ប្រទេសថៃ ៖ មនុស្ស៨នាក់ហើយ ក្នុងចំណោមមនុស្ស១៣នាក់ជាប់ក្នុងរូងភ្នំទឹកជន់លិចនៅថៃ តាំងពីដំណាច់ខែមិថុនាមកទល់ពេលនេះ គឺបានរួចផុតពីគ្រោះថ្នាក់ហើយ ដោយពួកអ្នកជួយសង្គ្រោះបានពុះពារយកចេញមកបាន ប៉ុន្តែការលំបាកក្នុងការនាំមនុស្ស៥នាក់ទៀតដែលនៅសល់ចេញ ពិតជានៅមានការបារម្ភខ្លាំង ។
ពួកអ្នកជួយសង្គ្រោះ នាថ្ងៃទី៩ កក្កដា អាចនាំកុមារ៤នាក់ទៀតចេញពីរូង ក្រោយពួកអ្នកមុជទឹកពិសេសនាំកុមារ៤នាក់ដំបូងចេញ បានដោយសុខសប្បាយ ។ នាយករដ្ឋមន្ត្រីថៃ លោកប្រាយុទ្ធ ចាន់អូចា ដែលទៅកាន់ទីតាំងប្រតិបត្តិការជួយសង្គ្រោះ កាលពីរសៀលថ្ងៃទី៩ កក្កដា ថ្លែងថា មនុស្សម្នាអាចមានមោទនភាព ប៉ុន្តែបេសកកម្ម នៅពុំទាន់បញ្ចប់នៅឡើយ ។
ចំណែកប្រមុខក្រុមហ៊ុនSPACEX និងTESLA អាមេរិក លោកELON MUSK ប្រកាស នៅថ្ងៃទី១០កក្កដា នេះថា លោកស្ថិតនៅឯទីតាំងប្រតិបត្តិការជួយសង្គ្រោះ រួចលោកបានបញ្ជូនមកកាន់ប្រទេសថៃនូវ នាវាមុជទឹកសង្គ្រោះធុនតូចមួយគ្រឿង ដែលអាចមុជចូលក្នុងច្រកចង្អៀតបំផុត តែនាវានេះធំគួរសមអាចឲ្យកុមារម្នាក់ជិះក្នុងនោះបាន ។ នាវាមុជទឹកធុនតូចនេះ អាចតោងក្នុងទឹកដោយពួកអ្នកមុជទឹក។ លោកថានាវាមុជទឹកតូចនេះត្រៀម ប្រសិនបើត្រូវការប្រើវា ។
ប្រទេសថៃទាំងមូលសង្ឃឹមមុតមាំថា ទីបំផុតកុមារទាំង១២នាក់ និងគ្រូបង្វឹកបាល់ទាត់ពួកគេ ជាប់ក្នុងរូងភ្នំថាមលួងតាំងពីថ្ងៃទី២៣ មិថុនាមក នឹងនាំចេញបានទាំងអស់គ្នា ដោយសុខសប្បាយ ។ ប្រតិបត្តិការនោះត្រូវបានចាប់អារម្មណ៍ខ្លាំងបំផុត ទាំងនៅប្រទេសថៃទាំងនៅឯបរទេស ហើយអ្នកកាសែតដល់ទៅជាង១០០០នាក់ ត្រូវបានបញ្ជួនមក ។
ភ្លៀងដែលគំរាមជន់លិចរូងភ្នំនេះជាថ្មី ជាការប្រឈមសំខាន់ សម្រាប់ពួកអ្នកជួយសង្គ្រោះ ដែលសង្ស័យថាអាចមានភ្លៀងធ្លាក់ថ្មីៗ មុនពេលនាំមនុស្សទាំងអស់ ចេញពីរូងបាន ។ កាលពីថ្ងៃទី៨ កក្កដា កុមារ៤នាក់អាចនាំចេញពីរូងភ្នំ ដោយសារពួកអ្នកមុជទឹក ដែលមានបទពិសោធ ដែលនាំពួកគេកាត់ផ្លូវបត់បែនយ៉ាងឆ្ងាយ ហើយកន្លែងខ្លះ មានទឹកលិចនិងតូចចង្អៀត ។ កុមារក្រុមទី២ មានគ្នា៤នាក់ដែរ គ៏ត្រូវនាំមកតាមច្រកដដែលចេញផុតពីរូងដោយសុុខសាន្ត។
កុមារ៤នាក់ក្រុមដំបូង កំពុងសម្រាកនៅមន្ទីរពេទ្យមានសុខភាពល្អ ទោះបីពួកគេនៅមិនទាន់ ឱ្យជួបផ្ទាល់ជាមួយឪពុកម្ដាយ ដើម្បីចៀសវាងការចម្លងមេរោគដល់ពួកគេក្ដី ព្រោះស្ថានភាពពួកគេនៅខ្សោយ ។ ក្រុមគ្រូពេទ្យគ្រោងឲ្យសាច់ញាតិគ្រួសារ ចួលសាកសួរសុខទុក្ខ តែខណ្ឌចែកដោយកញ្ចក់ភ្លឺ ។ ក្រុមអ្នកជួយសង្គ្រោះ ត្រូវការសម្រាកចន្លោះការនាំមនុស្សចេញទាំង២លើក ហើយប្ដូរធុងអុកសីុហ្សែន តាមបណ្ដោយផ្លូវឆ្លងកាត់រូង ។
ចែករំលែកព័តមាននេះ