រាជធានីភ្នំពេញ ៖ យុវជនពីរនាក់ជិះម៉ូតូមួយគ្រឿងម៉ាកស៊ុយហ្សុ៊យគីឡែត ទើបតែចេញពីធ្វើការបំរុងជិះត្រឡប់ទៅផ្ទះក៏ត្រូវជនសង្ស័យមួយក្រុមជិះដេញតាមវាយប្លន់យកម៉ូតូបានសម្រេចរួចជិះរត់គេចខ្លួនបាត់ស្រមោលដោយសុវត្ថិភាព។ ហេតុការណ៍នេះបានកើតឡើងកាលពីម៉ោង៩និង៥០នាទីយប់ថ្ងៃទី៩ ខែកក្កដា ឆ្នាំ២០១៨ ត្រង់ចំណុចខាងមុខស្ថានីយប្រេងឥន្ធនៈ ក្បែរសួនកំសាន្តចំការព្រីង តាមបណ្តោយផ្លូវ២០១១ ស្ថិតសង្កាត់គោកឃ្លាង ខណ្ឌសែនសុខ។
ជនរងគ្រោះទាំង២នាក់រួមមាន អ្នកបើកបរម៉ូតូឈ្មោះ កាន តុលា ភេទប្រុស អាយុ២៤ឆ្នាំ ជាកម្មកររោងចក្រ ស្នាក់នៅបន្ទប់ជួលម្តុំវត្តតាំងក្រសាំង សង្កាត់កាកាបទី២ ខណ្ឌពោធិ៍សែនជ័យ និងអ្នករួមដំណើរឈ្មោះ ហិន រដ្ឋា ភេទប្រុស អាយុ២៣ឆ្នាំ ជាកម្មកររោងចក្រ ស្នាក់នៅជាមួយគ្នា។
បើតាមសម្តីពីជនរងគ្រោះបានរៀបរាប់ប្រាប់អោយដឹងថា នៅមុនពេលកើតហេតុ រូបគេទាំងពីរនាក់ទើបតែចេញមកពីកន្លែងធ្វើការនៅម្តុំរង្វង់មូលចោមចៅគោលបំណងត្រលប់ទៅបន្ទប់ជួលវិញនៅម្តុំវត្តតាំងក្រសាំង ដោយបើកបរម៉ូតូមួយគ្រឿងម៉ាកស៊ុយហ្សុ៊យគីឡែត ពណ៌សលាយខៀវ ពាក់ស្លាកលេខ តាកែវ ១P-៤៨៣៦ តាមបណ្តោយផ្លូវសហព័ន្ធរុស្ស៊ី ក្នុងទិសដៅពីត្បូងទៅជើង ក្នុងល្បឿនលឿន។ លុះមកដល់ខាងមុខអាកាសយានដ្ឋានអន្តរជាតិភ្នំពេញ ក៏ស្រាប់តែលេចមុខជនសង្ស័យមួយក្រុមមានគ្នាបួននាក់ជិះម៉ូតូពីរគ្រឿងម៉ាកហុងដាឌ្រីម មិនចាំស្លាកលេខ ជិះមកពីក្រោយ ហើយបានស្រែកដាក់ជនរងគ្រោះថា «ពួកហែងជិះម៉ូតូឈ្លើយម៉្លេះ» ថែមទាំងដកខ្សែក្រវាត់វាយទៅលើជនរងគ្រោះទាំងពីរនាក់ថែមទៀត
ផង។
ប្រភពដដែលបន្តទៀតថា ភ្លាមៗនោះជនរងគ្រោះភ័យស្លន់ស្លោខ្លាំងពេកក៏បានជិះម៉ូតូរត់គេចខ្លួនទៅខាងមុខទៀតទាំងហួសផ្លូវចូលបន្ទប់ជួលរបស់ពួកគេ ហើយក្រុមជនសង្ស័យក៏បន្តជិះដេញតាមវាយជនរងគ្រោះទាំងពីរនាក់ខាងលើ រហូតទៅដល់ចំណុចកើតហេតុដោយជនរងគ្រោះភ័យស្លន់ស្លោខ្លាំងពេកក៏ចាប់ហ្វ្រាំង បណ្តាលឲ្យដួលម៉ូតូហើយជនរងគ្រោះទាំងពីរនាក់ខាងលើបានងើបរត់ចោលម៉ូតូយករួចខ្លួនដើម្បីរត់រកឲ្យគេនៅក្បែរនោះជួយ។ ភ្លាមនោះដោយក្រុមជនសង្ស័យឃើញជនរងគ្រោះរត់ចោលម៉ូតូ ឆ្លៀតឱកាសល្អក៏រត់ទៅលើកម៉ូតូរបស់ជនរងគ្រោះជិះរត់គេចខ្លួនទៅបាត់ស្រមោលដោយសុវត្តិភាព។
ក្រោយពេលកើតហេតុ ជនរងគ្រោះបានត្រឹមតែកាន់កាតគ្រីម៉ូតូដែលត្រូវក្រុមចោរប្លន់យកទៅបាត់ដើម្បីទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលគោកឃ្លាងដោយក្តីសោកស្តាយ ៕
ចែករំលែកព័តមាននេះ