ខេត្តមណ្ឌលគិរី ៖ កសិករនៅមណ្ឌលគិរីកំពុងប្រឈមបញ្ហាផលកសិកម្មធ្លាក់ចុះស្ទើរគ្រប់ប្រភេទ ខណៈដំណាំសណ្តែកបាយនឹងម្រេចកំពុងដល់រដូវប្រមូលផលបានធ្វើឲ្យពួកគាត់ព្រួយបារម្ភពីជីវភាព ប្រចាំថ្ងៃ ។ ជាក់ស្តែងនៅឆ្នាំនេះសណ្ដែកបាយ មានតម្លៃថ្លៃជាងឆ្នាំមុន តែកសិករនៅតែត្អូញត្អែថា ដាំសណ្ដែកបាយមិនចំណេញព្រោះចំណាយដើមទុនច្រើនប្រមូលផលវិញបានតិច…
ខេត្តមណ្ឌលគិរី ៖ កសិករនៅមណ្ឌលគិរីកំពុងប្រឈមបញ្ហាផលកសិកម្មធ្លាក់ចុះស្ទើរគ្រប់ប្រភេទ ខណៈដំណាំសណ្តែកបាយនឹងម្រេចកំពុងដល់រដូវប្រមូលផលបានធ្វើឲ្យពួកគាត់ព្រួយបារម្ភពីជីវភាព ប្រចាំថ្ងៃ ។ ជាក់ស្តែងនៅឆ្នាំនេះសណ្ដែកបាយ មានតម្លៃថ្លៃជាងឆ្នាំមុន តែកសិករនៅតែត្អូញត្អែថា ដាំសណ្ដែកបាយមិនចំណេញព្រោះចំណាយដើមទុនច្រើនប្រមូលផលវិញបានតិច ។
ក្នុងនោះអ្នកស្រី គឹម សៀងឡេង ប្រជាកសិករនៅភូមិមេប៉ៃ ឃុំពូជ្រៃ ស្រុកពេជ្រាដាបានឲ្យដឹងថា បច្ចុប្បន្នមុខរបរដាំសណ្តែកបាយពុំសូវទទួលបានផលចំណេញទេរហូតធ្វើឱ្យកសិករដាំសណ្តែកបាយមួយចំនួនបោះបង់ចោលរបរមួយនេះ ងាកទៅចាប់យកមុខរបរថ្មីមកជំនួសវិញ ។
អ្នកស្រីបានបញ្ជាក់ថា មូលហេតុដែលធ្វើឱ្យមុខរបរដាំសណ្តែកបាយនេះមិនសូវចំណេញ ដោយសារ តែទុនដែលប្រើប្រាស់ក្នុងការដាំសណ្តែកត្រូវចំណាយអស់ច្រើន គឺពូជសណ្តែកក៏ថ្លៃ ជី និងថ្នាំផ្សេងៗក៏ថ្លៃ ។ បើទោះជាតម្លៃសណ្តែកបាយនៅលើទីផ្សារមានតម្លៃឡើងបន្តិចនៅឆ្នាំនេះ ប៉ុន្តែគាត់នៅតែអះអាងថា បានចំណេញតិចតួចប៉ុណ្ណោះ ។ អ្នកស្រីបានបន្តថា គាត់មានផ្ទៃដីចម្ការប្រមាណ៦ហិកតា ដោយក្នុង១ហិកតា គាត់ត្រូវចំណាយលើការ ដាំសណ្ដែកបាយទាំងពូជ ជី ថ្នាំ និងកម្មករអស់ថវិកាជាង១លានរៀល ហើយគាត់ទទួល បានទិន្នផល សណ្ដែកមកវិញត្រឹម៦០០ទៅ១០០០គីឡូក្រាមប៉ុណ្ណោះក្នុង១ហិកតា ។
បើតាមកសិករដដែលនិយាយថា សណ្តែកបាយឆ្នាំនេះបានថ្លៃ៣០០០រៀល ទៅ៣៣០០រៀល ក្នុង១គីឡូក្រាម គឺបានថ្លៃជាងឆ្នាំមុន៤០០រៀល តែតម្លៃនេះមិនអាចឲ្យពួកគាត់បានចំណេញច្រើននោះទេ តែអ្នកស្រីថា ប្រសើរជាងទុកដីទំនេរចោល ចំពោះកសិករដែលពុំមានដីធ្លីខ្លួនឯង ពួកគាត់ជួល ដីគេ ប្រកបរបរនេះ គឺមិនមានចំណេញនោះទេទើបឆ្នាំនេះមិនសូវមានអ្នកជួលដីដាំដោយពួកគាត់ប្រកបរបរផ្សេងៗវិញ ។
ប្រធានមន្ទីរកសិកម្ម និងរុក្ខាប្រម៉ាញ់ខេត្តមណ្ឌលគិរី លោក សុងឃាង ឲ្យដឹងថា ឆ្នាំនេះដំណាំ សណ្ដែកបាយមានតម្លៃថ្លៃជាងមុន ឆ្នាំនេះសណ្ដែកបាយលេខ១បានថ្លៃ៣៥០០រៀលតម្លៃនេះខ្ពស់ ជាងឆ្នាំមុនដែលមានតម្លៃត្រឹម២៥០០រៀល ទៅ៣០០០រៀលប៉ុណ្ណោះ ។
ចំពោះផ្ទៃដាំសណ្ដែកបាយឆ្នាំនេះក៏មិនតិចជាងឆ្នាំមុនដែរ គឺតាមរបាយការណ៍របស់មន្ទីរកសិកម្ម ទូទាំង ខេត្តមណ្ឌលគិរីមានផ្ទៃដីដាំសណ្ដែកបាយសរុបចំនួន៣៥០០ហិកតា ហើយក្នុងចំណោមស្រុកក្រុងទាំង៥ មានតែប្រជាកសិករ២ស្រុកដែលប្រកបរបរដាំសណ្ដែកបាយ គឺស្រុកពេជ្រាដានិងស្រុកកែវសីមា ៕
ចែករំលែកព័តមាននេះ