ប្រទេសកាណាដា ៖ បើតាមអាជ្ញាធរសុខាភិបាលកេបិចកាណាដា កាលពីថ្ងៃទី៩ កក្កដា ២០១៨ បានចេញផ្សាយតុល្យការចុងក្រោយ នៃគ្រោះក្ដៅខ្លាំងថា មានមនុស្សស្លាប់៧០នាក់រយៈពេលមួយសប្ដាហ៍ក្នុងខេត្តនោះ។ សីតុណ្ហភាពពេលនេះ ចាប់ផ្ដើមចុះវិញហើយ។
តាំងពីដើមខែកក្កដា មក ធាតុអាកាសឡើងក្ដៅខ្លាំងបំផុតនៅភាគខាងកើតកាណាដា ពិសេសក្នុងខេត្តកេបិច។ ហើយក្នុងតំបន់ក្រុងម៉ុងរ៉េអាល់ ទីប្រជុំជនខេត្តកេបិច ជាទីក្រុងសេដ្ឋកិច្ច ក៏រងការប៉ះពាល់យ៉ាងខ្លាំង ដោយនៅទីនោះមានមនុស្សស្លាប់៣៤នាក់។
ក្នុងពេលមានធាតុអាកាសក្ដៅខ្លាំងបែបនេះ នាំឲ្យមានការជជែកដេញដោលគ្នានៅកេបិច អំពីសេចក្ដីត្រូវការនៃម៉ាស៊ីនត្រជាក់ ព្រោះតំបន់ក្រុងម៉ុងរ៉េអាល់ជាឧទាហរណ៍ ក្នុងចំណោមអ្នកស្លាប់ជាង៦០% ជាអ្នករស់នៅដោយពុំមានម៉ាស៊ីនត្រជាក់ក្នុងបណ្ដាអគារដែលពួកគេរស់នៅ។ ចំណែកឯតាមមន្ទីរពេទ្យមួយចំនួន ក៏ខ្វះម៉ាស៊ីនត្រជាក់ដែរ ដោយអ្នកជំងឺខ្លះត្រូវបង់ប្រាក់ ដើម្បីឲ្យមានម៉ាស៊ីនត្រជាក់ក្នុងបន្ទប់ពួកគេ៕
ចែករំលែកព័តមាននេះ