រាជធានីភ្នំពេញ ៖ យុវជនចំនួនបីនាក់បានជិះម៉ូតូទាក់ដៃចង្កូតជាមួយក្មេងប្រុសសិស្សសាលាម្នាក់ដែលឈរនៅលើរថយន្តក្រុងហើយដាក់ដៃចេញមកក្រៅ បណ្តាលឱ្យដួលម៉ូតូ ចំណែករថយន្តក្រុងដែលមានដឹកសិស្សសាលាបានបួងចង្កូតឡើងលើសួនច្បារពុះចែកទ្រូងផ្លូវ ពេលនោះភាគីទាំងពីរបានប្រើអំពើហិង្សាដាក់គ្នា បង្កអោយមានការណ៍ភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី៩ ខែកក្កដា ឆ្នាំ២០១៨ ទល់មុខដេប៉ូប្រេងឥន្ធនៈ ផ្លូវ២១៧ សង្កាត់ស្ទឹងមានជ័យ១ ខណ្ឌមានជ័យ ។
តាមប្រភពព័ត៌មានពីអ្នកឃើញហេតុការណ៍បានអោយដឹងថា មុនពេលកើតហេតុ គេបានឃើញរថយន្តក្រុងមួយគ្រឿងប្រភេទ៣៥កៅអីរបស់សាលាអង្គការបានដឹកសិស្ស ក្នុងគោលបំណងជូនសិស្សចេញពីសាលារៀនត្រលប់ទៅផ្ទះវិញម្តុំភូមិទួលសំបូរ សង្កាត់ព្រៃវែង ខណ្ឌដង្កោ បានធ្វើដំណើរតាមផ្លូវ២១៧ បើកបរក្នុងទិសដៅពីលិចទៅកើត លុះមកដល់ចំណុចកើតហេតុ ក៍ស្រាប់តែមានយុវជន៣នាក់ដែលជាសិស្សសាលាបានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១HB-៥៣៤០ ធ្វើដំណើរស្របទិសគ្នា បានជ្រុលទៅទាក់ដៃចង្កូតជាមួយនឹងក្មេងប្រុសសិស្សសាលាម្នាក់ដែលឈរនៅលើរថយន្តក្រុងខាងលើនោះហើយដាក់ដៃចេញមកក្រៅ បណ្តាលអោយម៉ូតូដួល ។
តាមប្រភពព័ត៌មានបានបន្តទៀតថា ពេលនោះដែរ អ្នកបើកបររថយន្តក្រុងបានបួងចង្កូតគេចចេញ ព្រោះខ្លាចកិនយុវជនទាំង៣នាក់ដែលជិះម៉ូតូម៉ាកហុងដានោះ ទើបធ្វើអោយរថយន្តក្រុងរេចង្កូតឡើងលើសួនច្បារពុះចែកទ្រូងផ្លូវតែម្តង ភ្លាមៗនោះដែរ យុវជនដែលជិះម៉ូតូបាននាំគ្នាប្រើអំពើហិង្សាទៅក្មេងសិស្សសាលាម្នាក់ដែលជិះក្នុងរថយន្តក្រុង បណ្តាលអោយរងរបួសស្មាខាងស្តាំបន្តិចបន្តួច រួចហើយក៍បាននាំគ្នារត់គេចខ្លួន ចោលម៉ូតូ និងដំបងដែក៣កំណាត់នៅនឹងកន្លែងកើតហេតុ ក៍ត្រូវសមត្ថកិច្ចយកទៅរក្សាទុកផងដែរ ។
បន្តិចក្រោយមក ឃើញវត្តមានឪពុកម្តាយរបស់យុវជនដែលជិះម៉ូតូបានដឹកកូនរបស់ខ្លួនមកកន្លែងកើតហេតុ រួចបានសាកសួរពីដំណើររឿង ដោយសិស្សសាលាដែលជិះក្នុងរថយន្តក្រុងនិយាយថា ខាងអ្នកជិះម៉ូតូជាអ្នកវាយពួកគេ ដោយឡែកយុវជនដែលជិះម៉ូតូបានចោទថា ខាងសិស្សសាលាដែលជិះក្នុងរថយន្តក្រុងបានវាយដៃចង្កូតម៉ូតូរបស់ពួកគេ ទើបបណ្ដាលម៉ូតូដួលបែបនេះ ។
ដោយឡែក វត្ថុតាងដែលសមត្ថកិច្ចដកហូតបានមានដំបងដែក៣កំណាត់ចំនួន១ដើម ហើយសមត្ថកិច្ចបានសួរនាំភាគីទាំងសងខាង ហើយភាគីទាំងសងខាងបានចោទដាក់គ្នាទៅវិញទៅមក ដោយម្ខាងៗប្រកែកថាមិនមែនជារបស់ពួកគេនោះទេ ។
ក្រោយពេលកើតហេតុ តំណាងភាគីទាំងសងខាងបានសម្របសម្រួល ដោយមិនប្តឹងផ្តល់និងទាមទារសំណងអ្វីនោះទេ គឺអោយខាងរថយន្តដោះស្រាយការខូចខាតចំពោះសួនច្បារពុះចែកទ្រូងផ្លូវបានហើយ ៕
ចែករំលែកព័តមាននេះ