រាជធានីភ្នំពេញ ៖ ជនសង្ស័យ២នាក់ រហស្សនាមដៃមឹក តែងតែធ្វើសកម្មភាពឆក់ យកទ្រព្យសម្បត្តិ ប្រជាពលរដ្ឋតាមផ្លូវសាធារណៈ ទើបអស់លក្ខណ៍ បន្ទាប់ពីធ្វើសកម្មភាពឆក់យក ទូរស័ព្ទអ្នកគ្រូពេទ្យម្នាក់ កំពុងធ្វើដំណើរតាមផ្លូវបានសម្រេច ហើយត្រូវបានអ្នកគ្រូពេទ្យចិត្តសឿងជិះម៉ូតូប្រដេញតាមបំបុក ម៉ូតូជនសង្ស័យដួល និងឃាត់ខ្លួនបានជាបន្តបន្ទាប់។
ហេតុការណ៍នេះបានកើតឡើង កាលពីវេលាម៉ោង៤ និង២០នាទីល្ងាច ថ្ងៃទី១០ ខែកក្កដា ឆ្នាំ២០១៨ ស្ថិតនៅតាមផ្លូវ១០០៣ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ។ ជនសង្ស័យទាំង២នាក់ ទី១ឈ្មោះ យឿន សម្បត្តិ អាយុ១៧ឆ្នាំ មុខរបរមិនពិត ស្នាក់នៅភូមិទួលគោក សង្កាត់ទួលសង្កែ ខណ្ឌឫស្សីកែវ(អ្នកបើក) ទី២ឈ្មោះ ភឿន ប្រចាក់ អាយុ១៨ឆ្នាំ មុខរបរមិនពិតស្នាក់នៅភូមិ ទំនប់១ សង្កាត់ភ្នំពេញថ្មី ខណ្ឌសែនសុខ ជិះម៉ូតូមួយគ្រឿងម៉ាកហុងដា សេ១២៥ ស៊េរី២០១៨ ពណ៌ខ្មៅ ពាក់ស្លាកលេខ ភ្នំពេញ 1GY-1769 ជាមធ្យោបាយធ្វើសកម្មភាពឆក់។
ចំណែកអ្នកគ្រូពេទ្យជាជនរងគ្រោះ ឈ្មោះ សេង វណ្ណច័ន្ទ អាយុ២៤ឆ្នាំ មានទីលំនៅភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ជិះម៉ូតូម៉ាកនិច ពណ៌លឿង ពាក់ស្លាកលេខ ភ្នំពេញ 1FE-3985។ តាមសម្តីអ្នកគ្រពេទ្យបានឲ្យដឹងថា មុនកើតហេតុនាងជិះម៉ូតូ ធ្វើដំណើរតាមផ្លូវលេខ១០០៣ ពីជើងទៅត្បូង លុះដល់ចំណុចកើតហេតុ ស្រាប់តែជនសង្ស័យ២នាក់ខាងលើ ជិះម៉ូតូមកដល់ទន្ទឹម ហើយធ្វើសកម្មភាពឆក់យកទូរស័ព្ទម៉ាក iPhone 7plus ពីឃ្លុបម៉ូតូខាងមុខ បានសម្រេច ហើយព្យាយាមជិះរត់គេចខ្លួន។ ភ្លាមៗនាង ដេញតាមទាន់បំបុក និងធាក់បណ្តាលឲ្យម៉ូតូជនសង្ស័យដួល លោតចុះចាប់ក្របួចកអាវបានម្នាក់ ម្នាក់ទៀត។
ដោយឡែកម្នាក់ទៀតស្ទុះរត់បានប្រមាណ១០០ម៉ែត្រ ត្រូវប្រជាពលរដ្ឋក្របួចជាប់។ តាមនគរបាលបានឲ្យដឹងថា ជនសង្ស័យជាមុខសញ្ញាឆក់យ៉ាងសកម្មរហស្សនាមថាដៃមឹក តែពេលនេះត្រូវអស់លក្ខណ៍។ ជនសង្ស័យត្រូវសមត្ថកិច្ច ចាប់វាយខ្នោះ ដឹកយកទៅផ្នែកជំនាញ អធិការដ្ឋានខណ្ឌដើម្បីសាកសួរ និងចាត់ការតាមច្បាប់៕
https://youtu.be/xero0HShbzI
ចែករំលែកព័តមាននេះ