ខេត្តកំពង់ធំ ៖ ក្មេងស្រីម្នាក់ត្រូវរន្ទះបាញ់ស្លាប់យ៉ាងអាណោចអាធ័ម បានកើតឡើងកាលពីវេលាម៉ោង៥និង៥នាទីល្ងាចថ្ងៃទី៩ ខែកក្កដា ឆ្នាំ២០១៨ ស្ថិតនៅក្នុងភូមិសង្គម ឃុំដំរីស្លាប់ ស្រុកកំពង់ស្វាយ ខេត្តកំពង់ធំ ។
លោកវរសេនីយ៍ត្រី យន់ ឆៃយាន អធិការរងនគរបាលស្រុកកំពង់ស្វាយ បានអោយដឹងថា កុមារីដែលស្លាប់ឈ្មោះ ញឹម មេសា ភេទស្រី អាយុ១៣ឆ្នាំ មានទីលំនៅភូមិកើតហេតុខាងលើ មានឪពុកឈ្មោះ អុី ញឹម អាយុ៥៣ឆ្នាំ និងម្តាយឈ្មោះ ខូយ ខន អាយុ៣៨ឆ្នាំ មានកូនចំនួន១០នាក់ ក្នុងនោះស្រី៦នាក់ និងប្រុស៤នាក់ ចំណែកកុមារីរងគ្រោះជាកូនទី៨នៅក្នុងគ្រួសារ ។
បើតាមការឲ្យដឹងពីឪពុកម្តាយ និងសាច់ញាតិបានប្រាប់ឱ្យដឹងថា នៅមុនពេលកើតហេតុ ខណៈផ្ទៃមេឃមានពណ៍ខ្មៅដេដាសជាសញ្ញាប្រាប់ថាមេឃភ្លៀងហើយ ពេលនោះកុមារីរងគ្រោះខាងលើមិនហ៊ានដើរលេងឆ្ងាយនោះទេ គឺនាងនិងបងប្អូនរួមជាមួយនឹងជីដូនមានគ្នា៥នាក់នាំគ្នាអង្គុយលេងក្រោមផ្ទះ ពេលនោះផ្ទៃមេឃក៏មានភ្លៀងខ្យល់ និងរន្ទះបាញ់ចំកុមារីរងគ្រោះបណ្តាលឲ្យស្លាប់នៅនឹងកន្លែងកើតហេតុ ចំណែកអ្នកដទៃទៀតគ្រាន់តែរងរបួសស្រាលតែប៉ុណ្ណោះ ។
ក្រោយពេលកើតហេតុ សមត្ថកិច្ចបានចុះទៅធ្វើកោសល្យវិច្ឆ័យ រួចក៏ប្រគល់សពជូនសាច់ញាតិដើម្បីធ្វើបុណ្យតាមប្រពៃណី៕
ចែករំលែកព័តមាននេះ