ខេត្តកំពង់ចាម ៖ ស្របពេលដំឡូងមីឆ្នាំនេះកំពុងមានទីផ្សារ និងតម្លៃល្អប្រសើរបន្ដិចនោះ បែរជាមានឈ្មួញ និងក្រុមហ៊ុនខិលខូចមួយចំនួនតូចកំពុងរកស៊ីទុច្ចរិត ដែលបង្កផលប៉ះពាល់យ៉ាងធ្ងន់ធ្ងរដល់ទីផ្សារដំឡូងមីរបស់កម្ពុជាទាំងមូល និងកំពុងសម្លាប់កសិករដែលកំពុងដាំដុះដំណាំសក្ដានុពលមួយនេះ ។ តាមប្រសាសន៍របស់អភិបាលខេត្តកំពង់ចាម…
ខេត្តកំពង់ចាម ៖ ស្របពេលដំឡូងមីឆ្នាំនេះកំពុងមានទីផ្សារ និងតម្លៃល្អប្រសើរបន្ដិចនោះ បែរជាមានឈ្មួញ និងក្រុមហ៊ុនខិលខូចមួយចំនួនតូចកំពុងរកស៊ីទុច្ចរិត ដែលបង្កផលប៉ះពាល់យ៉ាងធ្ងន់ធ្ងរដល់ទីផ្សារដំឡូងមីរបស់កម្ពុជាទាំងមូល និងកំពុងសម្លាប់កសិករដែលកំពុងដាំដុះដំណាំសក្ដានុពលមួយនេះ ។
តាមប្រសាសន៍របស់អភិបាលខេត្តកំពង់ចាម បានលើកឡើងថា បច្ចុប្បន្ននេះ មានឈ្មួញពីរបីនាក់ និងក្រុមហ៊ុនមួយឬពីរ ព្រោះតែចង់ចំណេញច្រើន បែរជាយកដុំថ្មបង្កប់ដាក់ក្នុងដំឡូងមី យកទៅលក់នៅលើទីផ្សារ ដើម្បីនាំចេញទៅប្រទេសជិតខាង ។ ការរកស៊ីទុច្ចរិតបែបនេះ បានជះឥទ្ធិពលអវិជ្ជមានយ៉ាងធ្ងន់ធ្ងរ ដល់ប្រជាកសិករដែលនឹងត្រូវប្រឈមវិបត្តិគ្មានទីផ្សារ ។
លោក គួច ចំរើន អភិបាលខេត្ត បានលើកឡើងបែបនេះនៅក្នុងពិធីផ្សារណាត់បន្លែសុវត្ថិភាព និងផលិតផលសុវត្ថិភាព នៃគម្រោងជំរុញផលិតផលស្បៀង កាលពីថ្ងៃទី៤ កក្កដា កន្លងទៅ ដែលមានទីតាំងនៅខាងក្រោយមន្ទីរវប្បធម៌ និងវិចិត្រសិល្បៈ ។
លោកអភិបាលខេត្តបន្ដថា ៖« ស្របពេលទីផ្សារដំឡូងមីបានថ្លៃបន្តិច និងកំពុងតែធ្វើឲ្យបងប្អូនកសិករដាំដុះដំឡូងមីសប្បាយរីករាយនោះ បែរជាមានក្រុមឈ្មួញខិលខូចប៉ុន្មាននាក់មានគំនិតទុច្ចរិតបានយកដុំថ្មទៅដាក់លាយក្នុងចំណិតដំឡូង រួចដឹកតាមរថយន្តយកទៅលក់នៅលើទីផ្សារក្នុងខេត្ត និងបានកើតឡើងជាញឹកញាប់ » ។
លោកអភិបាលខេត្តបន្ថែមថា ៖« ទង្វើរកស៊ីមិនស្មោះត្រង់បែបនេះ នៅពេលដៃគូវិនិយោគគេបានដឹងនោះ ថ្ងៃក្រោយ គេនឹងលែងទិញពីយើង ។ ដល់ពេលនោះ សួរថាតើផលលំបាកនឹងធ្លាក់ទៅលើអ្នកណា គឺមានតែបងប្អូនកសិករខ្មែរយើងទេ ដែលពួកគាត់បានខិតខំដាំដុះទាំងលំបាក បែរជាមានឈ្មួញ និងក្រុមហ៊ុនបែបនេះ មកសម្លាប់ពួកគាត់ទៅវិញ » ។
លោកអភិបាលខេត្តបញ្ជាក់ថា ៖« កន្លងមក ឈ្មួញដែលប្រព្រឹត្តទង្វើអាក្រក់ទាំងនោះ ធ្លាប់បានហៅមកធ្វើការអប់រំណែនាំ និងបានធ្វើកិច្ចសន្យាដែរ ព្រោះយើងមិនចង់ឲ្យពួកគាត់ប៉ុន្មាននាក់នោះសម្លាប់ទីផ្សារ និងកសិករដាំដំឡូងមីរបស់យើង » ។
លោកអភិបាលខេត្តសង្កត់ធ្ងន់ថា ៖« នៅអាណត្តិក្រោយនេះ ខ្ញុំសូមស្នើឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានវិធានការឲ្យបានតឹងរ៉ឹងជាមួយក្រុមឈ្មួញណាដែលរកស៊ីខូច ដាក់បង្កប់ដុំថ្មជាមួយនឹងដំឡូងមីនោះ ដើម្បីបម្រើផលប្រយោជន៍ជូនកសិករ ក៏ដូចជាទីផ្សារដំឡូងមីរបស់កម្ពុជាទាំងមូល » ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ដោយសារតែកម្ពុជាពុំទាន់មានច្បាប់ភូតគាមអនាម័យ ដូច្នេះហើយបានជាឈ្មួញខិលខូចមួយចំនួនមានឱកាសរកស៊ីទុច្ចរិតបែបនេះ ។
លោករដ្ឋមន្ត្រីបន្ដថា ៖« រាជរដ្ឋាភិបាលដែលមានក្រសួងកសិកម្ម ជាសេនាធិការបានខិតខំប្រមូលផ្តុំ និងប្រើប្រាស់ធនធានសក្តានុពលដែលមានស្រាប់ ព្រមទាំងកៀរគរជំនួយបន្ថែមទៀត សំដៅលើកកម្ពស់ផលិតភាពកសិកម្ម ដើម្បីឆ្លើយតបទៅតាមតម្រូវការទីផ្សារ ទាំងបរិមាណ គុណភាព សុវត្ថិភាព និងស្តង់ដា » ។
គួររំឭកថា កាលពីប៉ុន្មានឆ្នាំកន្លងទៅនេះ នៅខេត្តត្បូងឃ្មុំ ក៏មានឈ្មួញប្រើរូបភាពបែបនេះសម្លាប់ទីផ្សារផ្កាចំប៉ីម្ដងដែរ ដែលធ្វើឲ្យអ្នកនាំចូលរាងចាលលែងបញ្ជាទិញផ្កាចំប៉ីពីកម្ពុជា ហើយទីផ្សារនេះក៏ងើបមិនរួចរហូតដល់សព្វថ្ងៃ ។
ដោយឡែក ការរៀបចំពិធីផ្សារណាត់បន្លែសុវត្ថិភាព និងផលិតផលសុវត្ថិភាពនេះឡើង ក្នុងគោលបំណងបំផុសឲ្យប្រជាពលរដ្ឋទូទៅមានចំណាប់អារម្មណ៍ក្នុងទិញបន្លែដែលមានគុណភាព និងសុវត្ថិភាព យកទៅបរិភោគ និងបង្ហាញឲ្យអ្នកទទួលទិញដុំយកទៅលក់នៅផ្សារដទៃ បានទទួលស្គាល់ពីសមត្ថភាពនៃការផលិតបន្លែប្រកបដោយគុណភាព និងសុវត្ថិភាពរបស់កសិករ ក្រោមគម្រោងសាកល្បងលើកដំបូងរបស់រាជរដ្ឋាភិបាលសម្រាប់ការជំរុញផលិតកម្មស្បៀងក្នុងខេត្តគោលដៅចំនួន១១ ដែលបានបោះទុនវិនិយោគចំនួនប្រមាណ២០លានដុល្លារអាមេរិក ។
គម្រោងខាងលើនេះមានគោលបំណងលើកស្ទួយផលិតផលកសិកម្មជាតិ និងកាត់បន្ថយការនាំចូល ដោយត្រូវបង្កើនការផលិតនូវផលិតផលកសិកម្មប្រកបដោយគុណភាព សុវត្ថិភាព និងបង្កើនប្រាក់ចំណូលរបស់កសិករខ្នាតតូច និងមធ្យម ដែលកំពុងមានបញ្ហាប្រឈម ៕
ចែករំលែកព័តមាននេះ