ការចរចាបិទទ្វាររវាងក្លិប Real Madrid និង Juventus ជុំវិញការទិញ-ដូរកីឡាករល្បី Cristiano Ronaldo នៅតែបន្ត ខណៈសាមីខ្លួនបាននិងកំពុងរកមើលភូមិគ្រឹះសមរម្យមួយកន្លែងនៅក្រុង…
ការចរចាបិទទ្វាររវាងក្លិប Real Madrid និង Juventus ជុំវិញការទិញ-ដូរកីឡាករល្បី Cristiano Ronaldo នៅតែបន្ត ខណៈសាមីខ្លួនបាននិងកំពុងរកមើលភូមិគ្រឹះសមរម្យមួយកន្លែងនៅក្រុង Turin ប្រទេសអុីតាលី ដើម្បីស្នាក់នៅរួចទៅហើយ ។
ប្រភពព័ត៌មាន The Sun រាយការណ៍ថា កីឡាករឆ្នើមលំដាប់ពិភពលោកវ័យ៣៣ឆ្នាំ Ronaldo នឹងចុះកុងត្រាលេងឱ្យក្លិបយក្សអុីតាលីដែលមានរហស្សនាមថា “សេះបង្កង់” រយៈពេល៤ឆ្នាំ ដោយរូបគេនឹងទទួលបានប្រាក់ហត់នឿយជិត៩០លានដុល្លារក្នុង១ឆ្នាំ ខណៈការត្រួតពិនិត្យបានចប់សព្វគ្រប់ហើយ ។
ភ្លាមៗបន្ទាប់ពីពាក្យចចាមអារ៉ាមទៅលេងឱ្យ Juventus ក្លាយជាការពិតតារារកគ្រាប់បាល់បានច្រើនជាងគេប្រចាំក្លិប Real Madrid បានទៅរកមើលភូមិគ្រឹះមួយកន្លែងនៅក្រុង Turinដើម្បីចាប់ផ្តើមជីវិតថ្មីជាមួយសំណព្វចិត្តនាង Georgina Rodriguez លើទឹកដីអុីតាលី ។ រឿងចម្លែកមួយគឺភូមិគ្រឹះដែលម្ចាស់ពានបាល់មាស៥ជំនាន់រូបនេះពេញចិត្តនោះជាទ្រនំចាស់របស់ Zidane អតីតអ្នកចាត់ការទូទៅក្លិប Real Madrid ស្នាក់នៅ ពេលរូបលោកនៅជាកីឡាករលេងឱ្យ Juventus នៅឆ្នាំ១៩៩៦-២០០១ ។
ភូមិគ្រឹះនេះមានបន្ទប់គេង៧ អាងហែលទឹក និងមានផ្លូវសម្ងាត់ពីរ ហើយតម្លៃជួលវិញពិតជាថ្លៃមិនគួរឱ្យជឿដោយក្នុង១ថ្ងៃជាង៤ម៉ឺនដុល្លារឯណោះ ។ ទោះបីយ៉ាងណាក៏ដោយក៏គ្មានបញ្ហាសម្រាប់ Ronaldo ដែរ តែអ្វីដែលសំខាន់គឺការសាងស្នាដៃថ្មីនៅ Juventus ដែលជាក្លិបរូបគេស្រឡាញ់តាំងពីកុមារភាព ៕
ចែករំលែកព័តមាននេះ