ហ្គាណា ៖ តាមប្រភពព័ត៌មាន Oddity Central បានឲ្យដឹងថា ដោយសារតែមានមនុស្សមួយចំនួនយំមិនចេញនៅក្នុងពិធីបុណ្យសពរបស់សាច់ញាតិបងប្អូន ពេលនេះគេមានសេវាកម្មជួលឲ្យយំកំដកម្មវិធីទៀតផង។ សេវាកម្មនេះ អាចរកបាននៅប្រទេសហ្គាណា ដោយសារតែនៅទីនោះ ការយំក្នុងពិធីបុណ្យសព គឺជាការសម្តែងកិច្ចឈឺចាប់ និងទឹកចិត្តស្រឡាញ់របស់ខ្លួនទៅលើអ្នកស្លាប់ ប្រសិនបើយំមិនចេញទេ នោះមានន័យថា ក្តីស្រឡាញ់ក៏មិនសូវមានច្រើនដែរ។
ក្រុមអ្នកយំអាជីពជាច្រើនត្រូវរីកដុះដាលនៅក្នុងសង្គមហ្គាណា។ អ្នកស្រី Ami Dokli ដែលជាប្រធានក្រុមមួយក្នុងចំណោមក្រុមទាំងអស់ បានប្រាប់ BBC របស់អាព្រិចថា ដោយសារតែមនុស្សមួយចំនួនយំមិនចេញនៅក្នុងពិធីបុណ្យសពរបស់បងប្អូន ទើបគេជួលក្រុមរបស់នាងទៅសម្តែងយំ។ នាងបានប្រាប់ទៀតថា តម្លៃនៃការជួលគឺតិចឬច្រើន ទៅតាមទំហំនៃពិធីបុណ្យ។
ប្រាក់ដែលចំណាយទៅលើពិធីបុណ្យសពរបស់ប្រជាជនហ្គាណា អាចថ្លៃស្មើពិធីមង្គលការ ក៏មានដែរ។ ខ្លះអាចដល់ទៅចន្លោះ ១៥០០០ដុល្លារ និង ២០០០០ដុល្លារ។ អ្នកខ្លះហ៊ានជួលអ្នកយំអាជីពជាច្រើននាក់មកកាន់កម្មវិធីបុណ្យទៀតផង។ គេគិតថា វាជួយលើកមុខមាត់កម្មវិធី ហើយជួយឲ្យអ្នកចូលរួមហ៊ានចូលបុណ្យច្រើនជាងមុន៕
ចែករំលែកព័តមាននេះ