ខេត្តប៉ៃលិន ៖ បន្ទាប់ពីអភិបាលរងខេត្តប៉ៃលិនលោក ធូ ភា បានអានរបាយការណ៍ថា នៅឆ្នាំ២០១៨នេះបញ្ហាប្រើប្រាស់ និងជួញដូរគ្រឿងញៀនមានការកើនឡើងជាងឆ្នាំ២០១៧កន្លងមក ធ្វើឱ្យសិស្សានុសិស្ស លោកគ្រូ អ្នកគ្រូ ព្រមទាំងប្រជាពលរដ្ឋដែលចូលរួមក្នុងកម្មវិធីទិវាប្រយុទ្ធប្រឆាំងនឹងគ្រឿងញៀនកាលពីព្រឹកថ្ងៃទី១០ ខែកក្កដា ឆ្នាំ២០១៨ នៅក្នុងបរិវេណវត្តរតនសោភ័ណ ហៅវត្តកោងកាង ស្ថិតនៅក្នុងភូមិវត្ត សង្កាត់ប៉ៃលិន ក្រុងប៉ៃលិន មានការព្រួយបារម្ភយ៉ាងខ្លាំងចំពោះ ភូមិឃុំមានសុវត្ថិភាព ។
លោកគ្រូបង្រៀននៅអនុវិទ្យាល័យភ្នំយ៉ាតបានឱ្យដឹងថា ការអប់រំណែនាំមិនឱ្យសិស្សប្រើប្រាស់គ្រឿងញៀន គឺខាងសាលាតែងតែធ្វើឡើងជាញឹកញាប់មកហើយ តែបញ្ហាសំខាន់នោះ បើសិនជានៅក្នុងថ្នាក់មានសិស្សណាម្នាក់ប្រើប្រាស់គ្រឿងញៀនខុសច្បាប់ ដោយលួចលាក់ ហើយមានមិត្តភក្តិផ្សេងទៀតនៅខាងក្រៅជាអ្នកជួញដូរអាចនឹងទៅគម្រាមសិស្សដទៃទៀត ដែលជាមិត្តភក្តិ ជិតស្និទ្ធ ហើយមានលុយ ខណ:រៀនជាមួយគ្នាឱ្យប្រើប្រាស់ផងដែរ ។
ប្រភពបន្តទៀតថា ការប្រើប្រាស់ថ្នាំញៀននេះ ភាគច្រើនអាចពេលចេញពីរៀនដោយស្ថិតនៅក្រៅការគ្រប់គ្រងរបស់សាលា ដូច្នេះពិតជាមានការលំបាកយ៉ាងខ្លាំង ហើយកន្លងមក បន្ទាប់ពីសមត្ថកិច្ចចាប់ឃាត់ខ្លួនបានអ្នកប្រើប្រាស់គ្រឿងញៀន ក៏ប៉ះចំសិស្សសាលាមួយចំនួនដែរ ។
ប្រភពបញ្ជាក់ទៀតថា ក្មេងៗដែលជាសិស្សអាចងាយនឹងទទួលរងផលប៉ះពាល់ ព្រោះពួកគេស្ថិតនៅក្នុងវ័យក្មេងខ្សោយអាចនឹងឆាប់ញៀនថ្នាំ ពេលប្រើប្រាស់ម្តងទៅពីរដងប៉ុណ្ណោះ ។ ប៉ុន្តែអ្វីដែលមានការព្រួយបារម្ភជាងនេះគឺការចុះចាប់បង្ក្រាបរបស់សមត្ថកិច្ចដូចភ្លៀងរលឹម នៅតែចាប់អ្នកចែកចាយមិនចេះអស់មិនចេះហើយ ជួនកាលសូម្បីតែនៅក្បែរសាលារៀន ក៏មានអ្នកជួញដូរគ្រឿងញៀនគួរឱ្យកត់សម្គាល់ផងដែរ ។
ចំណែកលោក ផាន់ ចាន់ធុល អភិបាលខេត្តប៉ៃលិន បានឱ្យដឹងថា គ្រឿងញៀនអាចធ្វើឱ្យម នុស្សគ្រប់រូបឆ្កួតវង្វេងមិនថាប្រជាជនសាមញ្ញនោះទេ សូម្បីតែកម្លាំងប្រដាប់អាវុធក៏ដោយបើប្រើប្រាស់ហើយមិនដឹងជាជាប់គុកនៅពេលណានោះទេ ។ សូមបញ្ជាក់ផងដែរថា អាជ្ញាធរបានដុតកំទេចគ្រឿងញៀនប្រភេទមេតំហ្វេតាមីនWY ចំនួន១០៤គ្រាប់ និងហ្វេតំហ្វេតាមីន ICE ទម្ងន់ ៩៥.៨០ ក្រាម និងមេតំហ្វេតាមីនICE ចំនួន៦៨កញ្ចប់ ៕
ចែករំលែកព័តមាននេះ