រាជធានីភ្នំពេញ ៖ យុវជនស្រីប្រុសបីនាក់ជិះម៉ូតូមួយគ្រឿង ទើបតែចេញពីក្លឹបរាំលេងកំសាន្តក្នុងបំណងទៅផ្ទះក៏ត្រូវជនសង្ស័យមួយក្រុមជិះម៉ូតូពីរគ្រឿងធ្វើសកម្មភាពវាយប្លន់យកម៉ូតូតែមិនបានសម្រេច បណ្តាលឲ្យរងរបួស ហេតុការណ៍នេះកើតឡើងកាលពីវេលាម៉ោង២និង២៥នាទីរំលងអធ្រាត្រឈានចូលថ្ងៃទី៩ ខែកក្កដា ឆ្នាំ២០១៨ ត្រង់ចំណុចខាងក្រោមស្ពានអាកាសផ្សារដីហុយ តាមបណ្តោយផ្លូវហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ។
បើតាមសម្តីជនរងគ្រោះប្រុសស្រីទាំងបីនាក់សុំមិនបញ្ចេញឈ្មោះបានឲ្យដឹងថា នៅមុនពេលកើតហេតុ ពួកគេបានចូលទៅរាំលេងកំសាន្តនៅក្លឹបមួយកន្លែង ដោយមិនមានការឈ្លោះប្រកែកជាមួយអ្នកណានោះទេលុះដល់វេលាខាងលើពួកគេទាំងបីនាក់បានចេញពីក្លឹបកំសាន្តបំរុងជិះម៉ូតូត្រឡប់ទៅផ្ទះវិញនៅម្តុំជម្ពូវ័ន ដោយបានជិះម៉ូតូមួយគ្រឿងម៉ាក ស៊ុយហ្សុ៊យគីឡែត ពណ៌សបិទតែមពណ៌ទឹកប្រាក់ ពាក់ស្លាកលេខ ភ្នំពេញ១GZ-២៨៩៩ ធ្វើដំណើរតាមបណ្តោយផ្លូវហាណូយ ក្នុងទិសដៅពីជើងទៅត្បូង។
ប្រភពបានបន្តទៀតថា លុះមកដល់ចំណុចកើតហេតុ ក៏ស្រាប់តែលេចមុខជនសង្ស័យប្រុសស្រីមួយក្រុមមានគ្នា៥ទៅ៦នាក់ជិះម៉ូតូ២គ្រឿង មួយគ្រឿងម៉ាកឌូក និងមួយគ្រឿងទៀតម៉ាកហុងដាប៊ីត មិនចាំស្លាកលេខ បានជិះមកពីក្រោយប្រដាប់ទៅដោយដុំថ្ម និងមួកសុវត្ថិភាព បានជិះទៅបំបុកម៉ូតូរបស់ជនរងគ្រោះទាំង៣នាក់បណ្តាលឱ្យដួលនិងបានវាយទៅលើជនរងគ្រោះទាំងបីនាក់ខាងលើ បណ្តាលនារីរងគ្រោះរងរបួសបែកក្បាល និងបុរសពីរទៀតរងរបួសស្រាល។
ភ្លាមៗនោះក៏មានជនសង្ស័យម្នាក់បានស្រែកប្រាប់ទៅកាន់បក្ខពួកឱ្យមកលើកម៉ូតូរបស់ជនរងគ្រោះដើម្បីជិះគេចខ្លួន តែត្រូវបានជនរងគ្រោះស្រែកឆោឡោបង្កអោយមានការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមផ្លូវឈប់មើល និងជួយអន្តរាគមន៍។ បន្ទាប់មកដោយក្រុមជនសង្ស័យភ័យស្លន់ស្លោក៏បាននាំគ្នាជិះម៉ូតូរត់គេចខ្លួនបាត់ស្រមោល។
ក្រោយពេលកើតហេតុ ជនរងគ្រោះត្រូវបានសមត្ថកិច្ចមូលដ្ឋានដឹកយកទៅសាកសួរនាំ និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកថ្លា ៕
ចែករំលែកព័តមាននេះ