រាជធានីភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា បានថ្លែងថា សមាគមពាណិជ្ជកម្មចិននៅកម្ពុជា មានសារសំខាន់ក្នុងការកសាងទំនាក់ទំនងពាណិជ្ជកម្មទៅវិញទៅមក និងជា «ស្ពាន» ប្រកបដោយប្រសិទ្ធភាពខ្ពស់សម្រាប់រដ្ឋាភិបាលនៃប្រទេសទាំងពីរ ។
លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានលើកឡើងបែបនេះ នៅក្នុងជំនួបពិភាក្សាជាមួយលោក Yu Ling Xiong ប្រធានសមាគមពាណិជ្ជកម្មចិននៅកម្ពុជា កាលពីពេលកន្លងមកថ្មីៗនេះ ។
លោកជំទាវឧបនាយករដ្ឋមន្ត្រីបានបន្ដថា ការងាររបស់សមាគមពាណិជ្ជកម្មចិននៅកម្ពុជាគឺជាការផ្តល់សេវាកម្ម និងការធានាដ៏ល្អឥតខ្ចោះដល់សហគ្រិនចិនដែលមកធ្វើវិនិយោគនៅកម្ពុជា ហើយបានខិតខំប្រឹងប្រែងក្នុងការត្រួសត្រាយ និងភាពច្នៃប្រឌិតបានទទួលលទ្ធផលយ៉ាងល្អប្រសើរ ។
លោកជំទាវថ្លែងថា ៖« ការរីកចម្រើនឥតឈប់ឈរនៃទំនាក់ទំនងរវាងចិននិងកម្ពុជា បានធ្វើឲ្យប្រទេសទាំងពីរអនុវត្តកិច្ចសហប្រតិបត្តិការជាក់ស្តែង និងមិត្តភាពលើវិស័យជាច្រើនតាមរយៈយុទ្ធសាស្ត្រខ្សែក្រវាត់មួយ ផ្លូវមួយ » ។
លោកជំទាវក៏បានសំណូមពរសមាគមធ្វើការអភិវឌ្ឍន៍យុគសម័យថ្មី និងយកចិត្តទុកដាក់ក្នុងការអភិវឌ្ឍវិស័យបច្ចេកវិទ្យាថ្មី ដែលមានបច្ចេកវិទ្យាខ្ពស់ និងនាំចូលនូវបច្ចេកវិទ្យាថ្មីកាន់តែប្រសើរ និងច្រើនថែមទៀតសម្រាប់ប្រទេសកម្ពុជា ដើម្បីជួយសេដ្ឋកិច្ចកម្ពុជាបន្តរីកចម្រើន ។
លោក Yu Ling Xiong ប្រធានសមាគម បានលើកឡើងថា សមាគមពាណិជ្ជកម្មចិននៅកម្ពុជា បានរៀបចំយ៉ាងសកម្មនូវសហគ្រិនក្នុងប្រទេសចិនមកធ្វើវិនិយោគនៅកម្ពុជា ហើយបានសម្រេចធ្វើកិច្ចសហប្រតិបត្តិការវិនិយោគមួយចំនួននៅតំបន់ទីក្រុងភ្នំពេញ និងទីក្រុងព្រះសីហនុ ដែលទាក់ទងនឹងវិស័យទេសចរណ៍ សណ្ឋាគារ វេជ្ជសាស្ត្រ រ៉ែ និងថាមពល ព្រមទាំងពាណិជ្ជកម្ម ជាដើម ។
លោកបន្ថែមថា ៖« សមាគមមិនត្រឹមតែរៀបចំគណៈប្រតិភូសហគ្រិនចិនមកធ្វើទស្សនកិច្ចនៅកម្ពុជាពិភាក្សាការងារអំពីការវិនិយោគជាមួយក្រសួងពាណិជ្ជកម្មកម្ពុជាប៉ុណ្ណោះទេ ថែមទាំងផ្តល់កម្លាំងជំនួយសម្រាប់ទំនាក់ទំនងរបស់រដ្ឋាភិបាលចិននិងកម្ពុជាផងដែរ» ។
គួរបញ្ជាក់ថា រាជរដ្ឋាភិបាលកម្ពុជាបានយល់ព្រមបង្កើតសមាគមពាណិជ្ជកម្មចិននៅកម្ពុជា កាលពីខែកញ្ញា ឆ្នាំ២០១៧ ដើម្បីធ្វើជាវេទិកាពាណិជ្ជកម្មអន្តរជាតិដែលប្រមូលផ្តុំការវិនិយោគឆ្លងកាត់ព្រំដែន, សមាហរណកម្មធនធាន, កិច្ចសហប្រតិបត្តិការពាណិជ្ជកម្ម, ការផ្លាស់ប្តូរព័ត៌មាន និងបង្កើនបណ្តាញទំនាក់ទំនងប្រកបដោយប្រសិទ្ធភាព ៕
ចែករំលែកព័តមាននេះ