រាជធានីភ្នំពេញ ៖យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយឲ្យដឹងថា ក្នុងឆមាសទី១ ឆ្នាំ២០១៨ ស្ថានភាពខ្យល់បក់បោកខ្លាំងកើតមានច្រើនលើកស្ទើរគ្រប់កន្លែង ប៉ុន្តែការទទួលរងគ្រោះធ្ងន់ធ្ងរកើតមាននៅក្នុងខេត្តព្រះវិហារ ស្វាយរៀង បន្ទាយមានជ័យ ឧត្តរមានជ័យ និងខេត្តកំពង់ចាម ។
ការទទួលរងគ្រោះក្នុងឆមាសទី១ ឆ្នាំនេះ កើតមានចំនួន១៣៩លើក នៅទូទាំងប្រទេស បណ្តាលឲ្យ ៖
-ផ្ទះរលំនិងខូចធ្ងន់៥៣២ខ្នង ផ្ទះរបើកដំបូល និងខូចមធ្យម២០២៥ខ្នង របើកដំបូលសាលារៀន១៨អគារ និងអគារផ្សេងៗ៩អគារ ។
-រលំបាក់អង់តែនទូរស័ព្ទប្រព័ន្ធ០១២មួយកន្លែង រលំបាក់ផ្ទាំងប៉ាណូពាណិជ្ជកម្មធំ៣កន្លែងរលំបាក់បង្គោលខ្សែភ្លើង៤ដើម ។
-លិចទូកអ្នកដំណើរ១គ្រឿង និងទូកអ្នកនេសាទ១គ្រឿង នៅតំបន់សមុទ្រ ខូចម៉ូតូ៣គ្រឿង និងរថយន្ត១៣គ្រឿង ស្លាប់៣ នាក់ របួស៣១នាក់ ។
-គ្រោះថ្នាក់រន្ទះបាញ់ ស្លាប់៧៤នាក់(ស្រី១៧នាក់) របួស៤៩នាក់ ងាប់គោក្របី៨០ក្បាល ខូចផ្ទះ១២ខ្នង និងទីចាត់ការសាលា១ខ្នង ។
យោងតាមរបាយការណ៍ដដែលនេះ បានឲ្យដឹងទៀតថា ករណីគ្រុនឈាមកើតមានចំនួន ២២០៧ករណី និងរងគ្រោះស្លាប់៦នាក់ ។
-ការប្រើប្រាស់ចរន្តអគ្គិសនី និងការតខ្សែបណ្តាញអគ្គិសនី ដោយមានការធ្វេសប្រហែសខ្វះការប្រុងប្រយ័ត្ន និងគ្មានជំនាញ គឺជាប្រភពនៃគ្រោះអគ្គិភ័យនៅតាមបណ្តាទីប្រជុំជន ។ ដោយឡែក ការប្រើប្រាស់ឧបករណ៍អគ្គិសនី និងចម្អិនអាហារដោយប្រើប្រាស់ភ្លើងនិងហ្កាស ក៏ជាប្រភពគ្រោះថ្នាក់ដែលជាទូទៅកើតមានជាញឹកញាប់ ។
ក្នុងឆមាសទី១នេះដែរ ការខូចខាតដោយគ្រោះអគ្គិភ័យធំៗមាន ការឆេះតូបផ្សារចំនួន ៨០៧តូប រោងមហោស្រព១កន្លែង រោងម៉ាស៊ីនកិនស្រូវ១កន្លែង ឆេះព្រៃនិងព្រៃលិចទឹក៤៩ហិកតា ចម្ការស្វាយចន្ទីនិងចម្ការអំពៅ២៤៧ហិកតា ។
ចំពោះសុវត្ថិភាពចំណីអាហារគឺការពុលស្រា និងទឹក កើតមានមួយករណីនៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ ចាប់ពីថ្ងៃទី៣ដល់ទី៧ ខែឧសភា បណ្តាលឲ្យប្រជាពលរដ្ឋចំនួន១៤នាក់(ស្រី៨នាក់)ស្លាប់ និង២៩៣នាក់(ស្រី១៧១នាក់និងកុមារ៥នាក់) ត្រូវបានដឹកបញ្ជូនទៅសង្គ្រោះនិងព្យាបាលនៅមន្ទីរពេទ្យបង្អែកខេត្តក្រចេះ និងមន្ទីរពេទ្យកាល់ម៉ែត រាជធានីភ្នំពេញ ។
ក្រសួងជំនាញបានបង្ហាញថា ការពុលនេះគឺបណ្តាលមកពីការផលិតស្រាក្នុងមូលដ្ឋានមានសារធាតុមេតាណុលកម្រិតខ្ពស់ និងទឹកព្រែកទេរ និងអូរគគីរ មានសារធាតុគីមីដែលបណ្តាលមកពីការហូរចូលតាមទឹកភ្លៀងនៃថ្នាំសម្លាប់សត្វល្អិត និងស្មៅដែលប្រជាពលរដ្ឋបានប្រើប្រាស់លើដំណាំ ។
មានការពុលចំណីអាហារចំនួន៦ករណីផ្សេងទៀត មានដូចជា ពុលនំអន្សម នំបញ្ចុក នំបុ័ងសម្លការី និងបង្អែម នៅខេត្តក្រចេះ កំពង់ឆ្នាំង កណ្តាល និងខេត្តសៀមរាប ដែលមានប្រជាពលរដ្ឋរងគ្រោះចំនួន១៤៣នាក់ និងទទួលការព្យាបាលនៅមន្ទីរពេទ្យបង្អែក និងមណ្ឌលសុខភាពដោយមិនមានរងគ្រោះដល់ស្លាប់ទេ ។
ការទទួលរងគ្រោះថ្នាក់ដោយចរាចរណ៍ក្នុងឆមាសទី១ មានចំនួន១.៦៣៣លើក ក្នុងនោះស្លាប់ចំនួន៩៣០នាក់ និងរបួស២.៣៩៩នាក់ (ទិន្នន័យអគ្គស្នងការដ្ឋាននគរបាលជាតិ) ។
ជំងឺឆ្លង ជំងឺផ្តាសាយបក្សីA (H1N1) កើតមានចំនួន៣ករណី ក្នុងត្រីមាសទី១ នៅរាជធានីភ្នំពេញ ខេត្តមណ្ឌលគីរី និងខេត្តព្រៃវែង ហើយក្រោមកិច្ចសហការរវាងក្រសួងជំនាញ និងអាជ្ញាធរមូលដ្ឋាន បានទប់ស្កាត់មិនឲ្យមានការឆ្លងរាលដាលបន្តដល់មនុស្ស និងសត្វនៅកន្លែងផ្សេង ។ មូលដ្ឋានរងគ្រោះនេះត្រូវបានអនុវត្តវិធានការបសុព្យាបាលយ៉ាងប្រុងប្រយ័ត្ន ក្នុងនោះមានការផ្សព្វផ្សាយអប់រំ និងចែកចាយប័ណ្ណផ្សព្វផ្សយព័ត៌មានអំពីការការពារ រួមទាំងការបាញ់ថ្នាំសម្លាប់មេរោគនៅតាមកសិដ្ឋាន លំនៅឋាន និងតាមដងផ្លូវ ៕
ចែករំលែកព័តមាននេះ