រាជធានីភ្នំពេញ ៖ ក្នុងពិធីឆ្លងចេតិយ៍ និងរូបសំណាកនាយវីតាមីសេ រួមជាមួយពិធីបុណ្យ ខួប១០០ថ្ងៃរបស់គាត់ផងនោះ អ្នកនាងប៉េងប៉ោង ឲ្យដឹងថា ការឆ្លាក់រូបសំណាករបស់ឪពុកនាងមានអព្ភូតហេតុកើតឡើង ដោយសារតែជាងមានជំនាញឆ្លាក់ថ្ម និងស្ពាន់ ឲ្យដូចទម្រង់មុខមនុស្សពិតច្រើនឆ្នាំបែរជាឆ្លាក់មិនដូច ជាពិសេសគឺបបូរមាត់តែម្ដង ។ ទាល់តែនាងអុជធូបសុំទើបជាងឆ្លាក់ដូច ។
អ្នកនាងប៉េងប៉ោង និយាយថា «គ្រាន់តែឆ្លាក់ដូចភ្លាម នាងខ្ញុំឃើញវិញ្ញាណលោកឪពុក មកលេងជាប្រចាំ ដោយមុនពេលធ្វើបុណ្យប៉ុន្មានថ្ងៃ គាត់បង្ហាញខ្លួនរើសកន្សែង ហើយសប្បាយចិត្តយ៉ាងខ្លាំង ដែលហាក់ដូចជាគាត់សប្បាយចិត្ត នឹងទទួលបានអ្វីដែលកូនចៅបានធ្វើបុណ្យបញ្ជូនឲ្យ ។
ក្នុងពេលឆ្លាក់មិនដូច សូម្បីតែជាងក៏ចង់ខកចិត្តដែរ ហើយគឺទោះជាជាងបានអុជធូបសុំប៉ុនណាក៏នៅតែឆ្លាក់មិនដូច ។ ខ្ញុំមានអារម្មណ៍ ភ័យអរៗយ៉ាងខ្លាំង ដែលកៀកថ្ងៃក្នុងការធ្វើពិធីឆ្លងទៅហើយ បែរជានៅតែគ្មានរូបដូច ទើបសម្រេចចិត្តអុជធូប ហើយនិយាយជាមួយឪពុក ហើយប្រហែលជាលោកទទួល ទើបស្រាប់តែចម្លាក់នោះ គឺទោះជាជាងហាក់មិនសូវប្រិតព្រាងដូចមុន ក៏ស្រាប់តែចេញរូបចម្លាក់មកដូច ធ្វើឲ្យជាង និងនាងខ្ញុំក៏ព្រឺឆ្អឹងខ្នងនៅពេលនិយាយដល់រឿងនេះ »។
មូលហេតុដែលនាំឲ្យមានរូបសំណាករបស់ឪពុកដល់ទៅ៣ អ្នកនាងប៉េងប៉ោងថា ទី១ ដោយសារតែជាងបញ្ចុះតម្លៃ ទី២ដោយសារតែនាងចង់ទុកមួយតម្កល់នៅក្នុងចេតិយ ទី៣ចង់ទុកតម្កល់ក្នុងផ្ទះឲ្យកូនចៅបានឃើញ បានស្គាល់មុខ និងទី៤ គឺចង់ទុក១តម្កល់កន្លែងអុជធូបរបស់លោកឪពុកនៅផ្ទះ ។
នៅក្នុងពិធីខួបគម្រប់១០០ថ្ងៃ អមដោយពិធីឆ្លងចេតិយ និងរូបសំណាកនោះ ទោះជាមានភ្លៀងខ្លាំងក៏ដោយ ក៏មានភ្ញៀវច្រើនកុះករ ពិសេសអ្នកសិល្បៈ ។ អ្នកនាងប៉េងតប៉ោងថាជាការសោកស្ដាយ ព្រោះបើគ្មានការរំខានដោយភ្លៀងនោះទេ គឺពិធីទាំងមូលនឹងកាន់តែអធិកអធមជាងនេះ ៕
ចែករំលែកព័តមាននេះ