តាមប្រភពព័ត៌មាន Japan News បានឲ្យដឹងថា ចំនួនអ្នកស្លាប់នៅក្នុងហេតុការណ៍ទឹកជំនន់ជន់លិចដោយសារតែភ្លៀងធ្លាក់ខ្លាំងនៅប៉ែកខាងលិចប្រទេសជប៉ុន ត្រូវបានកើនឡើងជាលំដាប់រហូតដល់១១៤នាក់ នៅក្នុងតំបន់ទាំង១២ រួមទាំង Hiroshima និង Ehime ដែលគិតត្រឹមល្ងាចថ្ងៃចន្ទ កាលពីម្សិលមិញ។
ទិន្នន័យនេះ ត្រូវបានប្រមូលដោយកាសែត The Yomiuri Shimbun របស់ជប៉ុន ។ ជាមួយគ្នានេះដែរ តាមទិន្នន័យរបស់កាសែតខាងលើក៏បានរកឃើញថា មានមនុស្ស៥៩នាក់ទៀត ត្រូវបានបាត់ខ្លួនរកមិនទាន់ឃើញ ។
ក្រុមប៉ូលិសនិងអាជ្ញាធរបាននាំគ្នាធ្វើការរុករកកាលពីថ្ងៃចន្ទ តែពួកគេគិតថា ភាគរយនៃការស្លាប់ គឺច្រើន ដោយសារតែរកយូរហើយមិនទាន់ឃើញ ។ ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ បានចេញទិន្នន័យបង្ហាញថា៖ ទន្លេចំនួន៧៩ និងដីសរុប២៣៣០ហិកតា ត្រូវបានជន់លិច កាលពីម៉ោង៤ព្រឹកថ្ងៃចន្ទ(ក្នុងតំបន់) ។
ចំណែកផ្លូវធំៗចំនួន១២ខ្សែ ដែលក្នុងនោះក៏មានផ្លូវនៅតំបន់ Chugoku, Shikoku និង Kyushu ត្រូវបានបិទ ដោយសារតែបាក់ដី ។
ចែករំលែកព័តមាននេះ