រាជធានីភ្នំពេញ ៖ បុរសជាកម្មករបូមខ្សាច់របស់ក្រុមហ៊ុនមួយ មិនបានប្រយ័ត្នដកឌុយចេញពីព្រីភ្លើងបណ្ដាលអោយឆក់ស្លាប់មួយប៉ប្រិចភ្នែក ហេតុការណ៍នេះបង្កការភ្ញាក់ផ្អើលដល់សមត្ថកិច្ច និងរថយន្តសង្គ្រោះបន្ទាន់ កាលពីវេលាម៉ោង៤និង៣០នាទីល្ងាចថ្ងៃទី៩ ខែកក្កដា ឆ្នាំ២០១៨ នៅចំណុចសាឡង់បូមខ្សាច់មាត់ទន្លេ ស្ថិតនៅភូមិកោះនិរោធ សង្កាត់និរោធ ខណ្ឌច្បារអំពៅ ។
ជនរងគ្រោះដែលស្លាប់ឈ្មោះ ឡា យុំាងថាវ ជាជនជាតិវៀតណាម ភេទប្រុស អាយុ២៩ឆ្នាំ មុខរបរកម្មករបូមខ្សាច់របស់ក្រុមហ៊ុន ស្នាក់នៅបន្ទប់ជួលផ្លូវលំ ស្ថិតនៅភូមិកោះនិរោធ សង្កាត់និរោធ ខណ្ឌច្បារអំពៅ ។
ប្រភពព័ត៌មានពីសមត្ថកិច្ចបានប្រាប់អោយដឹងថា កម្មកររបស់ក្រុមហ៊ុនបូមខ្សាច់មិនប្រយ័ត្នដកឌុយចេញពីព្រីភ្លើងបណ្តាលអោយឆក់ស្លាប់ ។ ក្រោយកើតហេតុរថយន្តសង្គ្រោះរបស់មន្ទីរពេទ្យបង្អែកមានជ័យមកសង្គ្រោះដែរ តែមិនអាចជួយក៏បានស្លាប់ ហើយក្រោយមកក៏ទំនាក់ទំនងការិយាល័យនគរបាលផ្នែកបច្ចេកទេសកោសល្យវិច្ឆ័យស្នងការរាជធានីភ្នំពេញចុះមកត្រួតពិនិត្យសពបុរសជាជនជាតិវៀតណាម ។
សមត្ថកិច្ចបានបញ្ជាក់ថា ក្រោយកើតហេតុ ជំនាញចុះទៅដល់កន្លែងកើតហេតុ តែថៅកែ ឬតំណាងក្រុមហ៊ុនមិនបានចេញមកធ្វើការដោះស្រាយជាមួយក្រុមគ្រួសារសពជនរងគ្រោះនោះទេ ។ ក្រោយពីការត្រួតពិនិត្យសព និងត្រួតពិនិត្យកន្លែងសាឡង់បូមខ្សាច់ឃើញមានម៉ាស៊ីនសំរាប់បូមទឹក និងមានការឯកភាពពីលោកគ្រូពេទ្យអមសាលាដំបូងរាជធានីភ្នំពេញបានសន្និដ្ឋានថាជាករណីឆក់ខ្សែភ្លើងស្លាប់ ៕
ចែករំលែកព័តមាននេះ