ខេត្តតាកែវ ៖ ជនសង្ស័យជួញដូរគ្រឿងញៀនចំនួន៤នាក់ ត្រូវបានកម្លាំងនគរបាលស្រុកគីរីវង់ ធ្វើកាចាប់ខ្លួនបានជាបន្តបន្ទាប់រួចកសាងសំណុំរឿងបញ្ជូនបន្តមកកាន់ការិយាល័យប្រឆាំងកាជួញដូរគ្រឿងញៀនខេត្តដើម្បីចាត់ការបន្ត។ លោកវរៈសេនីឯក យ៉ុគ សារ៉ាត់ អធិការនគរបាលស្រុកគីរីវង់ បានឲ្យដឹងថា ជនសង្ស័យទាំង៤នាក់ យើងបង្ក្រាបចំនួន៣ករណីដែលករណីទី១ នៅថ្ងៃអាទិត្យ ១១រោច ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៨ ខែមិថុនា ឆ្នាំ២០១៨ វេលាម៉ោង៣ និង១០នាទីរសៀល ចុះបង្ក្រាបករណីរក្សាទុកជួញដូរសារធាតុញៀន នៅចំណុចខាងជើងកាស៊ីណូ រ៉ូយ៉ាល់ក្រោន ស្ថិតក្នុងភូមិតាអូរខាងត្បូង ឃុំតាអូរ ស្រុកគិរីវង់ ខេត្តតាកែវ ឃាត់ខ្លួនជនសង្ស័យ ចំនួន០១នាក់។
ជនសង្ស័យមានឈ្មោះ នុន រតនា ភេទប្រុស អាយុ២៣ឆ្នាំ ទីលំនៅភូមិក្រសាំងពុល ឃុំតាអូរ ស្រុកគិរីវង់ ខេត្តតាកែវ សមត្ថកិច្ចយើងដកហូតវត្ថុតាងរួមមាន៖ ថ្នាំញៀនម្សៅក្រាម ថ្លាពណ៌ស ចំនួន០២កញ្ចប់តូច ទូរស័ព្ទចាស់ៗចំនួន០២គ្រឿង និងម៉ូតូ០១គ្រឿង ម៉ាក់ Exeterពណ៌ខៀវ ពាក់ស្លាកលេខ តាកែវ 1M-08824 (ស្លាកលេខក្លែងក្លាយ) ករណីទី២ ត្រូវនឹងថ្ងៃទី០៩ ខែមិថុនា ឆ្នាំ ២០១៨ វេលាម៉ោង០៩ និង៣០នាទី លោកបានដឹកនាំកម្លាំងជំនាញស្រុក ចុះសហការជាមួយកម្លាំង ប៉ុស្តិ៍នគរបាលរដ្ឋបាលកំពែង ចុះបង្ក្រាបករណីរក្សាទុក ជួញដូរសារធាតុញៀន នៅចំណុចវាលស្រែ ខាងលិចភូមិស្វាយវល្លិ៍ ស្ថិតក្នុងភូមិស្វាយវល្លិ៍ ឃុំកំពែង ស្រុកគិរីវង់ ខេត្តតាកែវ ឃាត់ខ្លួនជនសង្ស័យចំនួន០១នាក់។
ជនសង្ស័យមានឈ្មោះ សែម ចិក (ហៅក្រៅអឹក) ភេទ ប្រុស អាយុ២៦ឆ្នាំ ទីលំនៅភូមិសំរោងកើត ឃុំគោកព្រេច ស្រុកគិរីវង់ ខេត្តតាកែវ សមត្ថកិច្ចយើងដកហូតវត្ថុតាងរួមមាន៖ ថ្នាំញៀនម្សៅក្រាម ថ្លាពណ៌ស ចំនួន០២កញ្ចប់ធំ ទូរស័ព្ទចាស់ចំនួន០១គ្រឿង និងម៉ូតូ០១គ្រឿង ម៉ាក់NEX គ្មានពាក់ស្លាកលេខ ពណ៌ស បិទខ្មៅ។ ហើយករណីទី៣ នៅថ្ងៃទី០៩ ខែមិថុនា ឆ្នាំ២០១៨ វេលាម៉ោង៤ និង២០នាទីល្ងាច លោកបានដឹកនាំ កម្លាំងជំនាញបង្ក្រាបការស៊ីឈ្នួលជាអ្នកទទួលថ្នាំយកញៀន ទៅឲ្យឈ្មោះ បញ្ញា ភេទប្រុស ត្រង់នៅចំណុចស្ពានភ្នំឆ្មា ស្ថិតក្នុងភូមិចំបក់ ឃុំគោកព្រេច ស្រុកគិរីវង់ ខេត្តតាកែវ ភ្លាមនោះសមត្ថកិច្ច យើងឃាត់ខ្លួនជនសង្ស័យចំនួន០១នាក់។
ជនសង្ស័យមានឈ្មោះ ចាន់ថា ពិសា ភេទប្រុស អាយុ២៧ឆ្នាំ ទីលំនៅភូមិស្រែរង ឃុំស្រែរង ស្រុកអង្គរជ័យ ខេត្តកំពត បានខលណាត់ ទិញថ្នាំញៀនពីឈ្មោះ សែម ចឹក (ហៅ អឹក) រស់នៅភូមិសំរោងខាងកើត ឃុំគោកព្រេច ស្រុកគិរីវង់ ពេលមកដល់ត្រង់កន្លែងណាត់ ប្រគល់ថ្នាំញៀនខាងលើ ត្រូវសមត្ថិកិច្ចចាប់ឃាត់ខ្លួនតែម្តង។
នៅចំពោះមុខប៉ូលិសជនសង្ស័យទាំង៤នាក់ បាននិយាយសារភាពថា ពួកគេពិតជាបានរកស៊ីជួញដូគ្រឿងញៀនពិតប្រាកដមែន។
បច្ចុប្បន្ននេះជនសង្ស័យត្រូវបានប៉ូលិស ការិយាល័យប្រឆាំងការជួញដូគ្រឿងញៀនខេត្តបានកសាងសំណុំរឿងដើម្បីបញ្ជូនជនសង្ស័យរួមជាមួយវត្ថុតាងទៅកាន់សាលាដំបូងខេត្តដើម្បីចាត់ការទៅតាមច្បាប់នៅរសៀលថ្ងែទី១០ កក្កដា ២០១៨នេះ៕
https://youtu.be/o9q6pQ5jIRw
ចែករំលែកព័តមាននេះ