រឹកថ្ងៃទី១០ ខែកក្កដា បុរសជាកម្មករសំណង់រូបនេះបានស្ពាយបាវស៊ីម៉ង់ត៍មួយយកចេញពីក្នុងមណ្ឌលកោះពេជ្រមកខាងក្រៅ ។
ដោយមានការសង្ស័យ កម្លាំងសន្តិសុខក៏ហៅមកសួរនាំ និងឆែកឃើញសុទ្ធតែកំណាត់ខ្សែភ្លើងដែលលួចកាត់លាក់ទុកនៅខាងក្នុងបាវស៊ីម៉ង់ត៍ ក៏ចាប់ឃាត់ខ្លួនតែម្តង ។ លុះដល់វេលាម៉ោង១២និង៣០នាទីថ្ងៃត្រង់ថ្ងៃដដែល ទើបកម្លាំងសន្តិសុខកោះពេជ្រនាំខ្លួនបុរសជាកម្មកររូបនេះ រួមទាំងកំណាត់ខ្សែភ្លើងមួយបាវស៊ីម៉ង់ត៍នោះផង មកប្រគល់ឱ្យនគរបាលប៉ុស្តិ៍ទន្លេបាសាក់ដើម្បីចាត់ការតាមច្បាប់ ។
ក្នុងពេលបុរសជាប្តីត្រូវបានបញ្ជូនមកដល់ប៉ុស្តិ៍នគរបាលទន្លេបាសាក់ គេក៏ឃើញស្ត្រីជាប្រពន្ធបីកូនប្រុសតូចទើបមានអាយុ២ខែ និងដឹកដៃកូនស្រីម្នាក់ទៀតអាយុ៤ឆ្នាំម្នាក់ មកដល់ប៉ុស្តិ៍ដែរ ហើយបានទ្រហោយំសុំការអនុគ្រោះចំពោះប្តី ខណៈឃើញប្តីរបស់នាងត្រូវបានសមត្ថកិច្ចដាក់ខ្នោះដៃជាប់នោះ ។
ស្ត្រីជាប្រពន្ធបានយំរៀបរាប់់ថា រូបនាងមិននឹកស្មានថាប្តីធ្វើបែបនេះឡើយ និងស្ទើរតែមិនជឿឡើយ ព្រោះកន្លងមកប្តីនាងមកធ្វើការមិនដែលចេះលួចរបស់គេឡើយ ហើយសូម្បីតែស្រាក៏មិនចេះផឹកផង ។ ស្ត្រីជាប្រពន្ធរៀបរាប់ទៀតថា កន្លងមកប្តីនាងមិនធ្លាប់មកធ្វើការនៅទីនេះទេ គឺធ្វើការនៅកន្លែងផ្សេង ហើយទើបតែមកធ្វើការនៅកោះពេជ្រនេះបានរយៈពេលជាង១០ថ្ងៃប៉ុណ្ណោះ ក៏កើតមានរឿងបែបនេះតែម្តង ។
នាងបានរៀបរាប់ប្រាប់ទាំងទឹកភ្នែកទៀតថា នាងមានកូនប្រុសស្រីចំនួន២នាក់ ដែលកូនស្រីបងមានអាយុ៤ឆ្នាំ និងកូនប្រុសប្អូនទើបតែបានអាយុ២ខែប៉ុណ្ណោះ ។ កន្លងមក ប្តីនាងតែងតែដើរធ្វើជាជាងសំណង់ជាប្រចាំ ដោយមួយថ្ងៃបានប្រាក់ពី៤ម៉ឺនទៅ៥ម៉ឺនរៀល ដើម្បីយកទៅចិញ្ចឹមគ្រួសារ តែពេលនេះបើប្តីត្រូវគេចាប់ខ្លួន តើមានអ្នកណាចិញ្ចឹមនាងនិងកូនៗ ណាមួយឪពុកក្មេកកំពុងមានជំងឺធ្ងន់ផងនោះ ។
បើទោះបីស្ត្រីជាប្រពន្ធបីកូនខ្ចីម្នាក់ និងដឹកដៃកូនស្រីតូចម្នាក់ មកអង្គុយយំបង្ហូរទឹកភ្នែកយ៉ាងខ្លោចចិត្តបំផុតយ៉ាងណាក្តី ក៏មន្ត្រីមានសមត្ថកិច្ចដែលមានបេះដូងដែក មិនអាចធ្វើការដោះលែងបុរសជាប្តីវិញឡើយ ហើយក៏បានធ្វើកំណត់ហេតុ និងបញ្ជូនទៅកាន់អធិការដ្ឋាននគរបាលខណ្ឌចំការមន ដើម្បីចាត់ការទៅតាមផ្លូវច្បាប់ជាបន្តទៀត ៕
ចែករំលែកព័តមាននេះ