រាជធានីភ្នំពេញ ៖ រយៈពេល៥ឆ្នាំចុងក្រោយនេះ ប្រទេសកម្ពុជាបានក្លាយជាគោលដៅវិនិយោគដ៏សំខាន់មួយរបស់វិនិយោគិនបណ្តាក់ទុនវិនិយោគលើគ្រប់វិស័យ ដែលជំរុញឱ្យសេដ្ឋកិច្ចកម្ពុជារក្សាបានកំណើនយ៉ាងរឹងមាំ និងកំពុងបន្ដស្ថិតនៅលើផ្លូវឆ្ពោះទៅប្រទេសមានប្រាក់ចំណូលមធ្យមកម្រិតខ្ពស់។ តើអ្វីជាចំណុចខ្លាំងរបស់កម្ពុជា ដែលកំពុងផ្ដល់ទំនុកចិត្តឲ្យវិនិយោគិនហ៊ានបោះទុនរាប់ពាន់លានដុល្លារលើទឹកដីយើងនេះ ?
បើតាមអ្នកជំនាញសេដ្ឋកិច្ចមើលឃើញថា បច្ចុប្បន្ននេះ ចំណុចខ្លាំងដែលកម្ពុជាអាចទាក់ទាញអ្នកវិនិយោគឱ្យមកបណ្តាក់ទុនបាន គឺមានចំនួន៦ចំណុចសំខាន់ៗ ។
លោកបណ្ឌិត គីម ហ៊ាង ម្ចាស់អាជីវកម្ម Keller Williams Realty នៅកម្ពុជា និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា ចំណុចខ្លាំងរបស់កម្ពុជា ក្នុងការទាក់ទាញអ្នកវិនិយោគទុនមកបណ្ដាក់ទុននោះរួមមាន ៖
១-កំណើនសេដ្ឋកិច្ចជាតិ ៖ សេដ្ឋកិច្ចរបស់កម្ពុជាមានកំណើនជាមធ្យមក្នុងរង្វង់៧% ជាង២ទសវត្សរ៍មកហើយ ដែលបានធ្វើឱ្យប្រទេសកម្ពុជាចាកផុតពីបន្ទាត់ក្រីក្រ ។
២-កត្តាប្រជាសាស្ត្រ ៖ ដោយប្រទេសកម្ពុជាមានប្រជាជនប្រហែល៦៨% ឬប្រហែល១១លាននាក់ មានវ័យក្រោមអាយុ៤០ឆ្នាំ គឺជាវ័យដែលពេញកម្លាំងពលកម្ម ។
៣-កត្តាភូមិសាស្ត្រ ៖ ព្រះរាជាណាចក្រកម្ពុជាជាដែនដីនៃព្រះដែលនៅឆ្ងាយពីគ្រោះធម្មជាតិទាំងឡាយ មានដូចជា ខ្យល់ព្យុះ រញ្ជួយផែនដី បន្ទុះភ្នំភ្លើង និងទឹកជំនន់ធ្ងន់ធ្ងរ ជាដើម ។
៤-កត្តានយោបាយ ៖ ដោយព្រះរាជាណាចក្រកម្ពុជាមានស្ថានភាពនយោបាយរឹងមាំ និងចាស់ទុំ ដែលបានឆ្លងកាត់ការបោះឆ្នោតជាតិអស់ជាច្រើនអាណត្តិ ធ្វើឲ្យវិនិយោគិនមានទំនុកចិត្តទៅលើការបោះឆ្នោតសកលនៅថ្ងៃទី២៩ កក្កដា ២០១៨ ខាងមុខ ។
៥-កត្តាសង្គម ៖ ដោយប្រជាជនកម្ពុជាភាគច្រើនមានភាពរួសរាយរាក់ទាក់ ស្មោះត្រង់ ឱ្យតម្លៃលើជនជាតិបរទេស និងចេះជួយយកអាសាគ្នាទៅវិញទៅមក គឺជាចំណុចទាក់ទាញមួយនៃអ្នកវិនិយោគ ។
៦-កត្តាពាក់ព័ន្ធផ្សេងៗ ៖ ក្រៅពីកត្តាសំខាន់ៗខាងលើនេះ ក៏មានកត្តាជាច្រើនទៀតដូចជា ភាសាបរទេស លុយដុល្លារ ច្បាប់អាជីវកម្ម អាកាសធាតុ ការបង់ពន្ធ ការលំហែកម្សាន្ត និងរបៀបរបបនៃការរស់នៅ ជាដើម ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ នៃក្រុមហ៊ុន Emerging Markets Consulting លោក ង៉ែត ជូ បានយល់ស្របនឹងការលើកឡើងរបស់អ្នកជំនាញអចលនទ្រព្យរូបនេះ ថែមទាំងបានបន្ថែមនូវចំណុចខ្លាំងរបស់កម្ពុជាមួយចំនួនទៀតផងដែរ ។
លោក ង៉ែត ជូ បានថ្លែងកាលពីថ្ងៃទី៩ កក្កដា ម្សិលមិញថា ៖« មានចំណុចមួយចំនួនទៀតដែលកម្ពុជាអាចទាក់ទាញអ្នកវិនិយោគឱ្យចូលមកបណ្តាក់ទុន ដូចជា ការលើកទឹកចិត្តដល់ការវិនិយោគមួយចំនួន, ការលើកលែងពន្ធមួយចំនួនពីរាជរដ្ឋាភិបាល ហើយអ្វីដែលពិសេសនោះ គឺក្រុមហ៊ុនបរទេសមានសិទ្ធិកាន់កាប់អាជីវកម្ម១០០% និងអាចយកប្រាក់ចំណេញ១០០% ផ្ទេរទៅស្រុករបស់ខ្លួនបាន » ។
លោកបន្ថែមថា ៖« ចំណុចសំខាន់មួយចំនួនទៀតនោះ គឺប្រព័ន្ធអនុគ្រោះដល់ការវិនិយោគ, កំណើនសេដ្ឋកិច្ច, កំណើនប្រជាជន ជាពិសេស ការពង្រីកទីក្រុងដ៏លឿនដូចសព្វថ្ងៃនេះ វាជាកម្លាំងចលករដ៏ខ្លាំង ក្នុងការទាក់ទាញអ្នកវិនិយោគឱ្យចូលមកបណ្តាក់ទុននៅកម្ពុជា » ។
គួរបញ្ជាក់ថា ក្នុងរយៈពេល២០ឆ្នាំកន្លងទៅនេះ (១៩៩៨-២០១៨) ផលិតផលក្នុងស្រុកសរុបរបស់កម្ពុជា បានកើនពី៣.១០៦លានដុល្លារ ដល់២៤.៦០៥លានដុល្លារ, ផលិតផលក្នុងស្រុកសរុបសម្រាប់មនុស្សម្នាក់កើនពី២៥៣ដុល្លារ ដល់១.៥៦៣ដុល្លារ, ប្រាក់ឈ្នួលអប្បបរមាពី៤០ដុល្លារ កើនដល់១៧០ដុល្លារ, អតិផរណាពី១៤,៧% ថយចុះមកនៅ៣,៤%, អត្រាភាពក្រីក្រពី៥៣,២% ថយចុះមកនៅ១៣,៥%, ការនាំចេញពី៨០០លានដុល្លារ កើនដល់១២.១២៣លានដុល្លារ, ទុនបម្រុងអន្តរជាតិមាន៣៩០លានដុល្លារ កើនដល់៩.៤៩៤លានដុល្លារ, ប្រាក់សោធននិវត្តន៍អប្បបរមាក្នុងម្នាក់មាន៧ម៉ឺនរៀលក្នុង១ខែ កើនដល់៤៨ម៉ឺនរៀលក្នុង១ខែ, ចំណូលថវិកាជាតិសរុបមានពី២៤៧លានដុល្លារ កើនដល់៤.៧៣២លានដុល្លារ, ចំនួនភ្ញៀវទេសចរពី២៨៦.៥២៤នាក់ កើនដល់៦.២៦២.១៦៤នាក់ និងអាយុកាលសង្ឃឹមរស់ពី៥៦,៧ឆ្នាំ ដល់៧០,៦ឆ្នាំ ៕
ចែករំលែកព័តមាននេះ